LALAKE' ganeko aroko’. Sokona adhang-kondhang.
Tombedda etor-bentorragi ka geddung se ekatoju’i. ngabas bensin dhalem
pan-barempan butol se gi’ buru mare esse’e ban gi’ tadha’ pajuna sakale.
Bensin biru ganeko pon esse’e dhalem bakto asar maba
sanajjan ta’ sorop are. Are ganeko, are lu-dullunan mokka’ tokona e gadhiya, e
kottha se gi’ ta’ bannya’ oreng mokka’ ban ajaga tokona. Sabellunna pon
asak-baliksak, nyalsal sadhajana gang-gang, jalan raja, jalan kene’, ramme
otaba seppe paggun ebukka’e bila kare asajja metorot pekkerra ekarassa ta’
bakal maserbek ka pekkeranna. Asabab ejalane reng-oreng se nyare kontrakan,
oreng entara alako, oreng mowa’, tor oreng ajalan, kottha se akantha gula
ganeko jalanna kose taker potpot, lejek, kantos abang-lobang.
maos jugan:
Reng-oreng dhateng dhari sadhaja disa, dhari kottha
kene’, dhateng aban-dhalumban, tadha’ pegga’na motor, tadha’ pegga’na oreng,
tadha’ pegga’na bis, tadha’ pegga’na seppur, kajaba bila pon ebukka’
panyethagganna seppur, epasang nyorot ka garubak seppur laenna. Reng-oreng
ondhur dhateng ka kottha ganeko, aban-dhalumban arebbu’ gula, arebbu’ rassa
manes kalaban mabiddhe’ mata, mindhar, lempo padha badha. Sanajjan ta’ bisa
ngotkot otaba ta’ bisa ngaot, pola bisa olle manesan sanajjan kalaban ngasak
maske banne re-kare. Mon ta’ olle gan sacapcap edhimma olleya.
Aba’na apangrasa dhari bannya’na oreng se pon ondhur
dhateng ja’ kottha ganeko pon possa’, sella’ kalaban reng-oreng dhari polona
dhibi’, dhari sakeng bannya’na, toko-toko se ajual gula ban manesan pon
ma’-semma’, dhari sakeng bannya’na, dhari sakeng semma’na, badha se sampe’
atokara e kottha ganeko. Bannya’ pon se aserro ja’ kottha ganeko pon sella’
banne polana sakadar oreng dhari polo ganeko. Aba’na apangrasa kodhu nyare
kottha laen se gi’ ta’ pate ekaeding ro’om manessa. Aba’na ngalle ka kottha
Gunong Tase’.
Dhalemmanna sa’are samalem tedung saromban, alama’
kardus. Bila ban-aban mangkat nyare e molae dhari buru ngobbar pajjar. Aromasa
ta’ sanggup ka cellep, aba’na ban kancana ngalle, nyare pangenebban se bisa
ebajar dhalemmanna samenggu. Bila para’ tengga malem, mole. Bila ngombar pajjar
mangkat nyare barung, toko, se bakal e kontra’agi. Sabadhana kontrakan se
okoran empa’ kale lema’, lebarra pa’ meter, tello meter, lanjangnga ka budhi
minimal pa’ meter otaba lema meter sampe’ ballung meter, nape pole jeddingnga
badha e dhalem sajan perak ta’ ngantos aban, ta’ ngantos bila pole, poko’
apanggi ban orengnga, arga kontrakanna ta’ pate larang kantos sagame’, tello
polo, nape pole gunna lema bellas juta, epanjerri. Paleng entenna, kontrakan
ganeko pon badha bin-sabinna kalaban elacodda baca’an “Dikontrakan” se biasana etoles ka kardhus, ka dhalubang ban
samacemma. namong coma epanjeri. Namong ta’ nanto bakal ebukka’e toko. Kadhang
coma epanjeri ban edhina. Elang pesse tello ratos ebu. Dhuratos ebu. Kadhang
manjeri kontrakan kantos lelema’ sampe’ sabellas biggi’. Ebukka’e kalaban
ecel-kocel.
Lalake’ ganeko aromasa buru arassa aroko’. Pendha
tennang. Pendha buru arassa ja’ anyaba. Bagian attassa songko’na akantha lorong
balapan, aliyu’-liyu’, barna cellengnga pon etantang barna mera. Songko’ se
pendha tenggi ganeko pon biasa eosong tor nongko’, sanajjan ta’ song-tarosong
ban ta’ sampe’ ko’-tapelko’.
Marena nyergu’ roko’na, songko’na eangka’. Badha se
gatel e budhiyanna kopengnga, namong samarena egagap, samarena tanang dhapa’ ka
pangrasana se gatel, rassa gatella elang. Sampe’ aba’na apangrasa ja’ saongguna
aba’na ta’ gatel, sakeng coma kapekkeran. Songko’na epanongko’ pole, lelere.
Ekala’ pole. Etenggu pole badha pesse se eselpettagi, otaba pola badha
dhalubang se eselpettagi. Songko’na ekarassa ro’om babur. Samba gu’-sergu’an
roko’ aba’na anya-tanya, bila aba’na se entar ka koburan, bial se tedung e
koburan. Masa’ dhari sossana taker taselpet ka koburan.
