Pajjar ngombar. Ora’ barenteng. Narajang. Aba’na
jaga. Mangkat ka budhiyanna dhapor. Ngemme’e bungkella (bung)kana geddhang.
Malle sajan gapo. Salaen ekemme’e sabban laggu, geddhang lomot ganeko eseram
bila pon para’ compet are. Kacong ganeko mare akemme e bungkella (bungkana)
geddhang terros ka jeddhing. Awudu’. Abajang. Toron. Entar ka budhiyanna
romana. Nyarbu tales se pon bannya’ oreng ta’ abikes. Tales ekala’ tombuna
dibi’, ekala’ patena dibi’, bariya kalaban kalentheng, sobek, lorkong.
“Sengko’ nyombada nyeor, ya bu’.” Oca’na ka embu’na
sambi ngala’ rajang se nonggilang olo
dhaja, bungkella rajang ganeko abantal salone seppet coklat.
“Agabaya apa cong. Ban sambi ba’na ta’ kera kellar
keya se nyombada.”
“Teya ereken na’-kana’ kene’ parana. Etonowa, bu’.
Agabay sekkol tono. Ro’om wa bu’. Padhana bila ngakan ban eppa’, bila eppa’
toron nae’. Ngakan abareng.” Oca’na ana’ ganeko. Ngedhing oca’na ana’na.
Babine’ ganeko nyarembeng aeng mata. Pasda gallu’ ja’ kacong ganeko kerrong ka
mama’na se pon olo dhaja. Embu’na ta’ metto oca’. Molae mama’na olo dhaja e
Koddhu’ Alas, kacong ganeko laju towa nyakaleyan. Pelak long-nolonge, sanajjan
coma nolonge ngempo’ nyeor, ngempo’ la’as, adabu’ oto’. Tor ta’ loppa se maca’a
bukuna.
“Dhamma’a cong?”
“Ngala’a maronggi kona Man Burawi. Esoro ngone’e
ba’ari’.”
“Iya, te-ngate, cong! Buhhh ella ra, maske
na’-kana’, batheng onggu akalla.” Aeng matanya ngerray ta’ ekarassa. Dika cong,
mandhar tekka hajat keya. Malle padha ban se laen. Bunga keya budhi are. Ta’
sang-posang ngalengsang cara neko malolo. Karettek panggalian embu’na
Kacong ganeko pon ngontap dhari jalan bara’na
romana. Tanang se kacer neggu’ maronggi, tanang se kacer neggu’ sabrang karet.
“Eya’, Bu’. Sengko’ nyareya rambanan embi’. Malle lekkas raja ban lempo
embi’na. Aeng lerrena e saba’ kan Bu’?”
Maos jugan
- Sanja' Taresna, Helmy Khan
- Carpan: Andharun
- Sajan Abit Oreng Atane Sajan Tadha'
- SUNDAY KILLER
- Lukisan Musim Lalu
“Iya kassa’, senga’ te-ngate ne’-nae’an. Senga’
labu, cong. Sanonto locanan!” capcaban aeng matana pon ta’ kabitong. Ta’ kellar
onggu se namba’a, nape pole ngedhing oca’ aeng lerrena, ja’ are sanonto gi’ ta’
nemmo berras, sanajjan berras jagung gi’ ta’ nemmo keya. Pon abit tadha’
raowanna saba. Pon abit tadha’ oreng ngajak ngaju’ oto’, otaba sakadar ngajak
alako nyo’on kaju, karana kaju-kaju, palangpeng, kolare, manyang pon eangko’
dibi’. Babine’ ganeko bila malem nganggi’ taker, molae dhari ajemmor ra-kara, nongkes,
ngelas, ban nganggi’ teker, tape teker sanonto gi’ modha, sakejja’ laggi’ se
laranga. Teker-teker ganeko bakal ekabundu’ bako. Tape ca’na bako sanonto
modha. Dhu nape sajan se daddiya balanja. Otang ka tokona Ji Monentar pon raja.
