Tasdid dhalem Basa Madura

Kerata basa, sastra basa madura, bahasa madura, mat toyu kerrong ka omba', ach jazuli, lukman hakim ag, rancage,


Lalampan. 1444. Noles otaba nyerrat basa Madura kantos are mangken gi’ paggun kalaban ejaan karebba dibi’. Pajat badha dhuwa’ eja’an se kalonta (mon ekagali lekka’) enggi paneka eja’an 1973, se ka’dhimma akadiya tolesan paneka, jugan bisa emaos e Koran Jawa Pos Radar Madura bila mangombar Careta Pandha’ (Carpan) otaba Sanja’ sabban are ahad, e dhalem buku Kerrong ka Omba (Mat Toyu, Sumenep), Lanceng Talpos (N Shalihin Damiri, Sampang) tor jugan carpan Oreng-Oreng Palang (Lukman Hakim Ag, Sumenep) aropa’agi buku se eserrat kalaban eja’an 1973.

 

Se kapeng dhuwa’ enggi paneka ejaan 2011. Eja’an paneka ekalampa sareng majalla Jokotole, dhari Balai Bahasa Provinsi Jaba Temor (se ngombar dhukale dhalem sataon) tor jugan majalla Pakem Maddu Pamekasan. Serradan kasebbut jugan bisa emaos e buku Esarepo Bencong tor Bâjing Tana (Zainal Abidin Hanafi, Pamekasan) tor novel Salbut (N Shalihin Damiri, Sampang).

 

Sanajjan badha dhuwa’ eja’an, gi’ bannya’ masyarakat se korang ngagali car anoles/nyerrat basa Madura, asabab basa Madura ka’dhinto pajat banne basa toles, namong coma basa lesan, basa colo’, saenggana rang-rang se ngagali cara nyerrat basa Madura, se langkong sae metorot eja’an se badha. Kalaban ejaan 1973, saestona pendha gampang dhalem nyerrat, manabi nyerrat kalaban eja’an 2011 ka’dhinto bakal magampang dhalem maos akadiya ‘sabhâ, bhâbhâ’ badha diakritik enggi tandha baca se badha ehorop kasebbut akadiya d se kodu badha titik ebabana ḍ otaba ṭ (t titik baba). Ka’dhinto tandhana, se magampang dhalem maos.


Maos jugan

 

Dhalem basa Madura saestona jugan badha tasdid (tasydid) enggi horop se manta’ polana dhari mate odhi’ pole. Se gampang teppana enggi paneka dhalem oca’na. Tabun daddi tabunna. Manabi buntek aneka banne buntekna, banne buntekga, se lerres buntegga. Akadiya sedding, banne etoles kalaban setding, bak badhan se lako lopot, korang teppa’ dhalem noles, akadiya gakgar, getda’, ghetda’, ngetdem, ngetdhem, tetda’, netda’. Aneka se lerres, gaggar, gedda’, ngeddem, ngeddem, tedda’, nedda’. Enggi pajat ta’ padha tasdidanna kalaban basa arab. Keng mon tadha’ nyamana, enggi sajan baremma. Noles kasempatdan, asabab badha unsur monye tor badha kasanggidan, oca’ kasempadan badha se ngaeding kalaban oca’ kasempatdan, enggi anapa, namong tolesan se lerres ‘kasempadan’.

 

Akadiya ‘arojakga’ enggi oreng se apangara arojak (hendak rujakan), ngakan pao kalaban ejulit ban pettes, buja otaba kalaban kowa cokka. Saestona ampon cokop eserrat kalaban arojaga, enggi asabab badha kasanggidan, bisa amonye (ekaedhing, ekarassa amonye) arojagga. Manabi akadiya oca’ ojana, sareng ojanna, ka’dhinto aropa’agi dhuwa’ hal se ama’na laen, se andhi’ maksot laenan. Ojana agandhu’ maksod bakal ojan. Ojan bakal toron sakejja’ laggi’. Manabi ojanna, ka’dhinto gadhuwan maksod ampon acareta’agi ojan se ampon toron, akadiya, ojanna derres onggu. Gella’ ojanna derres parana. Ba’ari’ ojanna ngatalbes. Ban en-laen epon.


Sabban basa badha atoranna, badha peyatoran se bakal ngatoragi kadinapa carana abasa. Banne namong badhana ondhagga basa akadiya se ampon biyasa kodu kagali. Ondhagga basa se tello’ garowa pajat wajib (fardu ain) ekaoneng. Dinggal budhi are, otaba gu’-laggu’ ja’ laju kala’ sakaleyan, manna baliyat se maosa basa Madura, manabi laju epanyettong. Manabi ekalako gan sakone’, se penting pon nyerrep buja accem, saenggana pon ngagali ja’ badha tasdid dhalem basa Madura. daddi orang Madura, namong ta’ oneng ka basa dibi’ aneka pajat pendha magettonan. Ma’ bisa rowa pera’. Napa se korang sae dhalem kaodhi’an basa Madura, sampe’ korang ekagali.

Posting Komentar

Lebih baru Lebih lama

Formulir Kontak