SORA
Menangka bulan
tora
pamokka’ pengaro,
mowang batharakala
tajin ekarebba
banne sakeng berda
banne sakeng eber
pon ta’ adhara
sabab badha’ aba’
se ekaemba
nyare embana rebba
dhari tompana du’ana
ekatadha
kalaban nyorsor,
odhi’ mandelik nyangsara
sabab somber
settong, esoso dhari sadaja ara
e bulan sora
bannya’ oreng
agangse pakakas
epanyellem ka
dhalem sokma
cethak etapet ka
dhalem bume
sopaja langnge’
ta’ nyengnge’
sopaja langnge’
panggun kalaban pornama
Labbuwan Jembar, Sora, 1442
CARETANA ORENG ABINE
caretana oreng
abine # antara lalake’ ban babine’
bur-leburan,
neng-sennengan # enggi kadhang akareggingan
nyopre odhi’,
atane # bila anye bisa atana’
badha se adagang #
nyopre bisa adaging
nyamana oreng
odhi’ # sadajana egi’-gigi’
malem juma’at
nyonson # dha’ Se Kobasa anyo’on
dha’ Se Kobasa
mator kasoon # rajekke pon aton-ronton
mon sakabbiyanna
ebirji’ # mon palang gunna baji’
caretana oreng
ala-bala # padha esto padha emba
kakanna sabrang
longga # asandhing cabbi buja
odhi’ kalaban
aloloja # bila mate olo dhaja
ja’ mangka’ dha’
lakona # labun pote paggun bundu’na
lebur onggu
pangestona # ta’ ka bellis mon odhi’na
rajekke ondur
dhateng # alako paggun barenteng
ta’ cokba paggun
pelak # ka saba asango kolek
nyoba’ namen bako
# maske ontong gi’ nanto
mon abine pateppa’
# sabab ta’ ekabuto sakejja’
banne gun kancana
agaja’ # jugan ekaparlo bila manja’
nyamana odhi’
pasthe korang # tape ta’ kodu saleng berrang
la-ngalae banne
kala # polana apangrasa sala
Labbuwan Jembar, Sora 1442
SOKANA
bila pon lesso
ajuma’ ban ngaso
ja’ amaen napso
manna daddi burnyo
sabban oreng padha
terro
ala-bala ban ana’
poto
bunga tompang
taresna
nyengla majau
dhari talkana
padha kalaban abalangngaja
tekka hajat dha’
sajja
sajjana odhi’
lebur
kembang malathe
atabur
tape bato, juglang
kadhang daddi
lang-alang
badha jalan
nyerang
malle bisa
nyabberang
dhalem odhi’ lesso
kadhang gi’
atompang lempo
jalan pajat ta’
nanto
sela lelere gi’
tasaleo
mabannya’ sango
malle nyaman bila
ngaso
ngaso banne ta’
kaburu
sakeng gun bu-ambu
nompo’ ora’ se pon
retto
kalaban sojud ban atempo
Labbuwan Jembar, Sora 1442
BAKO
panas ban ta’ ojan
daddi arebban
panas nyengnge’
ta’ ekarassa
nyare rassa marena
aban-dalumban
abidhing, maongga
sajja
nyeram bume,
nyarbu pangara
ngeccer, malandhu
eber
argana bako ta’
nanto
embar, kabar
nyalebar
pa’ tanena
nyalabar
ondhem petteng,
nyalemot nyapot
rese’, nyapcap
aeng mata
dhara amardha,
nyaba ta’ dhugga
pekkeran orjek,
panggaliyan serbek
bako etartar e
bidhek talpos
atane kasta, tombu
sossa
bako-bako ta’
tombu solang
pola daddi
pamellang
sossa paggun ta’
elang
garusu’, dhaun
kerreng
akantha odhi’na,
berging
Labbuwan, Sora, 1442
BUJA
nyapcap aeng ojan
ngalampar sagara
sonar panas
ngalampar ka sagara
garinap omba’ pote
garinap buja pote
egarap sampe
merres pello
lake-bine, mekol
ban nyo’on
seddha’na
magersare
pa’ tane nangdang
posang
e babana panas are
buja pon ta’
andhi’ arga
bujana pon ta’
accen pole
tadha’ oreng buto
buja caabi
pello koneng,
nyapcap aeng mata accen
agalibis kemme
attheng
maongga buja ka
renjing
epekol
jing-tajijing
argana
gumbang-gumbing
rembit!
ha
ha
ha
ta’ paju
sagara bujai
Labbuwan, Sappar 1442