Bannya’ gallu’, sengka keya pon se aotanga pole. Sela bariya binena Ji Monentar
careme. Bila kare acaca ngatalbes. Nyacca. Tadha’ karena.
Babine’ ganeko naltal nyeor. Dhaunna sabrang karet
pon ekolop, pas naltal nyeor sopaja lekkas etono ka tomang. Dhamma kacong ma
gi’ ta’ dhateng se ngala’ rambanan. Ja’ biyasana ta’ abit. Karettegga babine’
ganeko. Sampeyan biasana baja mangken badha e attas tarebung, sambi
adhing-gendhingan, aorak sakanca’an, lok-ologan. Napa pole bila nengngale dara,
se sabanganna ranyeng. Sampeyan biyasana pon masenga’ se melleya jagung ka
angguy darana, kaangguy kacong. Samangken, molae sobung sampeyan, pon abit ta’
nyellip jagung. Dina pasan panggilisan ebaccowana. Sapa tao badha oreng arebba
jagung. Malle bisa egilis, ta’ kera abit.
Dhari paddu mordhajana dhaporra kacong ganeko pon
jing-tabarijing nyo’on rambanan. “Berra’, Bu’.” Oca’na. Rambanan edilbas.
Abas-gebbas lengngenna. Ngala’ sakone’. Ebagi ka embi’na. “Laon gallu, bu’.
Entara dhassa’ pole, badha sapa ro, Ba’ Mujanna lok-ologan apa buru. Sengko’
esoro entar dhassa’.”
“Baa apa, ca’na.”
“Ta’ tao keya. Gunna nyoro entar dhassa’.”
“Ya kassa’. Te-ngate cong. Jalanna jadhiya sara.”
“Mon gunna jalanna, napa. Aneka se ngala’ rambanan
buru, buhh kalengnga ngoso’. Sengko’ katon ekamosowa kose.”
“La nemmo bai ba’na, cong!”
Kacong ganeko pon mangkat ka romana Mujanna. Dhapa’
kadhissa’ epagibai jagung sakanthong. “Eya’ sellip dibi’ ya. Ja’ lan-cengkalan
ya,”
“Enggi, kaso’on. Ta’ kera cengkalan. Paleng baranca
ka kanca.”
“Iya, mara jareya, palebur akanca. Malle ta’
atokaran sakanca’an.”
“Mon atokaran biyasana ta’ asapa’an.”
“Batheng ba’na kose. Atowa’an ban salebbarra cong!”
“Dinggal kaula palemana gallu. Aneka mangkada
asakola pasan.”
“Iya la. Kassa’.
Dhapa’ ka bengkona, kacong ganeko magi kanthong se
pon aesse jagung bungkol.
“Bu’, eberri’ jagung mon Ba’ Mujanna. Soro sellip
dibi’ ca’na.” Kanthong ganeko ebukka’. Jagung ce’ bannya’na. Kacong mandhi se
mangkada asakola. Babine’ ganeko ngorpeng. Kacong mangkat asakola.
“Sengko’ gella’ malas gerrungan ngakan nase’
jagung.” Sala settong oca’na kancana kacong ganeko dhalem kellassa. Guruna gi’
ta’ dhateng. Na’-kana’ moret asaloy.
“Sengko’ gella’ ngakan nase’ pote ban juko’ tamban.
Elambane pecegga rante, pettes, asirut.” Saodda kancana se laen.
“Sateya badha PR apa ya…” Tanya kacong ganeko,
sopaja ta’ acaca nase’ malolo.
“Adha’ PR sateya. Iya, gella’ sengko’ ban tellor,
gangan mei.
Kacong ganeko neng-enneng. Gunna agutgut. Bukuna
Biologina ebukka’. Jagung bannya’ agindu’ nutrisi, salaen makennyang, kowadda
abidan. Angora’an. Guruna dhateng.
“Na’-kana’ reya se ekoca’ sehat, iya areya kodu
ngakan empat sehat lima sempurna. Iya areya se gampang nase’, nase’ pote nase’
jagung, juko’, sayuran, lambajung, terong, tahu, otaba tempe, la padha.”
