Rèng Binè’ Ḍâlem Kepkeppan Jhâman
Karya sastra amanca bârna ropaèpon. Bâḍâ sastra sè
èserrat mènangka bur-leburân (hiburan) mongghu para maos. Bâḍâ sè èserrat
kaangghuy ngèket sajârâ sopajâ dhâddhi pangaonèngan tor pangajhârân. Misalèpon,
lebât novel-novel angghidhân Pramoedya Ananta Toer, paramaos bhâkal onèng kadhi
ponapa representasi sosial bhudhâjâ nèng jhâman kolonial. Nangèng segghut
jhughân karya sastra aropa’aghi tokèlan ḍâri kabâḍ’ân (realitas) ḍâlem kaoḍi’ân
rèn-saarèn, sè è ḍâlemèpon tasessel kritik otabâ pamangghi mongghu tèngka
ghulina maghârsarè, aghândhu’ paèmodhân, tor aghuthèk pangghâliyân. Akadhi sè
èdhâbuaghi WS Rendra, sala sèttonga sastrawan Indonesia, jhâ’ sastra sareng
kasenian ka’ḍinto saèstona kodhu aghândhu’ artè sè kèngèng èpondhut sareng para
maos, kèngèng èpetthek dhâddhi pangajhârân tor kaca kebbhâng.
Sarojhu’ sareng dhâdhâbu ka’ḍissa’, bâḍâ sèttong
pangangghit binè’ sè addhreng ngopènè tor ngajhum carèta-carèta kaoḍi’an, sè
meddhâl tor tombu ḍâlam maghârsarè. Elok Teja Suminar asmaèpon. Pangangghit
binè’ sè bhâbbhâr è Kabupatèn Bhângkalan 14 Juli 1983, nyongkap realitas sè
ngoko kowat ḍâlem kaoḍi’ân rèng Madhurâ ḍâlem satengkes carèta panḍâ’ aombhul
Parabân Tuah. Buku ka’ḍinto aèssè 11 carpan sè sabâgiânèpon perna terbi’ è
media. Duâ’ carpan èserrat saamponna neptep è Bhângkalan, dhinèng 9 carpan sè
laèn èserrat nalèka salèrana ghi’ bâḍâ è Lampung. Sabâb dhujân maos buku-buku
sastra ngabidhi dhimèn, pas aghuthèk pangaterroèpon kaangghuy nyerrat jhughân.
Maos jugan
- Nice Girl Syndrome; Penyakit Psikis Remaja
- Puisi Muhtadi ZL: Jarak yang Kukejar
- Ibu; Madrasatul 'Ula Seorang Anak
- Memahami Fikih Pandemi
- Luka yang Menua
Parabân Tuah èpondhut ḍâri sala sèttong carpan sè
aombhul samè. Nyarèta’aghi Ḍiḍin, rèng binè’ sè ta’ ghellem akabin sanajjân
omor ampon nyambhâdhâni. Sabbhân bâkto, sè èbhu ta’ bu-ambu maènga’ sopajâ
dhuli nyarè bhâkal. Dhinèng Ḍiḍin ta’ marḍuli’i. Konflik sajân atambâ nalèka
alè’na Ḍiḍin nyo’on èdhi kaangghuy jhujhuk akalowarga. Mètorot traḍisi, ana’ sè
ḍâ’-ngoḍâ’ân ta’ kèngèng adhâllui kabin. Manabi adhâllui, rajâ parsèko mongghu
sè towa’an, akadhi malarat nemmo jhudhu otabâ ta’ paju lakè. Bilâ ampon malarat
nemmo jhudhu, dhinèng abâ’ sajân ètabâng omor, pas metto jhâjhuluk parabân towa
ḍâri bhâlâ tangghâ. Dhâddhi, rèng binè’ ka’ḍinto aromasa bâng-tatabâng sareng
angghâna omor sè nyambhâdhâni (ideal) kaangghuy akalowarga. Pramèla ḍâri ka’ḍinto,
lajhu bânnya’ rèng seppo sè kabhuru aghâdhuwânna manto. Torkadhâng bâḍâ
na’-kana’ sè ampon èpacangngaghi ngabidhi ghi’ bâu kencor.
