Komunitas Wikimedia Madura Ngalampaagi Lateyan Wiki Oca' e Sumenep
Sumenep, 5 Oktober 2025 - Komunitas WikiMedia Madura alampaagi papanggiyan se aropa wikilatih kaangguy nambai oca' e wikikamus se badha e laman MaduraWiki neng Kottha Sumenep, tempattepon e Taneyan.
Badhana lateyan wiki oca' paneka tojjuwannepon kaangguy apareng pangaonengan mamaso' oca' Basa Madura se badha neng e Kamos Basa Madura dha' laman wiki sopaja lebbi gampang ekaonenge sadaja magarsare.
Tantona panitia jugan nyadhiya'agi kamos Basa Madura anggidan Adrian Pawitra saengga sadajana bisa nyare tor mele oca' se sabellunna gi' ta' epalebbu dha' laman Wiki. Enalekana malebbu oca' se badha neng kamus paneka. Ta' loppa, sadaja peserta epaenga' sopaja ta' loppa nerrangngagi arte tor ta' kaleb nyebuttagi somber sareng kacaepon.
Sadajana peserta tong-parsetttongnga epakon malebbu tor nyaba' lema bellas oca' neng laman Wiki. Kaoladan sadajana gate abirji' mokka' kamos tor areng-sareng ajar mamaso' oca' Basa Madura dha' laman Wiki Madura.
E dhalem papanggiyan paneka sadaja peserta epakon abakta laptop asabab kodu agabay akun bang-sebang atas nyamana dibi' se noro' papanggiyan se badha e laman Madura Wiki.
Parlo ekaonenge, peserta se tanduk sabagiyan enggi paneka para guru, jurtoles, tor na'-kana' ngodha se ngagunge rasa pangalebur ngopene dha' Basa Madura.
Alfiyah Rizzy Afdiquni, narasumber e lalampan paneka aromasa gumbira e nalekana tor-mator, ngoladi kagateyan peserta nyambadane papanggiyan Wiki Latih. Ta' loppa, sabelunna ngabidi acara, salerana ajellasagi eja'an Basa Madura se eguna'agi tor eyangguy e laman Wiki.
"Parlo ekaonenge e dhalem acara paneka, eja'an basa Madura se eyangguy e nalekana malebbu oca' enggi paneka eja'an Basa Madura Balai Bahasa Jaba Temor (BBJT)," mator Alfi, menangka narasumber, se kengeng pakon apareng pangaonengan lateyan Wiki oca'.
Badha sagame' peserta se kasokan hadir neng papanggiyan Wikilatih. Sadajana areng-sareng ajar malebbu oca' Basa Madura se epetthek e pan-barampan somber, otamaepon kamos Basa Madura.
Sabatara paneka, settong peserta se anyama Ummul Hasanah ngatorragi pamanggi tor kagumbiraan kengeng edi apol-kompol noro' acara Wikilatih. Salerana aromasa senneng amarga tapanggi sareng ngagodhadhan tor bangatowa se kalerrasan padha lebur ngopene basa madura.
"Kaula pajet lebur apol-kompol. Napapole sambi ajar eja'an oca' Basa Madura. Tantona nambai elmo tor nyandha' pangaonengan dhari narasumber tor ca-kanca se laen," saodda, dha' Lalampan.com
Ummul nyebuttagi tantona ta' bannya' se lerres e dhalem nyerrat tolesan oca' Basa Madura. Pramela dhari paneka, koduna papanggiyan neka maemot parlona ajar dhari se ampon penal.
Sabelunna papanggiyan etotop, sadaja peserta epakon afoto saenggana bisa esebbarragi e Media Sosial. Ta' kalep, panitia jugan apareng hadiah monggu se gate dhateng lebbi ngadha' tor jang mareyan, se lekkas mare ngalakone tugas olle papareng aropa ettas tor kalambi kaos.
Laporan :
*) Fendi Chovi, babar e Songennep. Lebur nganggit careta. Pan-saponapan ongkas serradanna terbi’ daddi buku, ngombar e media cetak tor online. Eyatore akanca lebat sosial media Instagram @fendi.chovi
