Jamal D Rahman Maos Carpan

Jamal D Rahman, sastra madura, Sastrawan nasional, Madura, The Soul of Madura, Sumenep, Pamekasan, Sampang, Carok, Kebudayaan, Seniman, Kesenian Madura


Maca Carpan Madura, Agi’-gigi’ Sangngarra Jagung

Badan kaula maca buku kompolan carpan (careta pandha’) ka’dhinto akadiya neddha sangngarra jagung: gi-galiggi tor li-gali sae. Galiggi tor gali, sabab badan kaula dibi’ rangrang maca basa Madura e dhalem horop Laten. Dhimin badan kaula seggudan maca basa Madura e dhalem horop arab. Enggi ma’lum, gi’ na’-kana’ badan kaula ajar noles basa Madura kalaban horop arab. Estowepon lakar sakone’  badan kaula maca buku basa Madura, sae e dhalem horop Arab ponapa pole e dhalem horop Laten. Namong saamponna maca pan-saponapan carpan, saamponna pan-saponapan carpan egigi’ tor ekael sampe’ alos, esep-sepsep pas ekalodhu’ on-laon, jan ekarassa saena carpan Madura ka’dhinto. Banne namong sae neng eber, namong sae jugan neng ate tor pekkeran. Bali’ kadhang cora’ ekarassa nyepsep dhapa’ ka tolang. Jan abit tor jan bannya’ carpan ka’dhinto egigi’ tor egi’-gigi’, ekael tor esep-sepsep, jan ekarassa jugan ro’ommaepon. Romasa asarebbengngan e buluna elong.

Menangka oreng Madura se lebur tor taresna dha’ basa ban kabudhaja’an Madura, badan kaula onggu-onggu perak, bunga tor jembar kalaban terbidda buku ka’dhinto. Buku ka’dhinto aropa’agi tandha otaba tatengnger ja’ oreng Madura, paleng sakone’ oreng-oreng se noles carpan, onggu-onggu taresna dha’ basa Madura, tor ausaha ngale ban madhalem basa Madura menangka kabudhaja’an dibi’epon. Malar moga carpan Madura terros odhi’ tor eapodhi’ terros, otamaepon sareng reng-oreng se ampon noles carpan. Kalangkong dha’ sadaja se noles carpan, kong-langkong dha’ Taretan Lukman Hakim AG se ampon ngarjai badhana carpan Madura. jugan se ampon ngarjai terbidda buku carpan Madura ka’dhinto. Kalangkong jugan dha’ Radar Madura, se sabban-sabban minggu nyadhiya’agi tana monggu carpan Madura, saengga matombu pangarep se lebbi raja monggu basa Madura kaangguy ngaolle daging tor pellemma basa Madura se lemma’epon tadha’ padha.

Maos jugan

Sadaja usaha gella’ ta’ bisa enilai kalaban ponapa’a bisaos. Ponapa se ekaolle badan kaula dhari buku ka’dhinto ta’ bisa ekaolle dhari buku laen. Kadinapa badan kaula pas ta’ aromasa’a perak, jembar, tor bunga. Buku ka’dhinto ampon apareng bukte lebbi bannya’ pole ja’ basa Madura lakar sae, lebur, ro’om tor lemma’. Buku ka’dhinto jugan abakta badan kaula ka sacem-macemma alam, otamaepon kaodhi’an oreng tor masyarakat Madura. Sadaja ka’dhinto adaddiyagi Madura tor sadaja kaodhi’annepon nyerrep nyarepsep ka dhalem ate. Kadhang badan kaula epanoro’ sossa tor berra’; kadhang epanoro’ perak tor aromasa legga;  kadhang eajak ker-mekker tor agi’-gigi’ kaodhi’an; atanya aponapa ma’ saka’dhinto ma’ banne saka’dhinto, tor kadhang badan kaula kek-ngalekkek tor ngelkel kadibi’an—sampe’ kabater epanggi bine dibi’, todhus me’ esanggu kaula ampon gila.

E dhalem basa Madura, carpan (singkatan dhari careta pandha’) aropa’agi petotor anyar. Petotor carpan epondhut dhari basa Indonesia, enggi ka’dhinto cerpen (singkatan dhari cerita pendek) se etarjama’agi ka basa Madura daddi carpan. E dhalem basa Indonesia, cerpen aropa’agi sala settong macemma sastra. Dining sastra enggi ka’dhinto petotor se etoles banne namong kalaban basa se bagus, namong jugan se sae tor lebur. E dhalem basa Madura, tadha’ petotor sastra, namong badha petotor se aropa’agi sastra manabi eoladi dhari sastra Indonesia, akadiya mamaca tor paparegan. Akadiya ekaonenge, mamaca tor paparegan ka’dhinto petotor se bagus, sae, tor lebur. Sabab, mamaca tor paparegan ngangguy petotor otaba basa se onggu-onggu sae, tor kadhang jugan nangguy ngen-angen (imajinasi) se adaddiyagi mamaca tor paparegan aleburan pole.

