Ngacapak, akantha calatthong ngolpa dhari buri’na
sape. Ngacepek ta’ ambu sakale, ngacopok ka sapa bai ban ngacepper akantha
mano’ koju’ songko’ lapar tadha’ makane dhalem korongnga. Jilana ngolpa. Copana
ngoncelat. Nampes.
“Ba’na epasakola tenggi, malle tao ka babala’an.
Banne acangnga’ ka reng toa.”
“Kaula ta’ acangnga’. Kaula coma terro ajaga’a tana
sangkolanna mama’ se pajat soro jaga ka sampeyan, se pajat soro ladine, kaemba.
Samangken ejuala ka kancana kalebunna. Polana sampeyan semma’ ka kalebunna, ban
kalebunna siap nyombang terop, sound ban koade bila parlona sampeyan.
Napa gunana daddi bangaseppo, reng towa mon ajual
Tanana sangkolan sopaja bunga kadibi’an. Malle eabas oreng. Malle eabas andhi’
se ekabandha’a alo-parlo, apot-repot ban alako gabay. Sanapa kale colo’ kodu
kecca’ ka bangaseppo dibi’. Bangaseppo se ta’ endha’ epaenga’ na’ potona.
Sapa se ta’ terro bunga’a. Sapa se ta’ terro eabasa
bala tangga. Polana enga’ kaula ban sampeyan, padhana embu’ kantha garowa, . .”
ta’ ekarassa aeng matana nyapcap dhari padduna matana. Bibirra nyembi nangale
embu’na nyandhadhut ka labang nampa cangkem. Jebbing se ngatalbes oca’na ka
eppa’na ganeko ta’ mangga bila ngeding serrona embu’na.
Maos jugan
- carpan: Ojan Tek-karettek
- Ajuwal Live
- PERHATIAN ORANG BAWEAN TERHADAP SELAWAT
- Carpan: Ngare' Padhi
- Jamal D Rahman Maos Carpan
“Sengko’ terro ma kapra’a ba’na, Bing. Malle ba’na
ta’ todhus. Malle ba’na padha ban babine’ laen. Paju lake, eparloe, ngonjang
sound, terop, kowade, sakeng malle ba’na ban babine’ laen, ban tan-taretanna,
ban la-balana. Egabayyagi roma malle neng dhiya. Tape ba’na sateya la penter.
Penter ngacepper. Penter abales pantunna reng toa.
Ajual tana banne sakeng polana parlo ka pessena, se
ekabandha’a gabay. Banne. Sakeng embana sengko’ ka ba’na, agabay roma, malle
ba’na nyaman neng-neng. Bannya’ sateya reng bine’ penter. Tape mosse’. Akantha
ola’ lenteng. Masennep! Aorsa’ana bila ngabassagi. Ressem. Sennep. Ngabassagi.”
“Dina ja’ abas. Meddem!”
“Nyaot gi’an. Ekentemma colo’na!”
“Nyaman! Malle aegem!”
“Mara! Nyaot sakalen laggi’. Malle ernes kabbi
colo’na ban gigina.”
“Nyaman terrossagi.” Jebbing ganeko ajuluwagi
colo’na sajan semma’. Tanang eppa’na pon semma’, sakeng etahan mon binena.
“Todhus ka bala tangga mon lako akareggingan.
Todhus. Na’-potona pon raja. Sampeyan kodu ajar la-ngalae. Apekker. Maca
salabat. Aporaalla. Nyo’on jau dhari balai. Parlona pon para’. Mon e dhalem
sajan gisru. Reng e loar, tatangga se baji’ sajan baji’. Sampeyan kodu
la-ngalae.” Binena ngacopok ka Sakelem se napoga ana’na bine’na.
“ba’na keya. Neng-neng bain. Ja’ lajjai eppa’na.
malle ta’ sajan enger. Ma’ lebur alajjai. se baras la-ngalae. Mon gi’ ba’na
alajjai. ya padha pasan.
Maos jugan
- Penderitaan Manusia Diawali Ketika ia MerasaMemiliki
- Eja'an Dhalem Basa Madura
- Nyapa Oreng Aroko'
- Carpan: Lomok
- carpan: Mamat Terro Nompa’a Jaran
“Mon eppa’ jareya ta’ epaenga’. Jareya sajan daddi.
Sajan sara pateppa’anna.”
“Sajan bannya’ tana ejual mon kalebunna. Kalebunna
ngala’ nyamanna dibi’, melle modha ka ra’yadda dibi’, badha se ta’ ebajari,
ekala’, jat ta’ ejual. Keng eangguy dibi’ pas. Edhina. Bila eparkara’agi.
Ra’yat alaban rato ekowa.”
“Ra’yat eda’-didda’. Enyek-enyek. Menta kaneserre.
Tape ta’ neser sakale ka ra’yat!”
“Ondhur ba’na, Bing! Ondhur!” eppa’na ngoja dhari
dhaporra se pon epajau dhari ana’ bine’na.
“Ondhura jat. Ondhura sanajjan ta’ esoro. Kaula coma
ekaana’, tape ta’ ekaemba sakale. Ondhura jat. Kaula ondhur ta’ usa re-sare.
Ta’ usa kaemba pole.”
“Ondhur. Sennep ngabassagi jebbing ta’ ekenneng
kaparlo sakale.”
“Dina ja’ edhingngagi, Bing. Mon ba’na ta’ emba ka
sengko’ sakale. Sengko’ odhi’a ban sapa pas, Bing. Ella ja’ ondhur, Bing.
Sengko’ nyongkemma ka sokona ba’na, Bing, kor ba’na ta’ ondhur, Bing. Ella,
bing. Saporana sengko’, Bing. Ta’ langkong, Bing, Ja’ ondhur bing. Sengko’
nyongkemma, nyeoma sokona ba’na, Bing.” Oca’ embu’ sambi agellu’ bettessa
ana’na. asojuda. Keng etahan mon ana’na se paggun nyembi ban ngalocor aeng
matana. Embu’na epajaga. Manjeng. Ngosap aeng mata embu’na. alu’-gellu’.
‘Pasabbar. Kodu koat nahan aba’. Napso ja’ lajjai.’ Embu’na ondhur ka dhapor.
Jebbing badha dhalem kamar.
Sakelem. Eppa’na Jebbing. Entar ka palemper.
Ngello’e roko’. Ta’ kowat mekkere kabadha’an, terro bunga, namong rengsa se
badha. Tadha’ tonggang balina. Tadha’ tebbassa andhi’ na’ poto. Palang onggu.