Konye’ Gunong Monggu Kerrong ka Omba’

Konye’ Sunong sakodhi’ Tor-ator dha’ Taretan Toyu se Ampon Nyerrat Carpan “Kerrong ka Omba’.”

A. SYUKUR GAZALI

Ca’epon ahli sastra se asmana Abrams (Teeuw, 1984), badha empa’ cara ka’angguy adhudhit (membahas) sastra, enggi paneka: (1) ekspresif, (2) objektif, (3) mimetik, sareng (4) pragmatik. Cara se dha’-adha’ ekpresif, manabi se tokang dhudhit angadha’agi pangarangnga, enggi ka’into padhudhitan se abahas carana pangarang nyare ide kaangguy karangannya, carana pangarang nantowagi tema karanganna, carana pangarang ababbar karanganna dhari adha’ kantos lastare. Cara se kapeng dhuwa’ esebbut cara objektif manabi se edhudhit  sadhaja se badha e dhalem tolesanna se ngarang, akadiya bab kaodhi’an se ecareta’agi (topik cerita), oreng se kadinapa se epadaddi tokoh cerita, kadiponapa carana pangarang ake’-rangke’ careta dhari kabidan sampe’ ka bingkeng (plot), ban salaenna. Cara kapeng tello’na enggi paneka cara mimetik, manabi tokang dhudhit namong nyare ponapa bisaos bab kaodhi’an se etendha sareng pangarang, opamaepon kabadha’an e nalekana badha oreng ngaddu ajam: baramma napsona oreng se kala, baramma oreng se abariyagan polana eyoja pulisi se nangkebba oreng se ngaddu ajam. Cara se kapeng empa’ esebbut cara pragmatik, asabab tokang dhudhidda nyare ponapa bisaos essena careta se bisa eguna’agi sareng se maca, kadiya carana alamar babine’ se bakal ekabina, carana ngobu ola’ tanongker se epalala epadaddiya gapper otaba kakapper.

Tolesan se esebbut komen ka’into ngangguy cara objektif. Daddi badan kaula namong aparenga padhudhidan otaba komen adhasar dhari pa-ponapa se epanggi e dhalem carpannepon Mat Toyu.

Carana acareta (Teknik Bercerita)

Paleng bunten, Mat Toyu ngangguy tello’ cara e dhalem ababbar caretana. Cara se paleng bannya’ eyangguy cara narasi, enggi ka’into carana acareta kadhiya aeng agili. Pangarang nyebbuttagi pangadha’na careta molae dhari adha’ kantos mare. E dhalem carpan Agulur, Mat Toyu molae caretana dhari nyareta’agi settong na’-kana’ se abaringsang nyare kennengnganna gagapper se nyaba’ tellorra se pas daddiya ola’ tanoker. Mon nemmo, ola’ tanoker jareya pas eyobu kantos daddi gagapper. Mat Toyu nyareta’agi manda’a sennengnga kana’ gella’ kalamon ola’ tanokerra pas daddi gagapper. Anangeng,bila gagaperra ella raja pas emet-romet moso koceng. Tantona kana’  buru senneng marga andhi’ neng-sennengnga gagapper se bagus kalembangnga. Nangeng, caretana gagapper gella’ etotop kalaban nyareta’agi na’-kana’ se andhi’ gagapper agulur sambi nanges polana gagapper ella mate emet-romet moso koceng.

Ngangguy cara parbandhingan kalaban cara odhi’na manossa (gaya bahasa personifikasi). E dhalem carpan “Kakapper se ajanter” sareng carpan “Sakeng terrona kata’ se atapa’a” Mat Toyu nganggit careta ngangguy tokoh (pelaku) keban, gapper sareng kata’. Mat Toyu nyareta’agi kasangsara’anna gagapper se ta’nemmo panengga’an pola ju-kajuwan ella epamosna moso manossa, egante’e geddhung se tenggi. Se anyama gagapper gella’ sossa parana polana ngabber san-kassannagi tatandung ka geddhung. E dhalem carpan “Kakapper se ajanter” ka’into sanyatana at Toyu madha’pa’ bai’ dhalemma otaba parasa’anna gagapper se aprotes dha’ tengka polana manossa se ararosak dha’ almma dibi’. Batek narosak gella’ andaddiyagi sossana keban sabab ta’ manggi panengga’an. Kata’ ta’ manggi tana se kenneng etedda’ marga tana bulla’ karana esentrong are (Sakeng terrona kata’ se atapa’a).

