Lalampan.com. Arokat Lalampan asma lengkap jangkep epon (nama lengkap), namong neng bagian laman otaba website, aba’ coma aguna’an lalampan.com, malle ta’ pate lanjang. Samangken ampon ajalan tello taon, tanto banne bakto se sakejja’, manabi ebitong arean, napa pole kalaban kalakowan se cokop berra’, nyare tolesan, agabay tolesan, napa pole basa Madura, tor kateppadan ta’ gadhuwan obang otaba Tandha Pangesto (fee) monggu dha’ taretan se kasokan nyerrat (noles) Basa Madura neng lalampan.com paneka. Pangarep lakar Arokat Lalampan (youtube epon) bisa duli ngaolle rajekke se raja, saenggana bisa apareng tandha pangesto monggu taretan se kasokan nyerrat neng lalampan.com paneka.
Kaula (Sakanca’an sareng tim se nyeppowe) saestona pajat asajja nyaba’ tanggal kababbaran epon e bulan Sora (Muharram) tor tanggal Settong otaba Tanggal Sakaleyan, asabab tanggal settong paneka, bulan gi’ akadiya sadha’ (celurit), hahaha. E taon 2022 kateppadan bulan juni-juli awal tahun hijriyah, kaula lakar terro onggu se gadhuwana website basa Madura, sabellun jugan agabay, akadiya salongar.com, sabellun paneka jugan badha kakak se bak seppo enggi paneka Arsip Prosa Madura, tor jugan kakak se seppowan pole, enggi paneka Arsip Puisi Penyair Madura Se-Indonesia, ta’ oneng ka’dhimma’an mangken pon. Sadaja paneka aropa’agi taretan. Taretan dibi’.
Manabi epareksane are mangken, kalowaran se kabidan banne e tanggal juni-juli, namong bulan November, asabab badha kakalerowan, badha hal-hak teknis se gi’ ta’ ekagali saenggana pas bannya’ se kodu epatoron (ehapus), enggi badha se epakalowar (eupload) pole. Jugan logo se aba-oba tor en-laen epon.
Manabi pangaterrona enggi pajat bisa emaos bannya’ sareng oreng, banne namong dhari Madura, namong kantor are mangken, kunjungan web paneka pajat gi’ sakone’, kadhang enggi dhuratos (200) enggi kadhang ta’ dhapa’, samangken pasera se maosa basa madura, samangken pasera se par-lo(wa) ka basa Madura. Egabaya napa Basa Madura. Napa tojjuwanna penter Basa Madura.
Manabi pangaterrona enggi pajat daddi Yayasan, malle padha akadiya Yayasan se pon badha, mangkana kadhang etoles kalaban Yayasan Arokat Lalampan. Manabi sampeyan terro/lebur maos/maca Basa Madura lebat media sosial, lalampan coma gadhuwan dhuwa’ media sosial enggi paneka tiktok: Lalampan Book Store (ta’ abasa madura sakale), facebook sareng youtube padha: Arokat Lalampan. Web epon enggi: lalampan.com.
Essena enggi paneka ngabarragi ja’ neng web neka badha tolesan anyar se ngombar, kalaban poster otaba foto: tambul epon neng lalampan.com se badha neng amper (HOME) enggi paneka: TAMBUL (aesse berita/news), SALERA (biografi), CARPAN & CERPEN, PUISI (sempat badha SANJA’, namong akaton bannya’ gallu’, tape sobung se ngesseyana, nyamana epasettong), ESAI, ESAI BASA MADURA, PARAMASASTRA, RESENSI, UMPAN LAMBUNG (Kabar Bola). Manabi sampeyan dhari samangken kasokan, enggi ngereng kerem lebat email: arokatlalampan@gmail.com otaba lebat wa: 0819-0807-1122. Dhimen lakar apangara se ajuwala buku, namong ta’ kowat se ngajengngana.
Aponapa ma’ pas bannya’ essena akadiya carpan otaba sanja’, esia, paramasastara, pangaterro se paleng gampang enggi paneka sopaja basa Madura daddi baca’an. Akadiya basa-basa se laen, manabi basa madura neka epanggi neng ka’dhimma bisaos, tantona basa Madura neka daddi baca’an, emaos eka’dhimma bisaos, tanto kalaban tolesan se langkong sae. Teppa’. Manabi sabban are apanggi ka tolesan basa Madura, neka cekka’, nyaker dhalem pekkeran. Eabas sabban are, etengale sabban are. Namong enggi samangken baca’an neka pon banne gu’-ganggu’ se langkong sae. Maca pajat banne kabutowan monggu oreng ka’dhinto.
Tanto manabi ampon banne baca’an, banne kabutowan, napa pole basa Madura paneka banne basa otaba, akadiya Basa Arab, se bisa ebakta ka aherat, otaba basa Inggris se bisa ebakta ka dunnya (hahaha), artena manabi oneng basa Inggris aneka bakal bisa entar ka man-ka’dhimman (manabi andhi’ pesse), tor jugan ngarte kabadha’an dunnya, informasi dunnya, sanajjan samangken ampon gampang nerjema’agi bacaan ponapa bisaos.
Basa Madura lakar kodu daddi baca’an se teppa’, sopaja basa madura paggun daddi basa e romana dibi’, manabi ampon banne basa e romana dibi’ (e madura), tanto Basa paneka (Madura), bakal daddi Basa Asing. Enggi paneka Basa se pon rangrang ekagali, rangrang ekaonenge sareng bangsana dibi’. Basa Asing aropa’agi basa se ta’ eguna’agi sabban are, dhalem re-sa’arena, e roma, e pasar, e songay, e somor, nyello’ aeng, manabi pon ta’ abasa Madura, tantona Basa Madura paneka, bakal asing kalaban dibi’na, elang ta’ elang enggi paneka ca’epon para rabu sadaja.
Tanto badan kaula coma bisa apareng oneng. Manabi ekaparlo enggi ngereng. Manabi bunten?
Mator Saebu Sakalangkong monggu sadaja se ampon kasokan maos tor kasokan ngerem tolesan monggu lalampan.com. 1 Sora 1444 – 1 Sora 1447 (tello taon).
Pimpinan Yayasan Arokat Lalampan