“Bula
terro ngabasa kompoy! jarengan dika keyane ta’ ekabareng amaen ka bengko!”
oca’na pamanna Sakelem se pon dhateng epareppa’na ra’-tera’ tana. Lalake’
ganeko jekjek kalaban roko’ kalobudda. Pa’-lopa’na badha dhalem Jaz cellengnga.
Asarong bathek kembangan. Asandal japet. Asongko’ celleng. Okos kalobudda
ngebbul ka adha’, aenter noro’agi angen.
“Aneka
pon kaso, Man!” Oca’na Sakelem ka paman tello popona se pon abit ta’ emaene
eteppa’na tellasan. Sakelem
e bakto ganeko aberseyan taneyanna, tabun bara’ taneyanna. Karana badha sarpa
se gaggar. Saestona Sakelem kare asoro oreng se pon bannya’ badha gadhiya.
Bakto ganeko, Sakelem
asarongan thak-kothak. Akalambi celleng leres. Asongko’ celleng. Asandhal
japet.
“Ngereng
alonggu. Aneka matotoga (sapoan) sakone’.” Oca’na Sakelem se asapoan kalaban
nokong. Taneyanna sakelem
pon ranta etata. Kalongguwan
tamoy lake’ ban tamoy lake’ pon epesa. Tamoy lake’ ebakto akad nika elama’e
kalaban madane
koneng, agambar kembang-kembang. Kembang raja etengnga’ana. Badha se agambar
bangunan-bangunan towa, tape abannya’an agambar kembang-kembang.
Pamanna
Sakelem pon abit onggu ta’ atemmo. Karana Sakelem majau abine. Mon gi’ ngodhana,
Sakelem gasek noro’ alako pamanna. Kadhang mowa’ nyeor ka pan-barempan polo se
badha eseddi’anna Madura. Mowa’ pao ka dhajana Madura. Mowa’ jarangkeng. Mowa’
jagung. Kalaban sampanna. Ongga (alajar) ka Tana Jaba (temor) entar ka Moncar,
Carron, apeddel ka tana Using.
Nyare aeng sacapcap, se bisa mabacca kerrengnga gerrungan. Sakelem pon esoro
abine e Jaba, tape Sakelem ta’ poron. Aromasa jau dhari mengkangnga dibi’.
Sakelem apangrasa, mon abine se kodu entas tase’, aba’na ta’ bangal eng-aengan,
nape pole omba’ se ondur-dhateng. Kadhang nyalendem, nyaleot agiba pate. Tor
kadhang maleccot agiba pasthe. E Madura, kalaban badhana polo-polo kene’ se
badha eseddi’anna, tantona pon biasa akabin antar polo. Edhimma pangantan biasa
ebuwa’ tor eereng kalaban sampan-sampan.
Maos jugan
- carpan: Eselpettagi
- Carpan: Ngacepper
- carpan: Garangan Compet Are
- Ajuwal Live
- Okara Kakanten Basa Madura
Sakelem
pon abit ta’ atemmo kalaban pamanna molae aba’na emo’ kalaban na’ potona.
Biasana san-tellasan gi’ sempat nyabba, ca’-oca’an sataon sakaleyan. Kaena
Pamanna Sakelem neko sataretan pon-popon kalaban eppa’na Sakelem. Nape pole
oreng kona neko. Ta’ majau makabin na’ potona. Badha polana akabin sabala’an se
biasa kasebbut kalaban mapaju daganganna dibi’. Neko mattowa wit kae dha’
mantona. Tantona sabala’an ganeko pon apeddel-peddel, tantona pon kengeng
ekabin metorot agama. Badha jugan lake-bine se a wit taretan-majadi’. Padhana e
settong bakto Sakelem edungngenge mama’na. Ka pamanna se entar laggu ganeko a
wit paman, tantona ka binena Sakelem ngoca’
bibbi’. Tape mon etorot dhari tan-taretan bine’na nyaena Sakelem. Sakelem ka
Bibbi’na ngoca’ nyae. Karana padha enneng.
