RULIS Ngalampaagi Adduwan Maca Puisi Basa Madura sa- Kottha
Sumenep
Berita : Fendi Chovi
Lalampan.com. 1447. Sumenep, Rumah Literasi Sumenep (RULIS) bakal mabadha
tatenggun se tantonan lebur manabi eoladi tor epeyarsaagi areng sareng.
Tatenggun kasebbut aropa lalampan adduwan maca puisi basa
Madura kaangguy sadaja ret-moret sesalaggi' toju' e bangku SD otaba MI sa
kottha Sumenep, e taon 2025.
Adduwan pamaosan puisi paneka badhi elampaagi e tanggal 28
Oktober 2025 se bakal esaba' neng e Aula Gedhung RRI Sumenep tor akabidhi molae
pokol 08.00 e baja laggu.
Sadaja atoran ngengenge adduwan maca puisi paneka esebbuttagi
e dhalem flyer (lembar pangaonengan) se esebbarragi Media Sosial RULIS. Manabi
kasokan, ngereng duli pece' tor oladi atoran se ampon esoson tor daddi panduman
neng adduwan gapaneka.
Adduwan maca puisi paneka metthek tareka aropa pokedda
paanaban Asre e Kottha Songennep, enggi paneka : “Bahasa Madura dalam Puisi,
Merajut Identitas Budaya Sumenep”.
Kalaban badhana adduwan maca puisi akadi paneka, tantona bisa
apareng jalan dha' sadaja Ret-Moret sopaja areng-sareng ngopene badhana Basa
Madura sopaja tettebba ekaleburi tor daddi oca' se eyangguy e dhalem
adha-kandha re-saarena.
Akadi Ejarbaagi Yulianti, menangka se nyepowe Komunitas RULIS
Sumenep badhana lalampan adduwan Maca Puisi tadha' laen, coma settong
pangarep tor samoga daddiya jalan majhurbu tor matombu kabadha'an karya Sastra
daerah se badha e tana Madura, otamaepon e Kottha Sumenep dibi'.
E baja samangken ta' bannya' nga-ngodhadgan se lebur Maos
Puisi Basa Madura. Pramela ka'dhinto, tantona badhana adduwan paneka daddi
pamokka' pangalebur se emolae dhari ret-moret se salaggi' ajar e sakola'an.
"Manabi badha ret-moret se endha' noro', ponapa pole
kantos ngenneng e dhalem adduwan paneka, bakal ngaolle hadiah se masenneng dha'
bangaseppo tor ru-guru. Sapaneka jugan dha' sakola'an. Eatore duli adaftar
salaggi' gi' ta' etotop," saodda, Yuli ngatorragi pamanggi tor pangarep.
Katowa RULIS saterrossa apareng pamanggi badhana adduwan
paneka kaangguy ret-moret SD/MI sopaja daddiya jalan ngaonenge 'Kearifan lokal' otaba pangaongengan langkong
sae, aropa pamaosan sanjak otaba maca puisi.
Parlo ekaonenge, tantona lalampan Rumah Literasi Sumenep
(RULIS) paneka sasarengan kaangguy ngadhebbi karja Molang Are RULIS se kapeng
9, teppadda enggi paneka e tanggal 11 November 2025 se bakal dhateng.
Laporan :
*)Fendi Chovi, babar e Songennep. Lebur nganggit careta. Pan-saponapan ongkas serradanna terbi’ daddi buku, ngombar e media cetak tor media online. Eyatore akanca lebat sosial media Instagram @fendi.chovi.
PUISI-PUISI
LOMBA
POTTRE
MADHURA
Anggidan:
Tika* Suhartatik
Pottre
Madura...
Bila mandeng salerana... ambulan pornama tar-kataran e penggir sereng
Adikker sambi reng-mereng e eser sakolengleng
Pottre
Madura...
Bila ngabas pamesemma... pangrasana jerruk salone
Atemmo mangkar ranca’
Sambi akenca’ nandang tembang tandhu’ majang
Namong ta’ loppa ka sombajang
Pottre
Madura...
Bila ngantos palembayya...
Meltas manjalin sambi neter kolenang
Caretana ngocernang malako jembar atena
Pottre
Madura...
Raddin onggu mabunga aba’ se rogu
Andhap asor tatengkana asaredhemman ro’omma bila tanduk dhari pondhuk
Duuuuh...
Pottre Madura
Sapa nangka nambi’ tarnya’, kaju gabus ater-enter
Sapa dika se andhi’ ana’, sela bagus langgi’ penter
Sajan ebitong ganep ebirji’ ganjil....
PAN-SAMPANAN
Anggidan:
Tika* Suhartatik
E bakto
aeng songay ondhung ka lao’
Ngarapkap juko’ maelang tako’
Dhaun gajam abay-lambay
Ngaja’ bungkana bunyok marambay
Ka tengngana labay
Lebur
onggu pan-sampanan
Aonjan ka kanan ka kacer
Ta’ ceccer bella agaluy
Agubek... agundhek...
