carpan: Mamat Terro Nompa’a Jaran

AMPON para’ bulan Molod. Bulan Molod osom na’-kana’ epanompa’ jaran sabab ngajina khatam. Nompa’ jaran apajungan. Edu’umen pesse mera biru sareng reng-oreng. Pessena egabay keppay otaba epakae’ ka pajungnga. Aleleng disa tor kampong. Duuu…leburra.

 

Mamat terro onggu se nompa’a jaran. Tape Mamat posang sabab eppa’ tor emma’na taḍha’ e compo’.Mamat sabban are enneng e compo’ asareng nyaena se ampon seppo. Asakola’a menta sango ka nyaena. Entara ngaji lastare Asar menta sango ka nyae pole. Reng seppona Mamat ampon lebbi sataon alako e Jakarta sabab raja otang.

 

Gi’ ontong Mamat ta’ enga’ Ettip. Neserra Ettip. Sala la reng towana apesa karna raja otang, Ettip epatoro’ ka majadhi’na polana embana la taḍha’ kabbi. Gi’ pendhanan Mamat ca’na nyae.

 

“Pojur ba’na, Cong. Eppa’ ebo’na ba’na gi’ apolong. Mon pas apesa? Baramma ba’na?” Ca’na Nyae panbilan.

 

Leeee…sateya Mamat terro nompa’a jaran epangantane apajungan eyarak oreng bannya’ etabbuwin haddra. Baramma carana?

 

“Ba’na gi’ ta’ khatam ngajina. Ca’na Keyae mon lebat juz ḍhupolo olle nabang khatam maske ta’ dhapa’  juz tello polo. Ba’na gi’ juz sabellas. Baramma se nabanga?”

Maos jugan

• Teks MC Bahasa Madura
• caRpan: Jalan Rosak
• KEPETAHAN LIDAH BAWEAN
• Carpan: Pelak
• Rèng Binè’ Ḍâlem Kepkeppan Jhâman

 

Mamat nunḍu’. Ta’ tao se nyaotta ka Nyae.

 

“Ta’ bisa nompa’  jaran malolo, Nye? Ta’ osa pangantan ta’ rapa la…,” sowarana Mamat mellas.

 

Nyae napet ḍhaḍha. Neser ka kompoy. Tape jugan arassa posang se ngoca’a ka kompoy. Aherra Nyae nyabis ka Keyae e Langgar. Ke Takim.

 

Se ḍhabuna Ke Takim, Mamat ta’ bisa noro’ khataman. Mon gun terro nompa’a jaran bisa bai keng baramma mon ta’ paḍha bi’ kancana se khatam?

 

“Saneka, Nye, manabi nyewa jaran sareng tatabbuwan haddra, baragadda larang. Ajuta’an. Gi’ adha’arin e compo’. Sampeyan rogi manabi ta’ akor sareng parlona.”

 

Nyae mole rapa’ Mamat ngantos ju’-toju’ e amper.

 

“Baramma, Nye? Olle ca’na Ke Takim, ya?”

 

Nyae ta’ langsung nyaot. Gi’ ngenom gallu.

 

Nyae akonḍhange bauna Mamat, eyajak toju’ e lencak.

 

“Bariya, Cong…nompa’ jaran areya larang, Na’. Ca’na Ke Takim, rogi mon nompa’ jaran banne polana khatam. Arapa mon ba’na pasabbar gallu. Nantos taon ḍateng?”

 

Mamat essep ta’  metto oca’. Apekker abit buru metto oca’.

 

“Barampa larangnga, Nye?”

 

Nyae ta’ tega se ngoca’a.

 

“Dina, sengko’ nelpona eppa’na ba’na, Cong. Pola eppa’na ba’na anḍhi’ pekkeran laen.”

 

***

 

E sakola’an, Mamat gun ngeḍhingagi kancana abanta khataman nompa’ jaran. E ḍhalem atena, Mamat arassa kasta ta’ kodu ngaji ka langgar. Lebur amaen malolo. Mon esoro ngaji lako ru-buru.

