Munawaroh Masyari otabâ sè lebbi kalonta kalabân
jhâjhuluk Muna Masyari, ka’ḍinto sala
sèttong pangangghit carpan Madhurâ sè kabhunjhul
nyareddhemi jhâghât sastra Madhurâ. Sajân nambâi bhunga nalèka carpanèpon sè
aombhul “Kasur Tanah” tapèlè mènangka
carpan pèlèan Kompas nèng taon 2017. Sabellunèpon, nèng taon 2016 “Celurit Warisan” jhughân tamaso’ carèta panḍâ’ pèlèan Kompas. Dinèng carpan sè laèn ampon
ta’ kabitongan polè sè èterbi’aghi nèng
pan-saponapan mèḍia.
Pangangghid
kalongghuân dhisa Larangan, Pamekasan ka’ḍinto sakalangkong patot tor parjhughâ,
ghumatè tarongghu ngèmpo’ tèngka ngajhum kabuddhâjhân Madhurâ kaanghuy ngopènè
lebât angghidhân sè aghândhu’ ogherrâ oḍi’, pangaonèngan rassa, tor adhât
parnata kona sè ampon bânnya’ ta’
kasambin. Meccodhi ngangoḍâdhân, merper abâ’ mènangka orèng Madhurâ, saèngghâ
jhurbhu dhâddhi tonalèna tèngka oḍi’ ana’ poto.
Sajân nodhuaghi
jhâ’ salèrana taḍâ’ tobengnga ngatorraghi karya nalèkana anggidhânèpon sè palèng
anyar, novel aombhul Damar Kambang, terbi’ nèng akhèr taon 2020. Novèl sè tebbelèpon
200 halaman ka’ḍinto aèssè 12 kapèng carèta sè salèng akaè’. Nyongkap carèta
adhât parnata kabinan sè sakalangkong kaponjhung è polo Madhurâ. Pangangghit
ngatorraghi Chebbing, mènangka jhejjher carèta, parabân sè bhâdhi alampa’aghi
kabinan sè ta’ nyambhâdhâni omorrèpon. Dhâddhi paèmot jhâ’ kabin ngoḍâ ka’ḍinto
ghi’ kalampan nèng pong-kampong. Namong, kabinanèpon Cebbhing ghelle’ dhâddhi
burungnga amarghâ ḍâri Kacong, pangantan lakè’, ta’ ngatorraghi bân-ghibân (hantaran) sè èkakarep bhisan pangantan binè’.
Sè Kacong coma abhâkta bhântal-tèker. Bhisan pangantan binè’ pegghel ta’
kenning ampet sabâb Cebbhing èarghâi moḍâ. Sajân nambâi panas atè, mènangka bân-ghibân
ka’ḍissa’ dhâddhi caca sè taḍâ’ potossa mongghu bhâlâ tangghâ. Ḍâlem adhât parnata Madhurâ ampon
kapra bhisan ḍâri pangantan binè’ nyaḍiâ’aghi bengko kangghuy èkennengngè
pangantan anyar. Dinèng cem-macemma parabhut otabâ èssèna bengko akadhi korsè,
kasor, lamari tor laènèpon ka’ḍinto èbhâkta sareng pangantan lakè’. Taḍâ’ laèn,
namong bân-ghibân ka’ḍissa’ aghândhu’ ma’na tanggung jawab pangantan lakè’
mongghu sè binè’ è ḍâlem aparèng kabhutoan oḍi’. Jhughân dhâddhi panegghes jhâ’
sè lakè’ ampon siap aparèng nafkah lahèr tor bhâten. Sajân ghenna’ bân-ghibân,
sajân santa’ ponapa pangalem, tor sabhâlikèpon. Maka pantes manabi orèng
seppoèpon Cebbhing pas ta’ ridhâ’ ngocol ana’ binè’èpon ḍâ’ Kacong sè ta’ abhâkta
bhân-ghibân. Sabâb ka’ḍissa’ samièpon artèna kalabân alombhâr mano’ ḍâ’ orèng sè
ta’ ngaghungè korong. Parsoalan tèngka lakar ta’ ghâmpang, sabâb panèka akaè’
kalabân hokom sosial sè taḍâ’ kètabbhâ namong ngoko è nga-tengnga kao’ḍi’ân maghârsarè.
