Kerata Basa Madura
Lalampan.com. 1444. Samangken akandha masala Kerata
Basa dhalem basa Madura (enggi masa’ abanta’a basa jerman, argentina, otaba
basa kawasan mediterania raya, ma’ se nemmo bai). Sala settong Sastra Madura
paneka Kerata Basa (Kèrata Bâsa). Kerata basa paneka oca’ parsemmon se
ngandhung arte, settong oca’ agandhu’ maksod tasempen dhalem oca’ kasebbut,
lakar mon pangarteyanna bak sara ban jali’met, bila eberri’ contona pas paham,
akadiya topa’, teggessa maTOpo tabu’ se kePA’, nase’; maperNA tabu’ se mosSE’,
tongket teggessa etongTONG ban etekKET. Ganeka nyamana Kerata Basa, banne
Kereta Api otaba Seppur. (Banne jugan tottenham hotspur). Sakaleyan laggi’,
Kerata Basa. Ulange Kerata Basa. Malle jijib ban jarna’.
Oreng kadhang nyambadi settong oca’, otaba neggesse
monggu oca’ sakeccap, manabi contona neka bannya’, manabi etoles sadaja,
kajuwan, aeng tase’ neka ta’ cokop kaangguy noles elmona Allah, enggi. Conto-conto
se ampon kalonta enggi paneka, maronggi tegges epon: MAcaleRONG ka giGI, copet,
teggessa; ngeco’ pet-mepet, kento’: sela epasekken gi’ ngalto’ (mon kento’ sela
eampet kalaban sekken gi’ ngalto’.
Songko’, eosong ban epanongko’. Napa gunana kerata
basa? Enggi salaen bur-lebur, neka jugan ngajari abasa, babasan se teppa’ neka
kedhinganna lebur. Bila ngoca’ mon acabbi peddhis, Cabbi teggessa acaca kalaban
nyarebi. Cangker teggessa nyangcang pekker. Manabi etalegtegi dhari teggessa,
fungsina kaangguy majarna’ paretongan tor parembagan, ja’ sabban oca’ neka
badha teggessanna. Akadiya damar mapasda barang se samar. Ana’ bungso, oca’
bungso teggessa: bung-sambungnga aeng soso.
Dhapor, teggessa: dha-baddhana reng nempor, buja
ambu se manja, bujangnga bila rombu ta’ ngenneng jaga. Rojak: esoro jak-ngajak.
Bannya’na contona: koceng; lakona aceng-lecceng, sogi: ngaroso oreng nanagi,
manto teggessa: ekaeman ekabuto (mon ekaleburi), lappet: lep-makalep
alempet, kotang; ko-lako aotang. Manabi ta’ manggi ka gunana kerata basa,
ngereng rassa’agi dibi’.
Kona andhi’ arte tegges; pengko parana. Okos: alako
olle ongkos. Nanggala: nanangga sabala. Rabat; mara aobat. Sampan; tana samsam
pamapan. Soling; esoso leng-neleng. Somor; esoso salanjang omor. Sarong; arassa
kerrong, saptanang; sap-osap tanang. Rajang; Gerra Lanjang. Mon lanceng napa
kerana, lanceng; LAN ban CENG. Enggi sare dibi’ teggessa.