Namong manabi egi’-gigi’ pole tor etalektegi dhari sastra indoensia, mamaca tor paparegan tamaso’ sastra lisa otaba tradisi ka’ lisan, enggi ka’dhinto petotor se emaos otaba ekakejung tor eparengagi otaba etenggu sareng pan-saponapan oreng. Daddi estowepon, tradisi lisan ka’dhinto tatenggun. Dining sastra Indonesia—ponapa pole se ekoca’agi sastra Indonesia modern—banne tatenggu. Sastra Indonesia aropa’agi babacan, enggi ka’dhinto basa Indonesia se etoles kalaban basa se bagus, sae, tor lebur kaangguy ebaca. Daddi sastra Indonesia (modern) etoles otamaepon kalaban tojjuwan kaangguy ebaca bi’-dibi’ sebang.  Banne ebaca’agi kaangguy eperengngagi areng-sareng. Ka’dhinto bidaepon sastra kalaban tradisi lisan. Saka’dhinto jugan paparegan, mamaca, dungngeng, lok-alok tor samacemmepon e dhalem basa Madura aropa’agi tradisi lisan.

Menorot pamanggiepon sabagiyan oreng penter, sastra lisan estowepon aropa’agi contradiction in terminis. Maksottepon: agadhuwan dhuwa’ arte se ta’ akor settong arte kalaban arte laennepon. Bali’ banne namong ta’ akor, namong jugan bertentangan. Settong arte kalaban arte laennepon cora’ du-addu buggik. Ekoca’ sastra, se arte’epon tolesan kaangguy ebaca bi’-dibi’ sebang, namong eperengngagi tor etenggu sareng pan-saponapan oreng kalaban ebaca’agi otaba ekoca’agi sareng settong oreng. Lebbi dhari ka’dhinto, cora’epon namong mamaca se emaossagi dhari tolesan. Melana ekoca’ mamaca, se arte’epon maca tolesan. Dining paparegan, dungngeng tor lok-alok banne ebaca, namong ekoca’agi, sabab lakar tadha’ tolessannepon menangka lakar ta’ etoles. Maka dhari ka’dhinto, pan-ponapan petotor se bagus, sae, tor lebur e dhalem basa Madura kona langkong sae esebbut tradisi lisan etembang sastra lisan.

Menangka petotor carpan epondhut dhari sastra Indonesia akadiya ejarba’agi gella’, langkong dhimin ngereng badan kaula sadaja mondhut petotor sastra daddi sastra Madura kaangguy magampang pangoladan tor panalektegan badan kaula sadaja dha’ carpan Madura. Ka’dhinto jugan kaangguy jugan makaya basa Madura, sabab basa Madura bisa daddi kaya kalaban mondhut petotor sanya’-bannya’epon dhari basa-basa laen. Daddi, akadiya e dhalem bahasa Indonesia badha sastra Indonesia, saka’dhinto jugan e dhalem basa Madura badha sastra Madura. Manabi e dhalem sastra Indonesia badha sastra lama tor sastra baru (se tor kadhang esebbut sastra modern),  saka’dhinto jugan e dhalem sastra Madura badha sastra kona tor sastra anyar. Sastra Indonesia lama enggi ka’dhinto sastra Malaju, kalaban cem-macemmepon akadiya pantun, syair, hikayat, tor laen-laennepon. Dining sastra Indonesia modern aropa’agi perkembangan anyar e dhalem sastra Malaju kalaban mondhut cem-macemma sastra Eropa akadiya soneta, puisi, roman, novel, drama, tor cerpen.

Kalaban abandhingngagi sastra Madura kalaban sastra Indonesia, maka sastra Madura bisa ebagi dha’ dhuwa’ bagiyan. Se nomer settong, sastra Madura kona. Se nomer dhuwa’ sastra anyar. Se tamaso’ sastra Madura kona enggi ka’dhinto sadaja patotor se bagus, sae, tor lebur se jat ampon badha molae dhimen mola, akadiya mamaca, paparegan, dungngeng, lok-alok, tor laen-laennepon—se estowepon aropa’agi tradisi lisan akadiya ampon ejarba’agi. Nah, carpan aropa’agi macemma sastra Madura se anyar, se gi’ buru badha e dhalem basa tor sastra Madura. lakar lerres ja’ carpan aropa’agi careta akadiya jugan kejung tor mamaca. Namong etalektegi dhari roba, ropa, tor cem-macemma parabuttepon, carpan tor dungngeng otaba mamaca ce’ bidana.