Torkadhâng dhâddhi kalampan sè èkakapra.
- Abd Wali, Anak Petani Asli Yang Lulus Magister
- Peringatan Isro’ Mi’roj: Tanggalkan Kehidupan Duniawi
- The Talon as Training Camp of PERSIP
- 70 Anak Yatim Menerima Santunan
Bâḍâèpon carèta
carok tor mistis sajân nambâi ghenna’
jhâlân carèta. Akadhi cator kaoḍi’ân manossa sè lakar amancabârna. Sossa
senneng, loka lara, ampon taracèk kalabân palappa ghenna’ è ḍalem alampa’aghi
kaoḍi’ân. Tamaso’ jhughân ḍâlem carèta ka’ḍinto. Sè cebbhing ngalèngsang, sè
kacong buru posang. Sabâb sè kaduâ ampon kadung semma’ molaè ghi’ èpacangngaghi.
Dinèng orèng seppo paḍâ pegghel ta’ kopalang. Nalèka ta’ koat ngampet malo,
maka dhukon dhâddhi pèlèan.
Carèta èghenna’è
jhughân kalabân jhâjhârbâ’ân traḍisi kabinan sè ampon rangrang èlampa’aghi. Akadhi
tradisi mokka’ blabar, tradisi sè èlakonè
sabelluna pangantan lakè’ maso’ ḍâ’ pakaranganèpon pangantan binè’. Maskè èangghâb
sakral, namong acara mokka’ blabar segghut dhâddhi tatèngghun sè anglèburi
mongghu para rabu sè haḍir. Bâḍâ jhughân tokang tembhâng ḍâri pihak keluarga
pangantan lakè’ tor binè’ sè tugassèpon maos pantun les-bâlesan. Sajân jhârna’
kalabân bâḍâèpon prosesi moter dhulang,
moter pangantan binè’ sè alongghu è attas talam mènangka tandhâ kasiapan ajhâlâni
kaoḍi’ân anyar. Bâthek mo’-ramo’ sè èangghuy
nalèka bâḍâ karjâ jhughân negghessaghi jhâ’ kabinan ka’ḍinto mènangka ramo’ sè nyangkerremè
bhumi, sè bhâkal dhâddhi tandhâ tombuna ana’ poto (generasi) bhâkal ḍâteng.
Dhâmar Kembhâng,
mènangka tandhâ ritual kabinan, jhughân ta’ lopot ḍâri jhâjhârbâ’ân. Ètakèr ḍâlem
sèttong beddhe, aèssè minnya’, bhungkana gheddhâng sè èketthok panḍâ’ masaghi
empa’, bhughellân kapas, tor korè’ kaangghuy nyolèt dhâmar. Sabbhân-sabbhân bhârang
ka’ḍissa’ aghândhu’ ma’na filosofis. Misalèpon, 4 paddhuh bhungkana gheddhâng ama’na
aghâma, kahormadhân, harta, tor ropa. Amarghâ èangghâb karamat, dhâmar kembhâng ka’ḍissa’ kodhu ejâgâ sopajâ
apoy teptep oḍi’. Sabâb, manabi dhâmar ka’ḍissa’ matè, aparèng tandhâ sè ta’ saè.
Muna Masyari ajhârbâ’aghi ma’na filosofis dhâmar kembâng kalabân jhârna’ lèbât
dhâ-kandhâ (dialog) tokoh antara
tokang ngèas sareng cebbhing.
Tantoèpon,
hal-hal akadhi ka’ḍissa’ dhâddhi nilai tambâ. Sabâb kalabân majhuna jhâman,
ngangoḍâdhân ampon ta’ kadhâruy polè kaangghuy ngaonèngè, kong-langkong ajhâr
adhât parnata kona. Ponapa polè jhâman mangkèn ampon rangrang bâḍâ traḍisi kabinan
akadhi ka’ḍissa’.