“Sumiya, Su. Dika mandhi gi? Su. Sumiya. Nyaot na
colo’na ganeko. Malle ta’ pate nger-enger!”
“Aneka kaula buru mare mandhi. Gi’ macco berras.
Samba badha napa, wa! Sela pon towa, lako lok-ologan. Kose padhana se ta’ mare
kerrong!”
“Aneko ma’ bisa songko’ ro’om babur. Bila bula se
entar ka koburan?”
“Buhhh gun gunna pon towa. Loppae se entar ka ke
Japa!”
“Baaa enggi onggu. Dhari bannya’na otang. Buhhh
empon!”
“Tanenge gallu ganeka’, badha se melleya roko’.
Kaula abajanga san-mesan!”
“Tanenge
gallu sakejja’, Su!”
Owa’ roko’na asale’bung eadha’na ban mateggagi
buceng. Lalake’ ganeko nyettho’ kasangnga. Makaloar roko’na ban kore’na.
roko’na ekello’e pole. Dhalem ngerbungnga owa’na ganeko. Aba’na enga’ dha’
ana’na se kapeng tello’, se gi’ kene’, se bakal daddiya paraban, namong sanonto
gi’ buru asakola kellas settong madrasa. Na’-kana’ ganeko pon edhina’agi dha’
man-dhimman. Ta’ padhana tan-taretanna se dhuwa’an. Cebbing ganeko epasra’agi
ka nyaena, saban tan-taretanna se dhuwa’an pon padha akabin ban nettep kona
binena tor pon andhi’ toko e jauwanna keya. ‘Areya sopaja ba’na bunga keya,
bing!’
Maos jugan
- Konye’ Gunong Monggu Kerrong ka Omba’
- Cerpen: Kehidupan Kedua
- Rakara (Naskah Lakon, Anwari)
- Kaju Odhi' Paseser Tasellem
- Carpan: Ngare' Padhi
‘Molae sabban mama’na ban embu’na ta’ kodu nyapsap
dha’ man-dhimman cara reya ja’ senga kalebunna, pamarenta ngarte ngola bangsa,
otamana e polo, jarengan polo jareya ekaballunnagi onggu molae sabban, tadha’
oreng alerek balekka’. Reng-oreng la padha lesso se majanga, se arabadha
sampan. Padha ngetek ngadhebbi omba’. Iya bing, tadha’ sateya oreng se terro
ngolowagi jaring, parao, sampan, sopaja nemmo kaodhi’an dhalem arongan. Tadha’.
Sateya mangkat ka tana manca, la pendha nyata, la bannya’ kaca kebbangnga.
Sanajjan sateya la bannya’ borra mennya’ e se’-tase’ jareya, tape teya ta’ bisa
pa-apa. Ngampong mennya’na ta’ kera eberri’ sacapcap balekkadan, bing! Dhina
sengko’ ban ba’na mandhar nemmowa jalan laen, sopaja paggun padha bunga.’
“Hallo mastoan Japa. Ano ka’dhinto!”
“Sapo rana eka’iyya pon gella’ mangrib. Dinggal
daggi’ mare esa’ telpon pole.” Telpon mate. “Soarana ajunan ga’-pegga’,
mastoan! Ba’ baddiyanna la mate. Kare acerreng!” roko’na gi’ kare satengnga
lencer. “Sampeyan se asholada gallu. Malem pon.”
“Are gi’ mera ebara’.”
“Sokana sampeyanna.”
Lalake’ ganeko mancal ka dhalem. Ka jedding.
Sarongnga eangka’. Akemme. Akela. Audu’. Abajang. Abirit se pendha lanjang.
Adikker. Anyo’on sopaja ta’ paker. Lalake’ ganeko abali ka kennengnganna se
gella’ mola. Toju’ adhang-kondhang, te’-kette’an. Apangrasa buru olle anyaba.
Buru olle anggap dhari sakeng kasona. Molae dhari nyare. Ameneng. Apeddel. Aberri’
panjer. Loppae edhimma se eberri’ panjer. Menta kereme alamadda. Posanga ta’
enneng dhidha’. Bila nemmo barung se kerana badha e penggir jalan tor ramme,
sartana badha baca’an “Dikontrakan” nomerra
se badha eseddi’na baca’an ganeko etelpon, etanya’agi argana. Mare nelpon se
andhi’, tao argana. Nelpon ke Japa.
“Aneka nemmo pole kaula.”
“Dika badha dhimma pon.”
“Aneka kaula maso’ pon. Badha e dhalem.”
“…”
“…??!!?” ngantos!
“Korang nyaman. Tape metorot dika baremma.”
“Aneka pendha arammeyan ban se gella’. Jalanna
odhi’, warga, bengkoan enggi ramme.”
“Sela kottha dika.”
“Baaa enten. Mon se gella’ pendha rangrang keya
bengkoan. Sanajjan kottha.”
“Enggi mon kera nyaman, sreg ka dika, enggi nyaman.
Dina panjeri gallu!”