Kaangguy mapandha’ dhabu, ngereng bandhingngagi carpan sareng mamaca saos. Ta’ usa lem-dhalem onggu kaangguy ngoladi bidana carpan kalaban mamaca, ta’ usa nalektegi, cokop ngoladi ke’-nengke’ bisaos. Sanaossa tokang maca e dhalem mamaca maos tolesan (se aesse careta otaba cator), tolesan gella’ namong kaangguy kateggu’an e bakto mamaca. Tolesan banne cangga otaba adek. Se daddi cangga otaba adek e dhalem mamaca enggi ka’dhinto tokang maca tor careta se ekacator sareng tokang maca gella’. Mela ka’dhinto, sanaossa etoles, cator e dhalem mamaca banne kaangguy ebaca sareng sanya’-bannya’na oreng, namong kaangguy eperengngagi tor etenggu nalekaepon ekacator sareng tokang mamaca. Namong tokang maca kadibi’ se agadhuwan tolesan mamaca. Oreng laen ta’ agadhuwan. Mela ka’dhinto jugan, mamaca aropa’agi tatenggun.

Carpan bida sareng mamaca. Se daddi cangga otaba adek e dhalem carpan enggi ka’dhinto pan-ponapan se etoles e dhalem carpan. Tolesan e dhalem carpan ka’dhissa’—kalaban sadaja petotor tor catorrepon—se aropa’agi cangga otaba adek. Oreng noles carpan kaangguy emaos sareng sanya’-bannya’na oreng bi’-dibi’ sebang, banne kaangguy eperengngagi tor etenggu areng-sareng. Mela ka’dhinto carpan epabannya’ kalaban eterbittagi akadiya e Koran otaba buku. Pasera’a bisaos bisa agadhuwan carpan kaangguy emaos bi’-dibi’ sebang. Mela ka’dhinto jugan, carpan banne tatenggun. Ka’dhinto bidaepon carpan menangka sastra Madura anyar kalaban mamaca menangka sastra Madura kona.

Maos jugan

Serrena carpan epondhut dhari sastra Indonesia, maka kaangguy nalektegi carpan Madura badan kaula sadaja parlo ngenjam pakakas sastra Indonesia, enggi ka’dhinto elmo sastra. E dhalem sastra Indonesia, elmo sastra ampon cukup maju, se nyadhiya’agi pan-saponapan pakakas kaangguy nalektegi sastra. Enggi ma’lum, sastra Indonesia modern adulluwan korang-lebbi saabad etembang sastra Madura anyar. Namong kaangguy ngenjam pakakas sastra Indonesia e dhalem nalektegi sastra Madura anyar ta’ gampang jugan. Sabab, bannya’ petotor elmo sastra Indonesia se gi’ tadha’ basa maduraepon. Ompamaepon e dhalem nalektegi carpan, badha petotor tema, narator, tokoh, penokohan, konflik, alur, alur maju, alur mundur, alur campuran, latar, latar tempat, latar waktu, klimaks, selesaian, tor laen-laennepon. Sadaja petotor gella’ aropa’agi pakakas e dhalem nalektegi carpan.

Serrena sadaja petotor otaba pakakas panalektegan carpan gella’ gi ta’ epondhut tor gi’ ta’ epamaso’ ka dhalem basa Madura, maka nalektegi carpan Madura anyar kalaban petotor-petotor kasebbut cora’ pas ekarassa acator otaba ajarba’agi e dhalem basa Indonesia. Banne acator otaba ajarba’agi e dhalem basa Madura pole. Ka’dhinto paleng sakone’ bisa aganggu kasaeyan basa Madura se ampon epajekjek sareng sadaja se noles carpan. Mala bisa rosak lebur tor lemma’epon basa Madura e dhalem carpan sadaja se noles: Abd. Rahem, Amirul Muttaqin, Andi Fathorrozi, Bin ( N Shalihin Damiri), Budi Santoso, Fathor Rosi, Hamzah Fansuri B., Hasmidi, Juwairiyah Mawardy, Ly Bintang, M. Toyu Aradana, Ma Leo, Mudhar Ch., Musyfieq Rz, Nur Aisyah, Set Wahedi, Siti Fatimah, Ubaidillah Hasani, Uswatun Hasanah, Uswatun Syarifah, tor Yulistiana Ningsih. Mela dhari ka’dhinto, saporaepon badan kaula ta’ ajarba’agi carpan menangka tako’ aganggu basa Maduraepon se ampon ba-abak lemma’.

Ponapa pole sadaja se noles carpan se kasebbut tanto bisaos ampon noles kalaban ngalocorra pello, ngadhudhuna rassa, tor berruyya ate. Salam.(*)

Pondok Cabe, 19 Agustus 2017


Jamal D Rahman, reng Lenteng Temor, Songennep, Madura. noles puisi, kritik, tor esai-esai kabudhaja’an tor Islam e dhalem basa Indonesia. Oneng daddi pemimpin redaksi majalla sastra Horison (2003-2016). Samangken dosen sastra UIN Syarif Hidayatullah, Jakarta.

Epetthek dhari Buku TORA menangka peyatoran. Terbitan Radar Madura, 2017

Posting Komentar

Lebih baru Lebih lama

Formulir Kontak