Lalampan.com. 1444. Kabar bakal badhana seppur otaba
Kereta Api se lakar epaodhi’a pole sareng Bupati Songennep akantha angen barat,
sabban are sabban malem oreng atotoran ja’ seppur bakal epaodhi’ pole. Banne
gun oreng attas se tao ja’ seppur paneka bakal odhi’ pole, namong oreng baba,
oreng kene’, kantos dagang juko’, dagang embi’ kantos padara’an, tokang andhu’na
dara, sampe’ tokang oker jugan oneng ja’ seppur bakal odhi’ pole. Tantona badha
se pera’ tor badha jugan se sossa.
Manabi ngabas seppur otaba kereta api e tana jaba,
lakar lebur, kare nompa’, toju’ pasepa’, seppur mangkat, aba’ taleyer sampe’
tabu’ kepa’, ta’ ekarassa temmo dhapa’. Napa pole samangken, sanajjan seppur
ekonomi neka berse, sampe sobung oreng ngemmes, sobung oreng ajajjuwal se
biyasa esebbut asongan, saenggana ta’ enger, tor ta’ agalinjar, poko’na nyaman.
tanto paneka daddi kabar se samporna. Namong kadipana manabi badha seppur e
Madura?
Maos jugan
Saestona rel seppur otaba jalanna seppur neka ampon
badha melana ekoca’ reaktifasi, maodhi’a jalanna seppur, tana tantona ampon
badha, namong tana-tana kasebbut samangken ampon ekennengnge, badha se pon
daddi koburan, badha jugan roma-roma se jaga eattasanna jalur seppur ganeka.
samangken tana-tana se biyasa daddi jalanna seppur
ampon epatok, etandhai, badha pelar pendha’, paleng satengnga meter, badha baca’anna
KAI, ka’dhinto tandhana, patok, jugan papan informasi se aessa himbauan sopaja
ta’ majaga roma e seddi’na jalan paneka, manabi ngabas lorossa patok kasebbut,
badha se pon loros ka dhapor, badha enggi lebat romana oreng, enggi teppa’
bagian inti romana, mon gun senga teras, taneyan adha’ me’ gi’ pendhanana, aneka
pas teppa’ roma. Tanto paneka se bakal daddi paretongan se ta’ gampang. Badha
jugan se lebat ekoburan. tanto paneka daddi parembagan se ta’ gampang
rembaganna.
Manabi akaca monggu pan-sanapan tempat tor
kennengngan se ka’dhimma dhalem mabadha’a infrastruktur akadiya Bandara, jalan,
tor laen samacemma se ta’ etarema sareng masyarakat tor magarsarena, tantona
banne namong konflik, namong carok samadura, padha na’ poto madurana, napa pole
makam se ampon ataoanan, bakal ebungkar asabab seppur bakal lebat, tanto bannya’
ba’-aba’an banne coma bakal ngalocor aeng mata, namong jugan bakal ngalocor dhara.