Sakelem
nyare babine’ loar, se banne taretanna dibi’. Eteppa’na are pasaran, Sakelem
ajuwala darana, Sakelem ka budi-budi lebur ka sap-saban. Bannya’ ngobu dara.
Sanajjan lako egiggiri mon reng towana, tadha’ ta’ pate ebikes. Ngobu ajam
adduwan bannya’ keya. Are pasaran ganeko, Sakelem nengngale paraban. Molena
dhari pasar, Sakelem noro’e molena paraban ganeko. Seddheng tao ka kampongnga,
kalagguwanna Sakelem
nyare mano’ keteran.
Kalaban nyambi tenggar. Abareng kancana. Bakto ganeko bannya’ oreng aseol neroe
monyena keteran. Kateppadan
bannya’ keya dara. Monyena sabangan. Monyena dara apapagger. Ebbu’ lar-nalar ka bungkana
nyeor. Tabalusok.
“Edhinto
sanonto keteran pon kare
sakone’.”
“Enggi
aneka bas-ngabas lebunna sambi, man.” Oreng se ekoca’e (paman) Aneko oreng se atowa’an. Ngoca’ paman,
malle ta’ mapas.
“Egiba’a
ban lebunna gi?”
“Ba...
enten. Ma ta’ laju osong ban lebunna. Gi etenggu gallu, man. Pola rowa badha.
Napa’ gi’ kabajar.”
“Acora’
pon metter bunto’.”
“Bila
pon agalebbes ganeka gampang dulanganna.”
“Pelak
ka kakan pon cong!”
“Ta’
gane kana.” -para’ taloccora ngoca’ gathengkona (karana biasa ameler otaba
malopot (pleset) ka ganekona- oca’na Sakelem lelere.
“Edhiya
turbakbak, pendhanan
gi’an cong.”
“Ekagabaya
napa turbakbak. Ereken
ekajuko’a.”
“Enggi
pola rowa karaddu ka eber.”
“Mon
kaeber neka ta’ nanto, Man. Jarengan kadhang carang epalappae nyaman keya.”
“hahaha...
enggi, cong. addha dika nyepperra ka bula.” Oreng ganeko ngare’ e teggalla. Pon
olle sapeltong. Moleya.
“Ampon,
Man. Aneka pon para’ sorop.”
“Ma
ta’ maddha nyepper gallu. Le olle ngenom aeng.”
“Aneka
sobung olle keteran balekkadan, Man!”
“Enggi
dina.”
Molena
nenggar, nyare keteran se ta’ enneng mano’ keteran. Sakelem olle laen. Ta’ abit
dhari ganeko Sakelem akabin ban binena. Narmeya. Sakelem nyambi renjing ban
pekolanna sopaja bisa ngangko’ calatthong sabban laggu. Nyello’ aeng pon
sanggup. Sanajjan bannya’ oreng ngoca’.
“Kona
mattowana ja’ gunna nyello’ aeng. Mattowana banne daba’.”
“Badha
kona mattowa reya ja’ lako tedung malolo. Ma ampo (dujan alako), manna eoja.”
Sakelem epasenga’ bannya’ oreng sabellun akabin kalaban Narmeya.
“Manna
eoja mon mattowana. Manyaman kona oreng, jur-ngonjur to’ot. Ma’mur pancasila
ekowa, mattowana ajemmor, mantona akela.”
“Kaenga’e
sambi. Badha kona oreng. Gi’ laggu asapoan, nyello’ aeng, mon andhi’ embi’ ya
nyare rambanan. Mangkana ba’na epagibai renjing, malle ngangko’ calatthong ka
teggalla mattowana.”
“Esanggu
nyaman oreng abine. Kodu alako. Binena pakane.”