Dhari
semma’ padha arama’
Ngoy-langngoyan barakay
Matakedha’ dhadha daddi jarna’
Karopana se mandeng ondhem
Ngonjem, sampe’ renjem
Pan-sampanan
ka olo ka onjur
Mon pojur soko padha ngonjur
Alenga’ enga’ oreng pegga’
Lebur
onggu pan-sampanan
Adhungngeng sambi el-kaelan
TANEYAN
LANJANG
Anggidan:
M. Fauzi
Roma ajajar
dhari temor ka bara’
Akadi mandhapa Agung agandhu’ nyeor
Odhi’ song-osog lombung, andhap asor
Ma’mor dalem nemor
Kerres,
tombak, ban are’ abathek ate
Se ngomennyor akadi palappa nyeor
E buntel daddi sekep, kadigjayaan
Ka agunga oreng se odhi’ e jalan se loros ban teppa’
Bulan ban
bintang tar-kataran
E atassa lencak agarennyap nyepsep ban ngenep
Majarna’ pangoladan sampe’ dha’ Arsy
Taneyan
lanjang, soko jekjek e bume
Akadi pako nancep—nyarepsep e ate
Majunge tan-taretan, epakpak akadi pangantan
Ajalan ka bara’ ka temor neter kolenang
Mabunga ka se ngoladi
Macellep dha’ se ngabas
Odhi’
sossa along-polong
Akompol e taneyan lanjang
Ngoladi bulan ban bintang sato’or
Alomampa e seddi’na labang
Taneyan
lanjang, majekjek rassa taresna
Odhi’ mate dhalem tengka
Se samporna dhalem loka
Se tadha’ guru ban tolessa
ESTO EBU
Anggidan:
Soemardana Paranggana
Ba’na
cengkal, kacong
Esoro ka bara’ entar ka temor
Bila soko ban cethak padha ngalecer
Tabu’ ban mowa salbiyan kabbi mara jareya
Emma’ se kemma se mangga
Oreng towa se kemma se kellar
Nagenne kelbu’ dhadhana
Adhu kacong ate sengko’
Dhara sengko’, ora’ sengko’
Ja’ senga bisa eyontal, bango’
Maso’a pole ba’na kacong
Ka dhalem tabu’
Bukkak e to’odda
Manda’na eyalleya ka to’ot dibi’
Lokana se anganga, ja’ bisa’a bali’ ebangngemma
Saka’dhinto.
Tono ana’na
Rop-sorop are mole ka bengkona
Eyosong kanca ban tatanggana
Ebuna robbu
Eppa’na laggi’ entar nabbu
DAMAR
BADHA E PARTELLON
Anggidan:
Abdul Gani
Capcabba
dhara ban nana noro’ lanjangnga lorong
Agili dhari kol-tongkolan mate’e damar
Ojan molae derres e konco’na malem
Adharak sakalengngadha’ padhana etotta’ dhari langnge’
Balaburra ngaracak ta’ bisa alanyo’ merana dhara
Ban antemma nana
Pajung se epatabar ba’na
Buru epakalowar saellana kalambi
Ban sakabbiyanna ban-giban padha kopo kabbi
Malarat rassana abida’agi gaga’anna tananga ba’na
E attassa loka ban poro
Karana padha peddina
Osaban lere sarat kalaban kaparatenan
E nga’-tengnga’anna mergi’ tombuna tobba
Se molae badha naleka sengko’ molae kasambu’
Ka bulan pornama moncar dhari mowana ba’na
Ba’na molae nganggi’ bintang dhalem mempe
Ban naleka tajaga karana badha senter bato sapolo
Dhateng ngellone atena ba’na
Dhaksakala ba’na andhi’ bungkana kabangalan
Saabidda abuwa copa
Nyembur tang mowa naleka sengko’ lebat e babana
Tape ropana ba’na ecapo’ balat
Nang-konang se ekasanggu bintang
Gan settong mate
Naleka ba’na molae pelka’ ka aeng
Se nyembur dari nga’-tengga’anna bintang
Se pajat bisa esebbut bintang
Mangkana ba’na sateya duli berka’
Naleka damar e partellon
Akantha ta’ tao ja’ noro’ lorong
Mare nyapcap dhara ban nana
Ban ta’ losso tekka’a ecapo’ ojan
Se para’ maabi’a gel-togellanna malem
Sengko’ bingong majejjeng e nga’-tengnga’anna partellon
Kottha e adha’ padha elang
Naleka ngedhing ba’na ra’-era’an ban ba’-koba’an
Antara abali, terros otaba ka kacer
Menangka peleyan sepadha mamate ka aba’
Ojan aherra dhateng pole
Naleka sengko’ ban ba’na padha badha e partellon
