Lalampan.
1444. Sanat! Saamponna kaula bak seggut ajawab sanat bila watsaban,
pan-barempan kanca takerjat ban atanya napa artena. Oca’ sanat badan kaula
kaolle dhari Lukman Hakim Ag, pangarang empa’ buku basa Madura (Sagara Aeng Mata
Ojan, Oreng-oreng Palang, Cengkal Burung tor Tang Bine Majembar Ate. Sagara
Aeng Mata Ojan ngaolle tandha pangesto dhari Yayasan Kebudayaan Rancage taon
2021). Oca’ sanat kasebbut epaebir e group WA tor jugan ekarebba ka kaula bakto
ajawab WA. Mela dhari paneka, kaula se ngarte ja’ sanat paneka agandhu’ arte,
molae ganeka juga kaula pas maebir, maedder oca’ sanat monggu pan-saponapan
taretan ban kanca (bila kenca palotan, bila kanca taretan ekowa).
Maos jugan
- Santrena Aebuwan
- Pimpinan Fatayat NU se-Kecamatan Ganding
- Festival Sapparan Budaya Lesbumi PCNU Sumenep
- Ojan Tek-karettek
- Suhrawi Entara ka Resepsi Satu Abad
Melana
ca-kanca bannya’ se olle oca’ sanat sanajjan ta’ melle (ba sajjana ejuwala
kabbi ya!) pan-barempan badha se atanya napa artena sanat. Sabellun ngarte’e oca’
sanat. Kaula nerranggagiya oca’ Ma Ma’na
(ﻤاﻤﻌﻰ) aneka aropa’agi oca’ arab se ekala’ dhari
Ma (ﻤا)
ban Ma’na (ﻤﻌﻥ),
Ma artena apa, antara basa Madura ban
basa Indonesia padha agandhu’ arte apa. Ma’na se dhalem basa Madura esebbut
arte, pas eserrer daddi ma’na, apa ma’nana ekowa mon oreng Madura. daddi Ma Ma’na
Sanat aropa’agi apa artena sanat. Mon ca’n(a) oreng temor leke What’s the meaning of Sanat. Banne sanat
dhalem basa arab, se artena sanat hadits ban laen samacemma. jellas pon enggi.
Oca’
Ma Ma’na neka kaula kaolle bakto gi’ asakola MTs-MA Mambaul Ulum Gappora, bakto
ganeka guru se pon PNS, asma epon pak Asmoni bila molang e kellas, sopaja ret-moret lekkas enga’, moret etanya’agi
ban-sabban oca’, mesal dhalem pangajaran SKI (Sejarah Kebudayaan Islam),
ajarbaba’agi Kholafaur Rosyidin, Bani Umayyah ban laen samacemma. etanya’agi
napana artena Kholafaur Rosyidin kalaban Ma Ma’na Kholafaur Rosyidin? Se oneng
ajawab bisa paleman manabi kateppadan molang jam pongkasan. Otaba bila molang
Al-Qur’an Hadits, Ma Ma’na Al-Furqon, se ka’dhimma ampon ejellassagi sabellunna
cem-macemma julugan monggu Al-Qur’an. Ma Ma’na Fatonah, tandhana nanya’agi
artena Fatonah, sala settong sefat Kanjeng Nabi Muhammad. tor en-laen epon. Mela
dhari paneka ret-moret bajang ajar.
Napa
saestona artena oca’ sanat paneka. Saestona kaula bak takerjat jugan na’-kana
se saomoran ban kaula, paleng enggi angodha’an lema taon, ballung taon neka ta’
oneng ka artena sanat (ma’nana sanat), tanto pekkeran kaula galiya’. Otamana reng-oreng
se babbar taon 2000 napa pole se babbar taon 90an neka yaktena oneng ka artena
sanat (ma’nana sanat). Sanat neka biyasana apolong kalaban bise’. Oca’ sanat
biyasa ekoca’agi bakto amaen tek-eteggan. Bila badha se nopowe matana (se bakal
nyare, ekoca’ oreng se daddi, ba’na daddi. Ekowa). Ganeka pas nyorkep ka
geddung otaba bungka’an, sopaja ta’ ngabas ka kancana se ondur ngetek. Bila pon
ngetek kabbi. Se nyorkep (nopowe matana) ngoca’. Sanat kana’? mon pon ta’ nyaot
tandhana sanat. Otaba nyaot keya keng pon jau otaba pon ngetek. SANAT!
Kacong
se nyorkep garowa nyare kancana se ngetek. Otaba bila amaen sa’si’, nen-maenan
se dhari totobba butol sprite, fanta se gun lema’ biggi’, se bila amaen kalaban
dhuwa’ tanang, ekopa’agi. Nabuy lelema’. Ekala’ settong. Bisa ngoca’ bise’
kalamon bitonganna sala, sopaja ta’ kodu ekorange ollena metong. Sanat amaen
tandhana pon se ‘SIAP’ amaen. Sanajjan kadhang badha se roce, tanoro’ ekamaen. Bannya’
nan-maenan lamba’ se ekamaen na’-kana’. Samangken na’-kana’ amaen pon lebat
hape, banne ngontallagi tambikar ban laen samacemma. pon ngagali enggi napa ma’nana
sanat!
Maos jugan
Penahanan, olle tao ka sanat
BalasHapus