Cara se kapeng tello’ esebbut deus ex machina, matotok caretana kalaban menta tolong ka Guste Allah ka’angguy mamate, macalaka’, masake’ tokoh caretana, otaba matatemmo settong oreng lake’ kalaban judhuna kalaban ta’ ekasangka. Carpan se ngangguy cara deus ex machina bisa epanggi’i neng carpan se abul-ombul “Adduwan Ajam Agiba pasthe”. E dhalam carpan se buru esebbut paneka, Mat Toyu nyareta’agi settong oreng lake’ tokang addu ajam se buru dhari panabangnga polisi pas ngerrem e kandhangnga embi’na Ji Monentar. Ta’ dumadiyan, pas badha  oreng bine’ se entar ka kandhangnga embi’ gella’ ka’angguy aberri’ pakan ka embi’na. Qodarullah, lalake’ se ngerrem e kandhangnga embi’ gella’ pas kasengsem ban babine’ se aberri’ pakan ka embi’na. Dhing la mole ka bengkona, lalake’ gella’ pas ngoca’ ka oba’na ja’ dibi’na terro abineya. “Sapa se ekabineya?”, patanyana oba’na. Laju lalake’ jareya abala ka’ oba’na ja’ babine’ se ekaterrowe romana e ka’issa, se andhi’ embi´bannya’ ka’issa.

Maos Jugan

• Ojan Tek-karettek
• Lukman: Ngaronge Sagara Madura
• Buku Sastra se Ngaolle Tandha Pangesto
• Tasdid dhalem Basa Madura

E dhalem atena, oba’na akarentek. “Addhu, embana kana’ bine’ jareya lamba’ acarok amoso embana tang panakan; embana kana’ bine’ jareya kala. Cong! Reng towa reya ta’ olle ba-ngeba orosanna oreng towa. Iya! Maju Cong. Maju lagguna se alamara.”

Dhari potosanna oba’na gapaneka, pas daddi lalake’ ganeka akabin moso ana’ bine’na Ji Monentar.

Ngangguy carpan “Adduwan Ajam Agiba pasthe”, Mat Toyu apareng oneng ka oreng se maca carpanna ja’ Mat Toyu  ngogemme otaba  manggu’ dha’ kabudhaja’anna oreng Madura “manggu’ ka pasthe”. Mon lakar daddi judhuna, ta’ kera badha  kakowatan se bisa lang-ngalangi.

Dhalem cara acareta se keng-bingkeng esebbut ngangguy basa bara’ the stream of conciousness monolog otaba acareta ngangguy karentegga ate keng paggun enyata’agi ka dhalem okara, Ponapa’a bisaos se ekarassa, se epekker, se   ekarentek e dhalem pekkeranna pangarang epakaedhing ka oreng laen, pas etolees daddi kalemat-kalemat se nyata. Cara ka’into biasa eyangguy pangarang manca se anyama James Joyce, William Faulkner, ban salaenna.

E dhalem carpanna, Mat Toyu jugan ngangguy cara the stream of conciousness monolog. Opamaepon e dhalem carpan se ajudul “Sakeng Terrona Kata’ se atapa’a

Mat Toyu acareta bab kata’ se tacabbur ka dhalem jugglangnganna WC. Tanto bai e sabban bakto badha  oreng akemme, akoberradhan, ban salaenna. Baramma parasa’anna kata’, apa se epekker, apa se ekarentek? Tantona oreng laen ta’ oneng ponapa se badha  e dhalem pekkeranna kata’, Buru mon pangarangnga aberri’ tao ka oreng se maca’a, buru ekaonenge ja’ kata’ bingung, abaringsang; ngalleya ka kennengngan laen ta’ bisa, nyareya pangeteggan ta´nemmo, buruwa dhari bau laseng, bau baththowangan  ta’ manggi paburuwan. Sadhajana pekkeran, sadhajana bingung, sadhajana kapoteggan namon bisa akarassa dibi’ sareng e dhalem jugglangan.

Ponapa se ekacareta Mat Toyu e dhalem carpanna“Adduwan Ajam Agiba Pasthe”

Bab se ekacareta, e dhalem teori sastra ekoca’ subject matter. Bab se ekacareta e dhalem sastra, tamaso’ carpan biasana oreng-oreng se biasa epanggi’i pangarang e dhalem kaodhi’an re-sa’arena. Nangeng banne oreng se sa-biyasa  se ekacareta, tape oreng se andhi’ pokpara otaba karepodan, opamana tokang addu ajam e  dhalem “Adduwan Ajam Agiba pasthe”, amarga andhi’ otang, settong oreng lake’ ta’ bangal mole sampe’ etokare se bine’, e dhalem carpan “Manceng”, tolong-binolong ngosong kandhangnga sapena tatangga e  dhalem carpan “Sapoterran”, oreng lake se atokar ban binena amarga lakena ta’ gellem nyambelli mano’na ekagabaya juko’, e dhalem carpan “Malappa’anna Mano’.”

Maos jugan

• Ojan Malolo, Nemor Sakone'
• Ojan ban Tombuna Kajembaran
• carpan: Eselpettagi
• Mamare Tolesan

Salaenna acareta bab oreng se andhi’ pokpara, Mat Toyu andhi’ kajunelan nyareta’agi kasennengnganna na’-kana’ kene’, akadiya na’-kana’ se senneng ngobu mano’ otaba kakapper (agulur), na’-kana’ kene’ se eko’-tako’e oreng towana sopaja ta’ entaran ka tase’ pas moso kancana epajarna’ ja’ e  tase’ badha  tentarana se seggut matasellem oreng se entaran ka tase’ (Kerrong ka Omba’).

