Masyarakat Madura Toron



Lalampan.com. 1444. Sabban tellasan (ramelan otaba reyaja) masyarakat Madura seggut toron. Mon ta’ toron teppa’na tellasan Ramellan, maka toron tellasan Reyaja. Toron enggi paneka mole. Mole dhari alajar. Sabab bila alajar paneka ongga ka sampan otaba parao (oreng lapar tadha’ tao), mela dhari paneka, bila pon paleman dhari alajar, tanduk, aneka pas toron dhari parao otaba sampan. Bannya’ oreng se apareng maksot otaba ma’na (arte) monggu oca’ toron kasebbut, tor dhari ka’dhimma asal molaepon.

Masyarakat Madura se pajat kalonta kalaban oreng majang, tokang lajar, merantau, bisa ekoca’agi lakar rangrang mole. Napa pole dhimen lakar badha settong program, se ka’dhimma masyarakat Madura neka ongga ka tana Jaba, enggi paneka dha’ daerah Tapal Kuda, molae dhari Jember, Pasuruan, Probolinggo, Bondowoso, Situbondo, tamaso’ jugan Lomajang (se ka’dhimma badha se nyebbut kalaban Eksodus masyarakat Madura), otamana bila osom tane, asabab tana e Madura se kerreng tor korang nyamporna’agi monggu pertanian, mela mele mangkat (ongga) ka tana Jaba, bila pon lastare panen, bakal paleman (toron) abakta hasel ka kampong taneyanna dibi’.  

Maos jugan

Manabi samangken, oreng Madura ampon alajar dha’ man-ka’dhimman, molae Jaba Temor, Jakarta(an tor jugan tempat laen: kalaban agabay toko), Kalimantan engga Bali. Daddi tokang cokor, tokang rongsokan, tokang pelena besse towa, ajuwal sate, ajaga toko, ajuwal tajin arta’ (bubur kacang ijo), kantos daddi ponggaba (ka’dhinto bannya’ jugan). Banne namong e dhalem nagara, masyarakat Madura jugan bannya’ e manca nagara, banne namong Malaysia jugan Arab Saudi tor jugan en-laen epon.

Bila pon tellasan, sadajana paggun terro akompola kalaban bala tangga, taretan dibi’, sana’ barajat, sana’ poto toron, mela dhari paneka padha toron sadaja, paleman, nyongkem ka reng seppona, nyongkem dha’ ka guruna se ampon molang alip se manjeng dhalem panggaliyanna.

Paleman otaba toron dhari tana manca, banne terro kaangguy napa-ponapa, namong coma terro nyongkem dha’ oreng seppo dhuwa’, dha’ guru jugan tan-taretan. Along-polong. Apol-kompol. Namong badha jugan se ta’ bisa toron asabab bannya’ aral tor rintangan se ta’ bisa edinggal.  Apanggi tor nyongkem monggu oreng seppo monggu masyarakat Madura aropa’agi jimat se bisa daddi sango parjalananna, banne namong dunnya, tape terro ebakta’a kantos aherat.

Maos jugan

Manabi panggaliyan pelka’, coma aeng kajembaran se eparenge reng seppo dhuwa’ tor guru se bisa mabaras pelka’na panggaliyan. Sanajjan reng seppo ampon sobung, entar nyabis ka koburan para’ daddiya kawajiban. Acabis ka koburan oreng seppo paggun abakta kajembaran, paggun apareng kasamporna’an monggu panggaliyan, saenggana sanajjan ampon sobung omor, taneyan paggun emole’e (paggun toron). Ta’ cokba. Saka’dhinto jugan monggu guruna. Asabab guru ampon masalamet aba’ dhari kabudhuwan.

Posting Komentar

Lebih baru Lebih lama

Formulir Kontak