“Mon ngakan tales otaba sabrang anapa, pak?” Kacong
ganeko atanya. Esangga’ kalaban gella’na ca-kancana
“Iya ta’ cokop, cong. Ban sambi masa’ gun ngakana
tales malolo.”
“Enggi anapa?” Ca-kancana paggun agella’ ngasowar.
“Masa’ gunna ngakan tales, ya ta’ kennyang. Ya ta’
kera lempo, kana’. Berging!”
Kacong ganeko mengkem. Ta’ andhi’ sowara pole. Arapa
tales, sabrang, obi, longga, mata’ maso’ ka buku tayya. Apana salana ngakan
longga, sabrang, tales, jarengan sengko’ kennyang keya. Apana pole bila eorap
kalaban sekkol tono. Otaba ekagabay sassarap. Sassarap sabrang. Sengko’ kenyang
keya. Ngakan tales kalaban gula. Ngabi’ tello’an se mara lengngen la kennyang.
Ca’na embu’, berras larang. Ca’na paman iya keya.
Berras larang. Ban sambi, ebudhiyanna roma tanana kerreng, tana teggalan.
“Anapa mata’ bisa namen padi bila nemor pak?”
patanyanan ganeko paggun ekala’-gella’.
“Kodda’ mon atanya’ se laen bainan, wa, cong!”
Oca’na kanca se laen.
“Se la nemor gi’ namenna padhi, bariya cong. Tadha’
aengnga. Padhi rowa etamen e saba se bannya’ aengnga. Banne nengnge teggalan.
Ya mon namenna e teggalan poko’ kowat se nyerama.
Ngakan tales, sabrang otaba longga bagus keya. Nase’
jagung. Kandungan nutrisi padha. Mala abagusan etembang nase’ berras. Ta’ pate
akibat ka kolesterol.”
“Owh…”
Are pon aban. Kacong ganeko mole. Aba’na pon lapar.
Kaburu ngakana. Dhapa’ ka bengkona. Nojju dhaporra. Embu’na pon ase-berse
panggilisanna. Nase’ jagung pon kasadhiya.
“Embi’na mare enome, Bu’?” Kacong atanya sambi
ngompa’ nase’ jagung kalaban orabba sabrang karet etamba sekkol tono.
Maos jugan
- Mertè Bhâsa Lèbât Karya Sastra
- Martabhât Orèng Madhurâ ḍâlem Bhughellân Traḍisi
- Rèng Binè’ Ḍâlem Kepkeppan Jhâman
- Madhurâ ḍâlem Kaca Sajhârâ
- Resensi Buku; Kerrong ka Ombâ’
“Ngakan ra gallu. Ta’ mare balekka’ ngakan la
mekkere embi’ ka adha’. Jarowa’ rambananna la tadha’. Buru engala’agi dhaunna
geddhang jadiya.”
“Pojur bannya’ bungkana geddhang. Janowa dhamma
nyareya rambanan, jarengan nas-panas.”
“Dina daggi’
pole re-mare asar nyare rambanan. Sateya panas gi’an.”
“Pasan dhamma’a, Bu’?”
“Areya matara bigina terrong. Sapa tao abuwa. Ca’na
ba’na terro ka guringnga terrong. Ban sambi me’ ekenneng juwal.”
“Ta’ namen labu, Bu’ ban kondhur.”
“Dina daggi’ melleya bigina labu.”
“Tape e Ba’ Mujanna biasana bannya’ bigina labu,
kondhur, rante, tomat, teggal papossa’ laju se nyaman kalaban sayuran nga’
ganeka.”
“Iya dina, mara cel-kocel.”
“Kaula pangarana pasan terro entara ka tase’, Bu’!”
“Ella, manna taselep padhana mama’na!”
Labbuwan
Kajembaran, 1442
Mat Toyu menangka pangarang buku kerrong ka omba'