“Ya
mon gi’ ru-buru. Ta’ andhi’ jamu, otaba ta’ andhi’ tellor, emelleyagi mon
mattowana, malle gampang se akemmeya. Ya sambi malle ngora’ se alandhu’a.
Pangarte sambi, cong.” Babala’an
ganeko pon egi’-gigi’ sabban are sabban malem sampe’ alos. Sampe’ ta’ ekarassa
antara ampas ban pathena. Ta’ kera kare pas-tagerpas, paggun badha pasthena.
“Dika
badha edhinto, ta’ kera ekamanto, eanggebba na’ poto dibi’. Ta’ kera
ekaballunnagi. Pon laju atana’ sabban lagu. Ja’ dhus-todhus.” Oca’na oreng toa
bine’na Sakelem ka Narmeya. Narmeya coma mesem. Mattowa bine’na Narmeya
apantun:
Bungkana
jagung erabasa
Etana’
campor nase’ pote
Andhi’
manto lebur ekarassa
Along-polong
sampe’ mate.
San-bisanan
ganeko padha saleng abungae. Sakelem bajeng alako. Dujan alako. Ngabbiyagi ka
ora’na. ta’ maroco sakale ka Mattowana, asabab mattowa aropa’agi reng toa se nomer
tello’, samarena reng toa dibi’ ban guru. Mattowa apareng kajembaran.
San-bisanan ganeko padha saleng sambung ban saleng abas. Bila tan-taretanna
Sakelem badha se kapateyan, otaba lo-parloan. Mattowana Sakelem dhapa’ ban
tan-taretanna, giyuk. Bariya keya sabaligga. Ngabas ka ngabas. Kateppadan kaena
Sakelem andhi’ taretan
sasanga’. Saenggana taretan sapopona Sakelem bannya’. Dhari ngabas ka ngabas,
saenggana padha entar, padha ngestowagi. Kalaban oca’ padha terro ngabasa,
padha terro taowa. Mon taretan nespa, ngedinggagiya serrrona balekkadan. Mon
taretan bunga, terro ngabasa kabunga’anna. Otamana bila badha kanespa’an. Padha
terro ngabasa. Padha terro taowa.
***
Maos jugan
- Carpan: Edina Akabin
- CARPAN: MANCENG
- Ngala' Owanan ka Ji Tahir
- Teks MC Bahasa Madura
- Okara Kakanten Basa Madura
Gi’
laggu monyena long rentengan ngacetthol. Tandha pangantan lake’ pon dhateng.
Pangantan lake’. Asongko’ celleng. Akalambi pote. Ngangguy Jaz barna coklat.
Sarong cokelat ngodha. Bathek kembangan. Pangantan lake’ ganeko dhateng kalaban
nompa’ motor. Tello motor. Samotor pangantan lake’ kalaban pangerengnga.
Samotor lake’an pole acampor kalaban bine’an se bakal nyo’ona jajan, samotor
pole, aropa’agi pangereng bine’an se pon areba panci-panci kopeng se pon aesse
jajan gellung teleng, kalembin, rendhang, kopeng bali, lemper, juko’ ajam,
juko’ sape, ban tellor. Are ganeko Sakelem etobba kalaban samacemma jajan.
Pangerengnga
pangantan lake’ aropa’agi oreng-oreng se pon daddi pakona bume e disana
bang-sebang. Daddi pangerengnga pangantan ta’ ban-saromban oreng. Oreng-oreng
se bakal epangereng pon ethok-sothok-agi.
“Tantona
dhari mordhaja bakal matoron (pangereng) se lakar bajingnga. Aneko maen. Banne
gaja’.”
“Nape
pole, edhinto lalake’. Lalake’. Lalake’. Kalebun Taman Bungkaladan. Katowana
Group Morsal E Tapak Dhang-dhang. Kalebun Garincang. Kalebun Saladi. Mas Toan
Koddhu’ Alas.”
