Mare mangrib, malem salasa kalebun Sumahbi, kalonta kalaban ologan Mahbi, se lebur ataro ganeko akabin pole, sanonto akabin kalaban babine’ se pon tello agante lake. Babine’ ganeko aropa’agi reng bine’ dhari kampong Mor Soksok disa Koddhu’ Alas.
“Areya babine’ mon ta’ ekabin paggun ecokoco lalake’ laen. Areya la tello kale akabin, lakena gun ngala’ sakencerran pas mole.” Oca’na Mahbi dhalem karettegga marena ngoca’ “Narema kaula dha’ nika ban kabbina Cebbinng Kembang Taneyan potre bine’na pak Sakelem kalaban maskabin ayat korse tor emas sa-gram ebajar kontan!”
Dhari taneyan se pendha badha oreng long-nolonge ganeko, badha oreng malonca’ basana “Mare reya ja’ abine pole, Bun!” ngeding sowara cara ganeko, oreng sapalemper bannya’ se alenga’. Bin-kabin ganeko ta’ mabannya’ oreng se dhateng, asabab malle ta’ bannya’ oreng se tao, sopaja ta’ enger. Lalake’ se pon mamondhu’ ana’na ganeko maso’ ka dhalem kamar, asabab ekoca’ pangantan anyar. Binena se ngodha narema sallimma Mahbi.
“Ma’ cellep tanangnga dika, Le’?” oca’na Mahbi. Se bine’ paggun nundhu’, pon tello’ lalake’ dhateng-ondhur dhalem kaodhi’anna, dhari se mesken sampe’ ka se paleng sogi. Etarema. Banne sakeng ta’ galiya’an otaba garumoan, sakeng aba’na mon ta’ narema ka lalake’, pas sangka aganggu lakena oreng. Esanggu arebbu’an lakena oreng. Lako ekacaca sabban are, “Cebbing Kembang rowa gella’ tel-kentelan ban Matrakip, baa’ari’ ekentel Matroni, bila ro ban Fajri. Buhhh ma’ kowat.” Caca mare ganeko ondhur-dhateng akantha omba’, akantha angen. Ondhur. Dhateng. Nyaleot. Nganyo’. Padahal Cebbing Kembang ta’ ro’-noro’ pato. Asabab bannya’ caca se mabissep kabadha’anna babine’ ganeko, Mahbi apangrasa kodu nolong Cebbing ganeko, minimal badha se ajaga. Aba’na. Mahbi apangrasa bisa. E malem ganeko, Cebbing mekker ba’ bakal abit odhi’ abareng oreng lake’ reya, reng lake’ se andhi’ kowasa dhalem disa dhinna’. Pan-barempan lalake’ se gun abandha napso, cenggang bai aromasa kowasa se adina’a sengko’. Aba’ la ta’ sanggup se nola’a.”
Maos jugan
“Malem sateya sengko’ ta’ bisa ngenep, ba’na tao dibi’ kan?” ngeding oca’na Mahbi, Cebbing Kembang Taneyan gun aonggu’. Sanajjan kaceba polana pon mare adandan, mandhi ka olo tantona kalaban om-ro’om se pon ebelli kalaban arga khusus, aba’na kodu apangrasa.
Telpon se badha dhalem kasangnga Mahbi se kacer amonye. “Assalam. Badha apa?” marena mece’-mece’. Mahbi acaca. -Jareya la etelpon mon binena, duchh mandhar kowada aba’, narema kabadha’an. “Iya la. Areya pasan sengko’ mangkat.” Oca’na Mahbi.
“Badha reng kamalengan, ca’na. sengko’ ta’ bisa abur-leburan balekka’ kalaban ba’na asabab areya tanggung jawabba sengko’.” Oca’na Sumahbi sambi masang sabbu’ se abarna biru. Oreng se badha e palemper gi’ badha se ta’ mole. Takerjat asabab Mahbi mangkat kalaban kaburu.
“Anape ma’ kaburu, Bun?” Apella se pelak abillai sopaja Mahbi menang atanya.
“Badha reng kamalengan. Mara duliyan noro’, areya langsung ka lokasi.” Sumahbi ban Apella ongga ka dhutdhut se badha etaneyan. Se kadhuwa nojju ka bara’ dhaja’, lebat Somor se badha dhalem alas petteng.
“Biasana mon sape pajat egirrep dhinna’. Areya dhinna’ lembana polana. Mon jat ekala’ epabareng kalaban mangrib, mon gun dhari bara’ dhaja, paggun lebat dhinna’. Tadha’ oreng akalemba’.
