Lan-Jalanan Ka Kottha Sumenep || Maulidya H. Rahman
"Baramma rassana alan-jalanan ka kottha Sumenep?"
E baja laggu, e settong are pa'-reppa'na mata gi' katondhu,
teppa' sabellunna bulan Powasa badha tang kanca se dhari Polo Jaba atanya ka
sengko'.
"Iya, lebur.
Bannya' macemma kakanan ban bangonan kona se kantos sateya se lebur
ebassagi. Ta' manglo mon tang Kottha ngaolle sebbudan "The Soul of
Madura"." Saodda, sengko' kor metto, sanyamanna.
"Insya Allah, engko' terro amaena ka dhissa',"
saodda kanca jareya sambi nerrosagi parembagan.
"Iya, mara duli, edhantosa, ya. Parlo ba'na kataowe keya.
Sumenep reya bannya' tana paseser. Pola ba'na lebur alangngoy ban amandhi e
penggir tase'."
"Iya, engko' pajat lebur enga' jareya."
"E Sumenep, badha keya kennengan kaangguy matennnang ka
ate. Nyaman kaangguy ngamba' are se nyellem ka bun bara' otaba ngamba' are se
gi' buru metto e baja laggu, sunrise rowa, maksodda." Saodda sengko'
ngarep tang kanca amaen e budhi are.
***
Mon oreng lowar Madura, tantona lebur alan-jalanan e tang
Kottha. Badha paseser Lombang, paseser Slopeng ban polo-polo laen se kaonang
daddi paanaban asre tojjuwan wisatawan amaen ka Sumenep. Akadi Polo Gili Iyang
ban Polo Gili Labak.
Maos jugan
- Oca' se aguna'agi akantha tor parsasat
- Kamus Bahasa Madura Ejaan Baku (1973)
- Puisi Madura:Cangka Asela
- Esai:Sakola’an Tombu Nyenna
Marena adha-kandha ban tang kanca. Engko' epakon tang ebu'
kaangguy ngaterragi nyae abalanja ka Pasar. Teppa' e baja para' sar-asar maba
jareya, engko' ban nyae mangkat abalanja ka Pasar. Kaangguy nyadhiya’agi
kaparlowan dha'aran buka powasa. Tang nyae dibi' se mele pa-apa se ekabuto.
Sabatara, engko' coma toju' ngantos e Sapedha motor. Saellana mare ngobange
parabut se ekaparlo kaangguy emassa' e dhapor, engko' mole dhari Pasar Anom.
E parjalanan, kabadha'an tantona la bak sella'. Tang motor
para' etabbra'a rombonganna ngangodhadhan se lebur nompa' sapedha motor
modifikasi. Ra-kera omorra akadi na-kana' kelas ennem Esde kantos kellas
settong SMA. Sapedha motor se etompa' katonna etangale tadha' spionna, monyena
knalpodda enger, aguweng sanyamanna dibi' ban sabban sapedhana etempele stiker
nyamana komunitas sapedha motor.
Masya Allah ... Ongguwan engko' takerjat, tang nyae padha
keya. Bila ngedhingngagi sowarana knalpot sapedha motor. Sowara jareya gi'
paggun ngacoweng ka kopeng.
Ngabassagi ngangodhan jareya. Badha se akentelan bi' pacarra.
Se bine' obu'na perang, kalambina acora' ta' mendhang ka badanna. Ta' notobi
badanna ban nyalenda dhari biyasana. Se lalake' obu'na acora' padhana landha',
noccer ka attas. Lalake' jareya ngangguy kalambi se abarna celeng ban kaoladan
la pellay barnana.
"Ontong gi' buru ta' etabrak," serrona sengko' se
dhalem ate. Tang nyae aserro keya keng cora' mamadul.
***
Maos jugan
- Pidato: Pabinareng tor Ngobbar Gumate
- Carpan: Andharun || Helmy Khan
- Ejaan Dalam Bahasa Madura
- AH Hasmidi Lebur ka JokPin
Sa ellana mare abuka powasa, malem jareya sengko' bu-ambu
sakejja', manyandhar tang badan ka geddhung e amperra roma.
"Dhu, kobassana," saodda engko' dibi' e dhalem ate.
E bakto jareya, pa'-reppa'na angen lebat abay-kerbayan e adha'na mata.
Saellana engko' ajalan nojju dha' settong masjid se biyasa
kaangguy atarawih. Pangabassanna sengko' gaggar dha' settong geddhung se gi'
anyar, bangonanna raja ban ce' tenggina.
"Dhu, reng-oreng e abassagi padha adhalumban antri
kaangguy maso'. Ropana bannya' keya se ta' atarawih."
Engko' coma neggu' dhadha e bakto ngabassagi kabadha'an
reng-oreng e jaman sateya. Se wajib kadhang ta' elakone. Sabatara, se parlo ta'
parlo se bisa elakone e laen bakto. Elakone baja sateya.
"Bur-leburan, nyamana ca'na."
Ja' senga' ta' lebur alan-jalanan, tantona engko' ta' kera
ngataowe kabadha'anna odhi'na ommat manossa e kottha reya.
Sumenep, 17 Maret 2026
*Maulidya H. Rahman aropa’agi moret SMP Integral Lukman Al-Hakim Sumenep, kellas ballu' B.