Asslamu’alaikum
warahmatullahi wabarakatuh.
Hadratal
muhtaramin, para keyae, para alim ulama, para tokoh masyarakat; wa nakhussu
bizikri: almukarram KH. …, almukarram K. …, jugan se badan kaula ta’dzimi sohibul
wilayah, kalebun disa …, tor sadaja para rabu (onjangan) se badan kaula
amolja’agi.
Alhamdulillahi
rabbil alamin, wa bihi nasta’inu wa ‘ala umuriddunya waddin, wa ‘ala alihi wa
sohbihi wa man tabi’ahum bi ihsanin ila yaumiddin, amma ba’du.
Aropa’agi
ator kabidan, menangka pamoji sokkor dha' ajunan epon Allah SWT, amarga baja are/malam
mangken badan kaula sareng ajunan ekarsa apanggi tor alenggi e ka'dhinto
panggunan dhalem kabadha'an sae tor same jumambar, kalaban edi Dzat se Maha
Socce tor Maha Agung. Nyambadani panyopre dhari sohibul hajah, bapak/haji … sakaluwarga,
se ka'dhimma maksod sareng tojjuwan ngatore rabu tor longguna ajunan, enggi
ka'dhinto ngemmes du’a barokah kaangguy ale' Cebbing (pangantan bine’), se
badhi alampaagi aqdun nikah sareng bakal rakaepon ale’ (pangantan lake’).
Solatullah
wa salamuhu ngereng cabissagi dha' nabi pongkasan, nabi Muhammad, Guste toladan
umat, se ampon angasteng badan kaula sareng ajunan minadzulumati ilannur dhari
pettenga alam jahiliyah nojju dha' alam se tera' dhari sonara iman sareng elmu pangaonengan.
Menangka parenteng
lampa, badan kaula nyo'on edi kaangguy ngatoragi ajuman tareka se badhi
kalampan baja are/malam mangken:
1.
Kabidan, ka'dhinto al iftitah bi
ummil furqon.
2.
Renteng tareka se kapeng dhuwa',
enggi ka'dhinto rukun syariat aqdun nikah,
3.
Esambung kalaban pamaosan
solawatunnabi se aropaagi ajuman tareka kapeng tello'.
4.
Renteng tareka se kapeng empa'
ka'dhinto dhadhabuwan se aropa sambutan-sambutan,
5.
Tor tareka lampa ka'dhinto badhi
epongkase kalaban pamaosan du’a.
Hadirin,
para undangan se badan kaula amoljaagi.
·
Ngabidi tareka se kabidan, badan
kaula nyo'on soddi tor ehlasepon kaangguy nyeppowe pamaosan al iftitah bi ummil
furqon, salera epon se molja (KH. … … …) Bakto sareng panggunan kaator. (Malar
mandar, kalaban pamaosan ummul furqon, renteng tareka se badhi kalampan
tabarenga sareng rida epon Allah SWT.)
·
Ngabidi tareka kapeng dhuwa' se
aropa prosesi aqdun nikah; dhalem pelaksanaan rukun syariat epon, badan kaula
pasra dha' Petugas Pencatatan Nikah Kantor Urusan Agama Kecamatan … Bakto kaator. (Alhamdulillah, aqdun nikah
ampon essah metorot hokom syariat jugan hokom nagara. Malar moga kalaban baroka
du’a dhari para rabu sadaja, langkong-langkong baroka du’a dhari para
masyayikh, aqdun nikah se ampon kalampan edaddiyagina aqdan mubarokan ma'suman,
tor pangantan se kadhuwa atong rokon, andhap asor, daddiya judhu baris, judhu baras,
mora rajekkena, sakinah mawaddah wa rahmah, rajja bajra parjuga, rampa' naong
baringen korong kantos atongkat roman. Aamiin ya rabbal alamin)
·
Saterosepon pamaosan
solawatunnabi badhi epandu sareng ... Bakto kaator. (Malar mandar badan kaula
sareng ajunan sadaja tettepa epasthe kengeng syafaat Rasulullah fiddunya wal
akhirah)
·
Ngabidi tareka dhadhabuwan,
ka'dhinto sambutan pamasra'an, aropa okara panyambung. Badhi eatoragi sareng
roisul kafilah dhari komantan lake'. Esambung kalaban sambutan panarema'an
aropa okara panyambit, badhi edhabuwagi sareng ajunan se molja: KH. … Bakto
kaator.
·
Mongkase tareka lampa e baja
malam ka'dhinto, badan kaula nyo'on soddi sareng ehlasepon kaanguy pamaosan du’a
salera epon se molja:
Sadaja
renteng tareka ampon samporna kalampan. Badan kaula menangka bakkel dhari
sohibul hajah, ngatoragi songkem pangesto kalaban esto dha' ajunan sadaja.
Malar moga kengenga balasan se langkong samporna monggu Allah SWT. Malar moga
eparengna same baras salamet, tekka hajat dunnya akherat, berkat omor tor
lanjang partobadan. Badan kaula menangka pangajum tareka, sanaleka kapanggi
sala tor lopot, tendhak tandhuk se korang sonduk, ajuman okara se korang akor,
sola ator se korang tata ator, dhari ate se paleng asor, saebu duka nyo'ona
pangapora se sobung bates epon.
Wallahul muwaffiq, ila aqwamit toriq. Wassalamu alaikum warahmatullahi wabarakatuh.