Sè dhâddhi ka ta’sondhughân èngghi ka’ḍinto rèng
binè’ segghut dhâddhi parbhândhingan sareng bhârâng sè ta’ kennèng èdhâ’âr
otabâ ta’ kèngèng èghuna’aghi polè sabâb ampon talèbât ḍâri bâkto sè ètantoaghi
(kadaluwarsa), manabi ta’ ghellem akabin. Pramèla bâḍâ jhâjhuluk parabân towa,
parabân sè ampon talèbât omor ngalampa’aghi kabin. Bâḍâ pamangghi jhâ’ rèng
binè’ ka’ḍinto angghâna omor 25 ka 30. Bâḍâ jhughân pamangghi sè laèn, rèng
bine’ kodhu akalowarga sabelluna omor 25. Lebbi ḍâri ka’ḍissa’ pas èangghâp
parabân towa. Nalèka ta’ dhuli paju lakè, rèng binè’ ghellâ’ lajhu dhâddhi caca
sè amacem mongghu rèng laèn. Bhidhâ sareng rèng lakè’. Sanajjân bânnya’ jhughân
rèng lakè’ sè ta’ dhuli abinè, nangèng rang-rang bâḍâ jhâjhuluk “lancèng towa”.
Hal ka’ḍinto mènangka konstruk sosial sè malarat kaangghuy èobâ.
Carpan Parabân Tuah mènangka parlambhâng serronah
pangangghit tor bâgiân ḍâri ekspresi ka ta’cocoghân mongghu traḍisi sè ghi’
kapra è maghârsarè Madhurâ nangèng ampon ta’ akor kalabân jhâman mangkèn.
Saèstona, ampon ta’ kèngèng akarangkèng rèng binè’ ḍâlem bâtesan omor kaangghuy
akalowarga. Sabâb kalabân majhuna jhâman, ampon ta’ kabitongan polè rèng binè’
sè lebbi senneng nerrosaghi nyarè èlmo kantos ka sakola’an sè lebbi tèngghi.
Otabâ rèng binè’ sè lebbi mèlè kaangghuy acabbhur nèng aktifitas sosial sopajâ
bisa aparèng manfaat mongghu orèng laèn. Nangèng kadhâng sè aghândhu’ bhingong
tor dilema, nalèka karep ta’ akor sareng pangghâliyânèpon orèng seppo. Dhinèng
manabi alabân, eangghâp ana’ sè dhârâka.
Saterrosèpon, nèng è carpan sè laèn, pangangghit ta’
coma ngatoraghi konflik personal, nangèng jhughân aghuthèk peran marjinal rèng
binè’ ḍâlem rèlasi kalowarga. Akadhi ḍâlem carpan aombhul Orok, Mitun, tor
Sarung Emmak, sè ka’ḍimma rèng binè’ ta’ kèngèng aparèng pamangghi ḍâlem
sabbhân-sabbhân kasempadhân otabâ parembhâghân. Rèng binè’ ta’ lebbi ḍâri
sakadhâr aladhini lakè. Dhinèng ḍâlem kalowarga, lakè sè negghu’ kobâsa, sè
kodhu ètoro’ pamangghièpon, tor dhâddhi dhukana ḍâ’ ka binè manabi ta’ atoro’
oca’.
Buku sè bhuru terbhi’ nèng taon 2021 ka’ḍinto
jhughân èghenna’è kalabân tèma laèn, akadhi carpan sè aombhul Bhubuen,
carètaèpon Zain sè burung ngabin Laila sabâb kaaddhângan parbhidhâ’ân status
sosial sè akadhi langè’ tor bhumè. Orèng seppoèpon Laila jhârâghân sè bânnya’
dhunnyana, dhinèng rèng seppoèpon Zain coma tokang. Sabâb talèbât tarèsna ḍâ’
Laila, Zain mèyos ḍâ’ Malaysia dhâddhi TKI, nyarè kasap sè langkong sèpa’
sopajâ ngaollè èdhi ngabin Laila. Nangèng kopalang ta’ kennèng alang. Bhubhâr ḍâri
Malaysia, Zain mangghi’i Laila èpakabin sareng orèng laèn. Zain astabâ ongghu.
