Lalampan. Rabiul Aher. 1444. Panemor taon mangken
sakejja’ parana. Katon coma langkong antara dhubulan ka tello bulan, sabellun
ganeka ampon epagaradhab kalaban ojan. Powasaan se pojur kalaban ojan para’
sabban are, saenggana ta’ pate panas ban ta’ ahang. (ba’na apowasa keya apa?
Ja’ nyeng-ranyeng atanya! Aroko’ ban ngopi lakar tadha’ gantena). Bakto badha
panas, serdhang, akaton bakal badha bali’na dhadhar, jembar. Oreng-oreng
mangkat ka saba ban ka talon (teggal) kaangguy namen bako. Bannya’ oreng adhabu
(ngoca’) bila nemor, areya biyasana bannya’ oreng andhi’ pesse. Bannya’ oreng
adagang paju kabbi. Sampe’ biyasana oreng alako gabay bakto panemoran.
Namong nemor se sakejje’ paneka, bako bannya’ se ta’
paju, badha se ta’ sempat molong kanan, badha pon lastare epasat kalaban
messin, tape kaojanan, saenggana korang ro’om. Tantona ta’ sakone’ se kaceba.
Bila ojan pon toron ta’ tao ka bakto, tantona lakar kaceba. Tape kodu enga’
sapa se matoron ojan. Sanajjan bannya’ basa ja’ ampon badha ojan gabayan, iklim
gabayan tor sadajana, tape kodu paseggen ja’ ganeka ta’ kera badha artena
manabi lakar ta’ kera daddi. Bannya’ oreng adhabu ja’ aneka ampon maso’ krisis
iklim. Krisis iklim neka pajat mababaja ka odhi’an manossa. Napa pole samangken
oreng mogerra bungka’an sadaja. Akadiya se terro agabaya ibu kota anyar, garowa
pas masobung alas se saraja-rajana, saenggana asababbagi global warming.
Maos jugan
Saestona kalaban badhana ojan se lekkas toron dhalem
taon paneka, bannya’ tombuwan se odhar, bungkana jate ta’ sampe’ makorpas
sadaja dhawunna, bannya’ tombuwan se lekkas atonas, apopos, saenggana oreng se
nyareya pakanna embi’ gampang, ta’ sara. Saestona banne coma manossa se rekong
bila sobung dha’aran (sanajjan ampon badha se ngator). Sadaja mahlok jugan
dhalem kabingungan asabab keban tor sadaja mahlok aromasa gadhuwan dusa jugan,
aromasa sala, ja’ senga ta’ sala otaba ta’ dusa, tantona ta’ kera badha settong
kajunelan se magettonan.
Tanto padha terro bunga ban jembar, maske dhalem
bakto abit ta’ kellar melle talena sandhal ban ta’ ngobai salebbar, padha.
Paggun padha terro bunga ban jembar. Tadha’ oreng terro sossa odhi’ e dunnya,
se nyamana kaodhi’an paggun ta’ kera lopot dhari sossa, seyal. Lakar kodu
nyongsang nyonglet, tacellet e cellot keccem to’ot. Kalaban badhana ojan se pon
toron paneka, tanto pangarep bannya’ se tombu, molae dhari tombuna bungka’an se
dhawunna kenneng ka bundu’ napa bai, molae kana jate se dhimen lakar daddi
bundu’na juko’, samangken ampon eobai daddi plastik, plastik ta’ bisa ekael
sareng bume, saenggana paggun cekka’ ta’ aoba. Jaman se pon aoba, namong tengka
gulina manossa paggun. Ta’ aoba.
Kajembaran macem napa se pon tombu kalaban badhana
ojan paneka. Oreng-oreng se bakal atamen oto’, padhi tor jugan jagung ampon
arembang tanana, tantona ampon badha se ngorep enggi paneka sopaja tombu bines,
bila pon ojan sajan kerrep, bines raja, saenggana epanja’. Oreng-oreng bakal
mangkat ka saba, ka talon kaangguy nyarbu sopaja tombuwanna jurbu, ebuthok.
Dhimen bangaseppo sabellun atane, talonna ebar-obbari pa-sarpa sopaja daddi
dhu-landhu, ta’ agantong ka buthok. Kadhang jugan buja etabur epadaddi buthok.
Sabarinto keya oreng namen bungkana nyeor, ebuthok kalaban buja sakoleleng
bungkella kana nyeor. Kalaban ebuthok, elandhu pangarep sopaja tombuwan jurbu,
abuwa lebba’, buwana bagus tor daddi kasamporna’an.
Saka’dhinto pamator, samoga daddi gu’-ganggu’ se
malemmes pekkeran, ora’-ora’ se tanyeng bisa kendhur, panyake’-panyeke’
ngarennyeng bisa ondhur, se ta’ akor sopaja daddi lebur. Ja’ kantos loppa
sopaja paggun asokkor.
Maos jugan