Lakar ngapèncotè
maos novèl ka’ḍinto. Salèrana ngobâsanè ḍâlem mèlè diksi / narasi bahasa sè
tor kadhâng aghândhu’ irama suku kata sè samè, saèngghâna serradhân lèbur èmaos.
Pèlèan majas sè èghuna’aghi adhâddhiâghi carèta sajân oḍi’, aghuthèk èmosi
paramaos saèngghâna noro’ ghumbhirâ, pegghel, tako’, torkadhâng seddhi. Sabâb
lakar, pan-ponapan manabi èatoraghi kalabân bhâsa sè paraddhu tor saè bhâkal dhâddhi
kakoatan sè rajâ mongghu serradhân. Nèng laèn hal, pangangghit ghumatè è ḍâlem
ajhârbâ’aghi karakter tokoh sè koat.
- Multikultur Bukan Masalah Bangsa Kita
- Sanja'na Khalil Satta Elman
- Empa’ Buku Sastra Madura Eterjema’agi
- Buku Sastra se Ngaolle Tandha Pangesto
Amarghâ
nodhuaghi kamadhurâ’ânèpon, pangangghit segghut masèssèl
ca’-oca’ bhâsa Madhurâ. Eghenna’è jhughân kalabân glosarium bhasâ
Madhurâ
nèng è bingkèng sè dhâddhi
tambâ’ân pangaoningan mongghu
paramaos akadhi ater tolo,
arabas pagar, nyedek temo, tor laènèpon.
Angghidhânèpon
Muna Masyari ka’ḍinto lakar segghut ngatoraghi carèta latar kaoḍi’an orèng
Madhurâ sè sarat kalabân lokalitas, spritualitas, tor tèngka pola nèng adhât
parnata kona. Namong manabi ètalèktèghi, carètaèpon ghi’ kental kalabân nilai-nilai
patriarkis sè asareddheman, sè ka’ḍimmah posisi rèng binè’ ka’ḍinto lebbi inferior katembhâng rèng lakè’. Peran rèng
binè’ segghut pasif tor pasra ḍâ’ kabâḍâ’ân, namong rèng lakè’ sè anḍi’ kobâsâ.
Dhâddhi èbhu, ana’ otabâ binè, rèng binè’ ta’ kèngèng bennya’ tèngka, ngatorraghi
oca’, kong-langkong alabân. Salaènèpon Chebbhing, bâḍâ jhughân èbhuna
chebbhing, èbhuna kacong, tor binè kè Bulla sè nomer duâ’, sè paḍâ ngaghungè
carèta bâng-sebâng.
Sè kapèng duâ’, sakalangkong
patot manabi ca’-oca’ ḍâlem bhâsa Madhurâ
èghenna’è sarèng tandhâ diakritik, kaangghuy abhidhâ’aghi antara keccabhân /è/ tor /e/, saka’ḍinto jhughân antara /â/ tor /a/ sè bhidhâ ḍâlem bhâsa
Madhurâ. Hal ka’ḍinto sopajâ taḍâ’ kabhingongan
mongghu paramaos. Kong-langkong manabi bâḍâ oca’ sè ta’ èkaghâli. Bâḍâèpon
tandhâ ka’ḍissa’ dhâddhi maghâmpang paramaos è ḍâlem maos carèta.
Sanaosèpon taḍâ’
kasampornaan, terbi’na buku ka’ḍinto ta’ lopot ḍâri kakorangan tor jhughân
kalebbiân. Dhâddhi panganyet terro sè ghumatè è ḍâlem mèrtè karya sastra khususèpon
khazanah sastra Madhurâ. Maos novèlèpon Muna Masyari akadhi ajhelling traḍisi nèng
Madhurâ sè amancabârna, sè tantona parlo èkaghâli tor dhâddhi pangajhârân
kaangghuy metthèk hèkmana, tor jhughân kèngèng dhâddhi panglèpor atè mongghu
paramaos. Mèlaèpon, samastèna buku ka’ḍinto parlo esambhut kalabân ghumbhirâ. Moghâ
dhâddhi pangasokan mongghu paramaos!