Atèna ngello’, akantha apoy ḍâlem sekkem.
Maos jugan
- ALBUM TANPA JUDUL
- Tabun Dalam Lingkaran
- Tidur di Dalam Puisi
- Pesantren Sebagai Pusat Pengetahuan
- Madhurâ ḍâlem Kaca Sajhârâ
Ta’ coma carèta seddhi, bâḍâ jhughân carèta sè abek
loco, èngghi ka’ḍinto carètaèpon Jhi Umar ḍâlem “Panggil Aku Abah.” Asabâb
ampon ongghâ ajjhi, Jhi Umar makon ḍâ’ potra tor mantoèpon kaangghuy ngolok
Aba. Jhi Umar dhuka amarghâ manto sè ḍâri Jhâbâ lopot ta’ nyebbhut Aba. Carèta
ka’ḍinto mènangka parsemmon mongghu orèng sè tama’ ḍâ’ pangormadhânèpon rèng
laèn. Sabâb apangrasa tèngghi, pas akarep jhâjhuluk sè akor sareng status otabâ
pangkatèpon.
Ḍâri 11 carèta, manabi ètalèktèghi polè, pangangghit
kabânnya’an ngatorraghi parsoalan-parsoalanèpon rèng binè’ è Madhurâ ḍâlem
bhughellân traḍisi. Angghidhân ka’ḍinto tantona sajân nambâi ghâlimpo’an sastra
tolès sè ghumatè ḍâlem mèrtè kabhudhâjân tor rèalitas sosial nèng Madhurâ. Napa
polè, pangangghit bhâbbhâr è Madhurâ, sè lakar jhimet tor metmet apolong oḍi’
sareng maghârsarè. Maka pantes manabi carèta-carèta ḍâlem buku ka’ḍinto
èkarassa asareddhemman kamadhurâ’ânèpon.
Sanajjân bhâsa sè èghuna’aghi ghâmpang èmaos, ta’
èmo’ sarèng diksi sè jhâlimet, nangèng kowat è ḍâlem maoḍi’ carèta kalabân
majhâghâ èmosi nèng sabbhân-sabbhân narasi. Salèrana jhughân segghut mongkasè
carèta kalabân hal-hal sè ta’ èkèra sabellunèpon (plot twist). Plot twist ka’ḍinto
sèttong tèknik naratif sè lakar segghut èghuna’aghi ḍâlem serradhân. Plot twist
èpèlè kaangghuy aparèng katakerjhâdhân mongghu para maos sè ampon nyekkennè
pamangghi dhibi’ ngabidhi carèta èkanthang. Saèngghâna aparèng kasempadhân ḍâ’
para maos kaangghuy nafsèrè otabâ bhâk-nebbhâk dhibi’.
Mènangka panotor sè pongkasan, saèstona ombhul
Paraban Tuah ka’ḍinto parlo èsampornaaghi sakonè’ kalabân èyakorraghi sareng
èjhâ’ân sè langkong saè. Kakorangan ka’ḍissa’ namong sakalerabhân. Sè langkong
otama, buku ka’ḍinto terbi’ kalabân pangarep sè nganyet, ngajhâk ḍâ’ para maos
kong-langkong rèng binè’ dhibi’, pasèra’a bisaos, kaangghuy aghângsèh pèkkèran
sopajâ lebbi tajhem tor kritis saèngghâna ta’ ghâmpang noro’ aros. Sabâb ta’
sakabbhiyânna sè èlampa’aghi orèng laèn bisa èyakorraghi ḍâ’ ka abâ dhibi’. Moghâ
dhâddhi pangasokan mongghu para maos.
Data
Buku
Ombhul
buku : Parabân Tuah
Sè
nyerrat : Elok Teja
Suminar
Sè
materbi’ : Penerbit
Basabasi
Taon
terbi’ : Maret 2021
Tebbel
buku : vi + 122 hlm; 12 x
19 cm
No.
ISBN :
978-623-305-201-6
Sè ambeḍḍhâr : Indina Zulfa Ilahi