Nyapa
ban-aban
nyare tanongker
lem-malem
pas soker
ajalapa
ta’ nanto ja’ tanongker
ta’
nyapa banne keng soker
ta’
nyapa e dhapor
pangedhingan
pon ta’ dhapor
ta’
nyapa e somor
pekkeran
pon ngalemor
ta’
nyapa e lorong
ba’-aba’an
pon rekong
nyapa
saologan
tandha sapa
matoro’
aba’ manna nespa
sapa-nyapa
a’,
wa’-uwa’, oca’ ta’ salpa’
tandha
pangesto pon dhapa’
bila
ta’ saleng sapa
aba’
ta’ ebikes, taneyan dhimpa
parembagan
ancor, ecapo’ tola
sapa-nyapa
ajaga la-bala
Labbuwan, Sappar, 1442
Maos jugan
- Teks MC Bahasa Madura
- Lalake’ Pajat Ta’ Kowat
- Bulan Gerring Pesse Panas
- Carpan: Lomok
- Carpan: Ngare' Padhi
Embi’ Celleng Ji Monentar
embi’
celleng ji monentar
odhi’
melleng pekkeran pon ta’ kellar
embi’
agambi’ sambi bi’-nyambibi’
adharak
pelka’ bi’-kadibi’
embi’
celleng ji monentar
atharat
adhadhatthar
nyare
aeng buja accen
gerrongan
sopaja lecen
ngenom
aeng lerre
co-baccoanna
berras pote
malle
gampang re-nyare
sabellun
abundu’ labun pote
embi’
ta’ endha’ etaja’
ka
rebba nyenna
bali’
agambi’ karebba dibi’
Labbuwan,
Sappar, 1442
Kerrong ka Omba’
alanggoy
ajaga aba’
asapo’
angen abantal omba’
dhari
sagara ongga ka dara’
dhari
temor nojju ka bara’
dhari
dhaja aenter ka lao’
apongsa
maelanga sossa
kalaban
omba’ sa-tagersa
sossa
apongsa ta’ ekarassa
ontong
bunga tadha’ batessa
toron
dhari attas angen
nojju
pekkeran dhalem
se
agumbek dhalem pangara ban pengaro
toron
lebat galadhak
parjalanan
panas ban kadadak
sanajjan
sampan-sampan paggun nambak
tape
bannya’ paretongan ta’ ekarembak
omba’
kare ngamba’
asadhiya
pangesto se lendha’
kerrong
ka omba’
jarring-jaring
pon esaba’
epagantonganna
aba’
Labbuwan,
Sappar, 1442
Pakakas
manossa
agabay pakakas
malle
bisa mokka’ alas
jalan-jalan
bisa erabas
tegar,
legga ban lebur eabas
kalaban
pakakas
alalakon
ta’ dhalangngas
bibika
ban abikes, ta’ bas-narabas
pakakas
bisa aropa landhu’
nanggala
sopaja tana landhu
pakakas
ajalan
mon
lamba’ nompa’ jaran
mon
samangken apoter ngangguy ban
pakakas
modern
dhari
messin, tipi, hapi pas amonye keren
Labbuwan, Sappar, 1442
Maos jugan
- PERIBAHASA MADURA
- Akhir Sebatang Pohon Gayam
- Sanja' Taresna, Helmy Khan
- Kaju Odhi' Paseser Tasellem
- Joe Mawar, Pangarang Tor Ustadzah
Aroko’
bula
paggun aroko’
sanajjan
pamarenta ko’-matako’
kalaban
gambar tho’-baratho’
le’er
mandhugul ra-bara oto’
tape
pessena roko’ paggun ekeco’
ekakan
pamarenta daddi tamanco’
bula
aroko’, sopaja dhai ta’ marongo’
bula
aroko’, malemmes tolang marena arotho’
bula
roko’, nyolet aba’ malle ta’ ango’-ngo’
maske
elarang aroko’
bula
paggun ngello’e roko’
sopaja
akaton badha se etongngo’
ngoja
rengnge’ se ngaromo’
bila
ta’ andhi’ roko’
kadibi’an
ngo’-mango’
bula
paggun aroko’
sanajjan
batho’ ngakarotho’
sampe’
kelpong colo’
bula
paggun aroko’
ta’
nampek ka tako’
Jaba
Tengnga, Indonesia, 1437
Metto Are
nemor
kara, tana-tana kerreng, balarak, kolaras ngartang
somor-somor
kerreng, songai-songai ta’ agili aeng
tandon
kosong, kran-kran compet
closed-wc
tasompet bu-rombu
buceng,
rambing pembalut, ban plastic
metto
are, tombu pangara
alorju’
dhalem pangaterro
tanang
kangan neggu’ cantheng
tanang
kacer possa’ sabun
tadha’
aeng, ta’ bisa akela
nyare
bato se padduna lembu’
sopaja
bisa socce
Labbuwan,
Sappar 1442
Mat
Toyu aropa’agi lalake’ se nettep e disa Karduluk Paragaan Songennep, Madura.
asal epon dhari Longos Gappora (Songennep jugan). Pangarang buku Empa’ buku
Embi’ Celleng Ji Monentar (Halaman Indonesia, 2016), Kerrong ka Omba’ (Sulur
Pustaka 2019), SOKANA (APM-KOMAMEDIA, 2020) tor NGEJUNG (Sulur Pustaka, 2021). Bukuna
se kapeng dhuwa’ (Kerrong ka Omba’) sareng kapeng empa’ (NGEJUNG) ngaolle
tandha pangesto Sastera Rancagé, dhari Yayasan Kebudayaan Rancagé e taon 2020
tor 2022. Alumni UIN Sunan Kalijaga paneka pajat lebur noles molae gi’ asakola
e MTs-MA Mambaul Ulum, namong ampon ajar noles molae gi’ kellas settong
Madrasah Ibtida’iyah Taufiqurrahman. Mon ta’ ajar noles molae gi’ MI, tantona
ta’ kera tao ka lip-aliban balekka’.