E dhalem teori sastra, pangarang noles careta andhi’ dhuwa’ tojjuwan. Tojjuwan se kapeng settong terro atotoran (to amuse) bab settong parkara ka oreng laen, opamana carana oreng bine’ dhuson otaba gigir ka se lake’ polana re-sa’are atogu songay alako manceng keng ta’ olle juko’ kalaban ngoca’

“”Dhu sambi ekemma ollena juko'? Mon ta' laten andhi'na sampeyan eketthok apamajar otang. Otang kose bang-kambangan padhana ontangnga ta' nyellem sakale, ta' taselep balakkadan, pasda gallu' kose. Ban sambi ontangnga raja, padhana otangnga raja keya.”

Tojjuwan se kapeng dhuwa’na apareng pangajaran (to educate). 

E dhalem carpan omba’, Mat Toyu jugan parduli ka carana oreng Madura tolong-binolong ka tatanggana sanajjan ta’ eberri’ ongkos. E  Madura, oreng atatolong cokop eberri’ nyegga, kopi, ban roko’. Se ekasenneng oreng atatolong ka tatanggana polana pas tapanggi satatangga’an, agiyak, salang campole, tape ta’ sampe; atokaran.

Odhi’na oreng ta’ andhi’ jugan daddi kaparduliyanna Mat Toyu. E dhalem carpan “Ngantos Lema Ratos”, pangarang kalaban sabbar nyareta’agi kadalatenanna oreng Madura e nagarana oreng se nyare kasab ajuwalan roko’ otaba bensin e penggir embung raja sanajjan ontongnga coma lema ratos ropeya. Maskeya hasella sakodhi’, aba’ kaojanan, tabu’ lapar, kerrong ka na’poto se edina’agi e Madura, kalakowan jareya paggun elakone kalaban sabbar. Polana, ollena rajekke dhari pello koneng langkong berkat (barokah) etembang olle pesse bannya’ tape ollena ngeco’ otaba korupsi.

Kasabbaranna oreng Madura alako berra’ jugan ekacareta moso Mat Toyu e dhalem carpan “Ngenom Pello Koneng”, carpan se keng-bingkeng ka’into nyareta’agi kalakowanna oreng Madura se toman alako berra’. Oreng se sapaneka ambu makalowar ora’,  se alako sampe’ pellona ngababa otaba ngerrai. Oreng bara’ nyebbut oreng sapaneka lakona ekoca’ blue collar job  otaba alako sampe’ pale’eranna celleng dhari pellona se ngababa.

Oreng ta’ andhi’ mon neddha’a osa entar ka pagaran ka’angguy ngala’ rebbung otaba budhu’na perreng se emassa’ pas ekajuko’, osa mapolong co’-konco’anna dhaun se bisa ekagabay gangan. Mon neddha ta’ osa nobi’ juko pendhang polana ta’ andhi’ obang se epakabelliya juko’ pendhang.

Mon oreng lake’ se ta’ andhi’ se epekker mon aroko’a. Roko’na cokop roko’ mesel dibi’ dhari bako ban kole’na jagung; poko’ ngokos. Sala dha’iya, aroko’ ta’ osa ngenom gubi, sabab pessena coma cokop ekabelli berras otaba berras jagung, ta’ mendhang kana se ekabelliya juko’. Napa pole gula ban gubi (kopi).

Badha  pole settong sepatta oreng Madhura se rangrang ekacareta sastrawan Madura, enggi ka’into sepat edhir, otaba sombong, otaba sepat terro eyalemma oreng.

Badha  ca’-oca’an Madura “Tongga’ calorong bakona ampek”, angga’ e lorong bengkona birsek, se ekoca’agi ka oreng se soka’ matao otama mamerragi ja’ dibi’na andhi’ (sogi). Nangeng sanyatana kabadha ’anna ta’ padha’ bi’ se eyedhirragi.

Badha  dhuwa’ sepat edhir: edhirra oreng santre bi’ edhirra oreng dume’.  Mon oreng santre, e baktona tellasan terro asarongan se bagus; mon bisa Cap Manggis. Mon oreng se ta- andhi’ kasombonganna cokop gan roko’. Mon tellasan aroko’ Cap Ji Samsoe ella arassa “agaya”. Tape mon teppa’ ta’ andhi’ pesse, pas ngasak buceng otaba aroko’ se epesel dibi’. Ontong mon andhi’ papir otaba dalubangnga roko’. Mon palang, mon ce ta’ andhi’na, pas aroko’ mesel dibi’ ngangguy kalobut, otaba kole’na jagung. Sakeng dhari terrona ngokosa.

 

Malang, 1 September 2023.

Abdus Syukur Gazali

Guru Besar FKIP Universitas PGRI Kanjuruhan Malang