 

Ja’ sakenga sengko’ khatam keyanna…ja’ sakenga sengko’ ta’ nakal…ja’ sakenga sengko’ toro’ oca’ ka Nyae…

 

Mamat pas ta’ nyaman ngakan, sengka se amaenna karna ca-kancana malolo abanta caretana oreng nompa’ jaran. Khataman sajan para’ korang ḍhumenggu are la.

 

Sakanca’an se saomoran bi’ Mamat pajat bannya’  se la khatam. Tape baḍha keyanna se gi’ ta’ khatam karna galuggu’ macana, ta’ tarbuka ngajina. Cem-macemma na’-kana’.

 

“Ta’ rapa, Mat, maske ta’ khatam sateya. Sengko’ khatama taon ḍateng,” ca’na Bulla ka Mamat bakto laodan sakolaan.

 

“Iya mon polana gi’ baḍha taon ḍhateng. Tape sengko’ terro sateya ongguna.”

 

“Rakera, mon ba’na khatam sateya apa eppa’na bi’ ebo’na ba’na bisa mole ḍhari Jakarta rowa, Mat?” Bulla atanya.

 

“Sengko’ ta’ tao keyanna. Eppa’ ajaga tokona oreng ca’na Nyae.”

 

“Biyasana ta’ bisa konangko mole, Mat. Kodu badha gantena mon moleya.”

 

“Iya apa?”

 

”Iya. Sengko’ ngeḍhingagi caretana oreng wa’aa…”

 

Mamat essep.

 

“Dina laju, Mat. Khatam moso sengko’ ba’na taon ḍhateng. Se penting, ja’ nakal pole ngajina. Mayu, sengko’ terro koduwa ngaji keyanna.”

Maos jugan

• Soal Peleyan Bahasa Madura SPM MTs
• Potensi Carok Reaktifasi Seppur Madura
• Gol Nyake’e Ate: Final Indonesia V Thailand
• Okara Kakanten Basa Madura
• carpan: Ejapa

 

“Mon ba’na baramma ma’ ta’ khatam keyanna?”

 

“Sengko’ tao ambu ta’ ngaji abit karna sake’. Mare sake’ abit pas sengka se ngajiya pole. Daḍdina ya ta’ bisa nabang khatam. Dina ta’ rapa, sengko’ sabiyasa maske ta’ nompa’ jaran sateya.”

 

Mamat apekker. Se ekaoca’ Bulla epekker onggu. Kemma parlo, nompa’ jaran bi’ ngaji? Mon gun terro nompa’a jaran bisa entar ka tase’ Slopeng e Songennep, kennenganna oreng arekreasi nyare tatenggun mon totopan. Coma olle senneng malolo ta’ olle ganjaran mon gun nompa’ jaran.

 

Ban pole, Mamat enga’ ka oca’na Nyae bari’.

 

“Eppa’ bi’ ebo’na ba’na, Cong, tanto perak mon ngeḍhing kabar ja’ ba’na khatam ngaji Qur’an-na. Apa pole gun nompa’a jaran, maske menta haḍiya apa bai paggun etekkane bi’ eppa’na. Poko’ ba’na toro’ oca’ asakola pateppa’, ngaji pakodu.”

 

Maske ta’ ngoca’ pa-apa ka Bulla, saongguna Mamat arassa akalangkong ka Bulla karna olle pekkeran anyar.

 

***

 

“Nye, sengko’ nompa’a jaran taon ḍhateng bai, Nye. Ta’ rapa sateya ta’ nompa’  jaran. Sengko’ toḍhus mon noro’ nompa’ jaran malolo tape sengko’ ta’ noro’ khatam ngaji.”

 

Nyae tacengnga’ mengnga’  tape ta’ ca’-ngoca’. Nyae arekkep Mamat asokkor dha’ se Kobasa. Alhamdulillah, kompoy anḍhi’  pekkeran bagus, ca’na Nyae e ḍhalem atena.

 

 

Karduluk Maret 2022

 

*Juwairiyah Mawardy

*Carpan paneka ampon ngombar e Majalla Jokotole edhisi kapeng 26 (Januari-Juni 2022) kalaban eja’an 2011. E halaman paneka, carpan paneka aguna’agi eja’an 1973.