E Nalekana Bulan Gerring || Carpan ||
Lalampan.com || Dhu, sapa se ta' tako'a? Bila enga' ka jaman lamba' e bakto dhapa' ka bajana bulan gerring. Sakabbina reng-oreng kalowar dhari romana.
Ngabbassagi kabadha'an e
langnge', cajana bulan laolan etangale daddi saseba' tor elang atotop saenggana
ta' katangale pole.
*
"E bakto kaula gi'
kene', rassana kabadha'an gapaneka seggut maseyalan ka ate tor majaga essena
buluna kole', akadi badha'a karosagan raja e alam dunnya," oca'na Salim,
saellana ngedhing kabar ce' bakal badha' bulan gerring.
"Iya, kantos sateya.
Gi' badha sabagiyan se ngalakone enga' jareya e disa." Saodda tatanggana
ka Salim, nyambung cateta.
Biyasana, e bakto jareya
reng-oreng e Disa padha emo' asepsap, apokpak ka Bara' ka Temor, ka Dhaja ka
Lao', kaangguy ajagai, sabadhana mahlogga Guste Pangeran se badha e bume.
Badha bungkana kaju, pas
kajuwan jareya ejagai kalaban edhakdhak. "Jaga, jaga, jaga... !!!!
Sadajana se etangala reng-oreng.
Rassana ta' ceccer, ejagai. Molae ka'-bungka'an,
roma, tor ponapa bisaos, kandhang sape, kandhang ajam, ejagai kalaban eteggu',
edhakdhak, epokol, tor etabbu. Kadipaneka kabadha'an e Disa e nalekana
katebanan bulan gerring.
*
Malem jareya, Salim pa'-reppa'na
badha e Tana Madura. Paleman kaangguy nyapot reng towana. La tello are dhapa'
sakalowarga.
"Manabi e Tana Jaba,
otamaepon e seddi'na romana kaula dibi'. E nalekana badha kabar ngengenge bulan gerring. Bakal badha
bar-kabar se eseyarragi dhari Masjid." saodda Salim ngatorragi pamanggi.
"Saongguna e dhiya
badha keya. Enga' jareya. Keng ta' kabbi oreng kompak abajang," jawabba
oreng seeajag abanta Salim.
"Biyasana reng-oreng
epakon kaangguy nyempattagi bakto abajang khusuf tor aparnyo'onan dha' ka se
Maha Kobasa e dhalem Masjid. Kabbi oreng epakon ka ikhlasan kaangguy
apol-kompol. Anyo’on kasalameddan kalaban parnyo'onan," Salim ajellassagi
pole.
Tantona dhalem masjid
paneka, masarakat e kampong noro'
aparnyo'onan kalaban rassa tako' tor kobater se etonton Keyae. Kabbi adu'a
kaangguy ejauwagiya dhari sadaja mosiba tor laennepon se madaddi rosagga alam
dunnya.
Dhari palemperra roma,
Salim kaoladan toju' e attassa lama'
sambi' adha-kandha. Salim buru tello' are dhapa' ka tana Madura. Rassa kerrong ka tan-taretanna, seggudan ta'
kobasa eampet. Asabab, aba'na coma dhukale sataon se bisa paleman. Manggi'i
reng seppo ban bala taretan.
Malem jareya, Salim toju'
e palemperra romana. Sabatara, tan-taretanna emo' amaen eddhum (domino)
sakancaan. Bajana tedhung eguna'agi kaangguy along-polong sambi' amaen eddhum.
Sabatara, binena ngancae
potrana, se gi' kene' ban buru tatedhung, agentang e attassa kasor. Kana'
jareya badanna apellowan. Ngerrok ngasower e kaedhing kantos ka lowar labang
romana.
Tan-taretanna kaoladan
amaen eddhum ngancae reng-oreng se pa'-teppa'na entar amaen ka romana.
"Kabarra malem
samangken, bulan bakal Gerring," saodda oreng, mator dha' ka reng seppo
lake'na.
"Ongguwan onggu, ya,
cong! Engko' ta' tao, saodda eppa'na Salim.
"Enggi, lerres."
"Iya, dina. Ompamana
engko' dhaggi' tatedhung. Jagai, ya." Saodda.
*
Tan-taretanna gi' ta' mare
amaen kartu eddhum. Badha se agella' kek-ngalekkek. Nyolet roko' pole ban
badanna jur-ngonjuran pole.
"Duli, ocol !"
Parentana ngoca' ka kancana.
"Antos gallu, kare
baramma teggudanna Dika," nyaot labanna, nempale oca'.
Sakeng emo'na amaen eddhum
kantos ta' egarassa malem pon atamba malem. Bulan e langnge' pon kare sasebak.
Se asalla bulan pornama etangale tera' tar-kataran, aoba daddi kare saseba'.
Salidin, reng towana Salim
duli kalowar roma, kaangguy ngoladi bulan se ekabarragi gerring.
"Ba, bulan gerring
onggu," saodda, ka na'-potona se badha e dhalem.
Eparengkes se anyama eddhum,
kabbi duli kalowar dhari roma.
"Enggi onggu, bulan
Gerring," saodda laenna.
Salidin duli ngala' kaju
ban epokollagi ka ka'-bungka'an.
"Jaga, jaga, jaga
..." Saodda, ranyeng.
Ngabassagi kadi ka'dhinto,
Salim mesem
Ropana molae lamba',
padhana jareya kabadha'an e Disa e nalekana ngadebbi bulan gerring. Ta' aoba
sakale.
Sabatara, potrana Salim,
na'-kana' kene' gella' . Pas noro' jaga dhari tedhungnga. Ngedhing badha
monyena oreng akol-tokolan ka kaju-kaju, nabbu ember ban pakakassa roma. Rassa
kobater tantona egarrasa e atena. Dhu, bulan gerring !!!!
8 September 2025
Fendi Chovi, babar e
Songennep. Lebur nganggit careta. Pan-saponapan ongkas serradanna terbi’ daddi
buku, ngombar e media cetak tor online. Tore nyambung adha-kandha lebat sosial
media Instagram @fendi.chovi