Dina ambu. Pate’e sapedhana.” Apella ngadhep ka Somor Alas se petteng. Bungkana jate ajajar bannya’ gan sadheppa. Bungkana mataba ban ka’-bungka’an se laen sajan maombut alas ganeko. Jalan se ta’ easpal ganeko morak alas petteng malem ganeko. “Lagguna kodu berri’ lampu edhinna’. Nyareyagi. Me’ badha oreng lebada dhinna’. Mara entar ka romana se elang sapena gallu.” Se kadhuwa mangkat pole.
Baja malem ganeko bannya’ oreng se dhateng, atanya baremma sapena. Mahbi ban Apella dhapa’ ka roma ganeko.
“Baja nape se elang?”
“Buru isa’ garo.”
“Ekala’ ekandhangnga?” oreng se andhi’ sapena gun aonggu’. Rekong ban mellas. Sape se pon aberri’ bannya’ budhu’. “Bula nengguwa kandhangnga!” Mahbi, Apella, se andhi’ sape mangkat ka kandhang.
“Bula para’ mangrib gi’ agabay kampowan, malle ta’ entare rengnge’. Tokal pon epasang!”
Sumahbi ngabas lampadda sape, ngabas jalanna kokot. Nyare se paleng anyar. “Areya kokot ngadhep ka kandhang, sape maso’a, mole. Areya gella’ kaloar…”
“Gella’ eowan dhamma Ka?”
“Ka bara’ dhaja…” Ngeding jawabanna. Elongnga Sumahbi ngot-serngodan. Jarengan bauna calatthong.
“Bau calatthong, Bun?”
“Colo’ ba’na bain. Areya ekeba ka bara’ dhaja. Paggun bain. Tape… acora’ semma’ reya.” Sowarana Sumahbi sajan lere. “Ayu’ duli pel.” Apella ban Sumahbi pon abali ka taneyan. Egadhiya thong-panthongnga Sumahbi pon siap kalaban sapedhana. Siap ngoser maleng se malem sanonto pon ngenneng settong.
Maos jugan
- Konsonan Alos & Dhammang
- Rèng Binè’ Ḍâlem Kepkeppan Jhâman
- Meneladani Kepemimpinan Nabi Muhammad
- Belajar Bisikan Tanah
- Agantong Kakapper Sabellun Pajjar
“Mon ekenneng malengnga, ban etemo sapena, sengko’abinea pole.” Oca’na Mahbi ka aba’na dibi’. “Ba’na sala, sateya Sumahbi se nenggu’ Koddhu’ Alas. Banne se laen, banne lalake’ se endha’ eberri’i pesse ollena ngeco’ sape.” Oca’ ka aba’na pole. “Lagguna pasaran Pel. Duliyan! Sateya kodu kone’e ban kodu abali sape jareya.” Oca’na Sumahbi. Mahbi mangkat. Alengleng se epettengnga. Apeddel. Ta’ nemmo sape. Sateya dhi-budhina. Ngala’ hpna. Nelpon.
“Kabala ka ca-kancana mon tao ka Mahbi, pabali sapena se ngone’e e kampong Bujahal. Mon ta’ eaterragi, pola me’ terro tedunga e sorbaja[1], malle lan-jalanan. Kabala. Sateya sengko’ lempo la se lako agir-gigira.” Hpna epece’ sakaleyan. Mate. Ngello’e roko’. –addhuna sengko’ abur-leburan kalaban bine se ngodha, ma’ pas eco-koco maleng he-rehe. Senga’ ya mon pas ra’yat dibi’. Ebes-bessa. Mesmes la mesmes.- karettegga Sumahbi.
“Addha mole gallu, Bun. Aneko pon para’ sobbu.”
“Korang ajar onggu. Pate’ ji maleng. Etetteya pellerra, malle ta’ man-katomanen.”
Mahbi mole sabarengngan. Dhapa’ ka romana. binena se toa pon tao ja’ Mahbi pon biasa nyare maleng sabban malem. Sadaja jalan elebadi. Dhalemmanna sabulan lebbi, pon tadha’ reng kamalengan sakale, sampe’ pete’ ban barang-barang laenna pon aman. Tadha’ oreng agarungngong kaelangan.
“Bun, jaga. Bun!” oreng e loar romana lok-ologan.
“Napa ka’?” badha nyaot. Kaloar dhari romana.
“Jagai Kalebunna. Sapena garowa dhateng pon ca’na. esaba’ e Mor Alas.”
“Sapa se nemmo ca’na Ka’?” binena gi’ atanya.
“Dina la poko’ etemmo. Mon gun malengnga ca’n(a) sengko’.” Oca’na Mahbi dhari dhalem kamar sambi malekko’. –tolos se abinea pole- oca’na dhalem atena sambi malekko’ dhalem sarongnga.
Palalangan,
17 Jumadil Aher 1443
JP
Radar Madura, Februari 2022
Dujan onggu abine kana' reya
BalasHapus