“Banne
ga-oga. Edhinto ta’ kera patodusan ponakan.”
“Kabin
neko berrit!”
“Kabinna
manossa neko, cong. banne kabinna ajam!”
“Ja’
lalagiyan!”
Caca
ganeko epeneng epaenter. Egulek dhari pangadha’. Egusel. Eorjak e lapangan.
Jajan-jajan bin-sambin bannya’ macemma basa. Badha se ngoca’ nyambiya lema
macem. Badha se ngoca’ lema bellas macem. Basa ganeko agules. Pangadha’na kaso.
Mateppa’ basa. Sopaja ta’ enger ka adha’. Parembagan kodu sepa’. Ta’ bancang e
budhi. Sanajjan bannya’ basa cara ganeko. Sakelem paggun tennang. Ta’ noro’
aros se pon agules edi’-seddi’na aba’na. Gunna asandhakep. Sadaja basa esempen.
Ta’ laju etarema matta. Egi’-gigi’ sabban are sabban bakto.
Padhana
are ganeko, pangantan pon asallim ka Sakelem kalaban nundhu’. Sadaja
tan-taretanna Sakelem manjeng. Pangantan ganeko pon eocol sandhalla molae buru
nyongop e labang saketheng, Karana tako’ cangkolang ka mattowa ban sadaja tamoy
se pon badha kennengngan ganeko. Sandhalla badha se nambi’, badha se neggu’, malle tadha’ ali-guli. Asabab gella’ badha
basa bakal matoron pakona bume e disana bang-sebang. Sakelem asadhiya se padha.
Mas Toan Ragat Sokma, Mas toan Sodagar, Mas Toan Nekkem Salaja. Kalebunna (disa
KarangSenggi’). Katoana Group Kacong Sele’. Abannya’an keyaena (kalangan mas
toan, karana badha basa ja’ maleng/bajingan se entara ajalanan, amit gallu dha’
keyae). Eadha’na keyae, bajing dhimma bai, ta’ bakal macangkolang. Ta’ bangal.
Sadaja
tamoy pon padha toju’. Lake’an otaba bine’an. Padha ta’ acaca’an. Pangantan
lake’na dag-dig-dug. Ngetek. Karana se
bakal makabin (akad neka) aneka oreng-oreng se pon seppo tor alem tor bannya’
santrena. Toju’ padha sepa’. Ta’ aguliyan. Semo. Tor tantona oreng-oreng ganeka
se badha e kona Sakelem padha arasogan (songko’, kalambi, sarong, sandhal. Se
bine’an asongkop, ajilbab, akalambi asarong, badha se asentar, asello’,
along-kalong ban lang-gellang emas).
***
Lenglang!!!
Lalake’
ganeko. Mantona Sakelem oreng Bana Sokon. Ana’ bine’na Sakelem atemmo ban
lalake’ ganeko eteppa’na asakola Aliya. Se kadhuwa ca’-kanca’an, se lake’
kellas tello’, se bine’ kellas settong Aliyah. Atemmo e pinggar jalan. E bakto
ganeko coma bisa saleng lerek. Juma’ nyare kancana sopaja bisa ngerem sorat ka
babine’ ganeko. E bakto ganeko gi sanajjan lalake’ ta’ laju bus-garubus
nyandher, polana tako’ epega’ ban epakabin, bila epega’ ban ekabin, oreng
towana keya se todhus. Sopaja ta’ majuba’ nyama. Bila juba’ nyama. Aba’na dibi’
se repot. Juba’ nyama biasana dhalem masyarakat samangken bila aba’na ekataowe
alako’ se ta’ teppa’ tor ta’ bagus. Akantha azina. Bur-leburan kalaban binena
oreng. Tor laenna. Mela dhari ganeko Juma’ nyare kancana se semma’ ka Cebbing.
Dhapa’ ka romana, maso’ ka kamarra, terro nolesa sorat.