“Enggi pon!” telpon epate’e. Arembak ban kancana.
“Mon ca’na dika baremma?” etanya’agi mara ganeko.
Kancana nampa cangkem. Nyergu’ roko’.
“Maddha padher-bendheran. Aneko panas. Ma’ gunna
nampa cangkem. Empapeyar mon bula kedhi’.”
“Maddha melle duggan bain. Ngakan. Katonna neko pon
panas onggu. Karembak dhassa’. Pola marena ngenom aengnga duggan. Pekkeran
lorga ban jarna’.”
“Edhimma nyareya duggan.”
“Maddha laju ajalan pole. Daggi’ mon nemmo (mon
badha reng ajual) duggan, ambu. Melle. Enom. Kala’ seppedda.”
“Berra’ dika mon pon lenglang onggu ganeko. Melle
duggan, mare enom aengnga, kala’ seppedda, dugganna ebuwang.”
“Aneko’ pole! Aneko acora’ nyaman keya. Coba telpon
sanape argana. Atanya pole ka Mastoan Japa.”
Lalake’ ganeko maso’ ka adha’anna kontrakanna sampe’
babana ata’na. nelpon Mastoan Japa.
“Ganeko nyaman keya. Mon modha kala’ laju, malle ta’
pate abit. Ta’ panas nape se nyare molae dhulumanna ro.”
“Enggi Mastoan!”
“Aneko tolos se melleya duggan?”
“Enggi addha.”
“Empon, aneko panas onggu. Ja’ lalagiyan! Me’
kadadak!”
“Mare neko. Addha ngakan sakale. Katon bula ban dika
pon padha nemmo. Pon kala’ tong-ebang. Se kerana nyaman ka dika ban ka bula.
Malle lekkas andhi’ barung keya. Malle lekkas etemmo. Mon laju ameneng malolo
neko, tolos. Tolos badha epanassa. Pesse sajan tepes.”
“Edhimma badha pesse kandel. jat tepes, kernengan se
pendha kandel.”
“Buhhh dika. Sela tao nas-panas.”
“Baa enggi sajjana ta’ amelera sakale. Dika kose
taker bilek ganeko!”
“Aneko coma nyopre kabunga’an. Malle na’ poto padha
ban se laen.”
“Enggi se edhajana masjid garowa nyaman. Garowa
kala’ dika. Kan dika nyare se biasana badha partellonna. Bula se eseddi’na
pasar, tape bak ngadhaja garowa. Baremma kerana nyaman.”
“Ma’ jijip parembaganna dika. Dika bila kare acolo’.
Sakaleyan laju paraddu ka eber. Tape mon ebudhi ollena laenan, ja’
ango’-ngo’an.”
“Ganeko kan ca’na mennyanna bang-sebang!”
“Addha sanonto, pasanan. Entare pole. Karembak kodu
majar barempa gallu. Enggi ebajarana kabbi laju nyaman. Kan gella’ menta
dhubellas gi.”
“Enggi se dika dhubellas. Se bula pa’ bellas. Ta’
enneng korang.” Alerek maba. Ta’ agigep.
“Kan padha nemmo dibi’. Dina ja’ ra’-manggera’.
Edina mon bula, dika elang edhinto.”
“Essa korang cellep gi?” Se kadhuwa ngakak!
“Maddha duli
paabi’ dugganna. Pas majari garowa. Malle lekkas mokka’. Aneko pas nyare
rang-sabarang. Sapedha motor, rak-rak, ban samacemma. ga’-nangga’. Aneko gi’
marena neko gi’ ta’ nyaman bu-ambu.”
“Maddha ma’ lekkas ranta.” Kadhuwana mangkat ka
barung kontrakan se bakal ebajari. Dhalem parjalanan, nemmo pole barung se
bakal epakontra’.
“Garowa’ badha pole.”
“Enggi mon etorot, etengguwa kakabbi.”
“Enggi gella’ ta’ etangngale.”
“Dhu bajanape se mokka’a. Badha settong etanya’agi.
Nemmo pole etanya’agi. Enggi tolos gun anya-tanya.”
“Ca’na bula dika me’ ta’ ngoso’an sakale. Acora’
korang cellep es dugganna.”
“haha. Haha.”
Mare majari. Ngalle dhari pangenebban ka barung
kontrakan se anyar. Nemmo se okoran lema’ kale petto’. Jedding badha e
budhiyanna. Ngadhep ka bara’. Settonganna se eseddi’na pasar, okoran empa’ kale
petto’. Jeddingnga pendha jau ka budhi. Abiluk ka kacer sakone’. Dhalemmanna
tello are apongsa nyare rak, kulkas[1]
ban messen rang-barang se bakal ejual. Pellona ngerray.
“Buhhh tapegga tanggi.”
“Mandhar badha’a tambana sossan neko tanggi.”
Akaton pon pendha ranta. Rang-barang pon etata kakabbi. Aba’na mandhi. Akalambi coklat. Sarong thak-kothak coklat, celleng. Ju’-toju’ e adha’na barungnga. Sokona adhang-kondhang. Te’-kette’an. Ko’-roko’an.
Palalangan.
Molot 1442