Sorop are sound Bintang Karteka pon amonye, emolae
kalaban masoara hadra kaangguy ngolok bala tangga. Reng-orang pon ngoca’
“Jarowa’ la amonye sounna, mara se melleya kaldu ban guringnga corli (cocor
tangguli).”
“Maddha se li-mabaliya (ka beng)kona Sakelem. Pola
dika nompangana, reng dika andhi’ paraban.”
“Laon, bula nengguwa ketab parembun, me’ entar keya
ka bula sabban.” Ketab parembun coma parsemmon polana buku cateddan cara ganeko
gunna ebukka’ bila badha gabay. Buku cateddan tengka badha se ngoca’ kalaban
Ketab Mujarabat, Ketab Mujallat, kalaban lat ebaca berra’.
“Buh sakelem maddhai garo.”
“Bannya’ nabur roko’.”
“Dhapa’-dhapa’ ka Gunong Pekol.”
“Ka dhisa Aeng Pancor dhapa’ keya.”
“Aneko lagguna aca-keca.”
“Dika andhi’ pesse pon se eselpettagiya ka sosona
tandha’na.”
“Buhh bula kombaliyan pendha raja ka Sakelem.
Dhukwintal. Mare ganeko ka Ma’na Dulmadin sagintal satengnga. Pas ka Kaleanget
pesse bak raja. Are sanonto bai pon bula pa’-empa’.”
“Bula lagguna neko laju lelema’. Se la bariya
jau-jau, ta’ bisa ngestowagi kabbi. Enggi gunna bisa makerem.”
“Gi’ sabbanna, Sakelem laju olle bai roko’.”
“Gi sanonto perak, daddi rato. Bila mabaliya posang
keya. Nape pole gunna cara garowa badhana. Ta’ kera ta’ tang-taotang se
mabaliya, adha’ caretana ta’ mongsar bila mabaliya.”
“Ba enggi anape, jarengan lebur.”
“Bula atompanga sakampel bainan, dina mon andhi’
berras ekakana ddibi’.”
“Bula dina, sagintal bainan. Neser rowa ka Sakelem.
Dhu gunna nyo’ona palasa enggi.”
“Jual gallu tarebungnga, manna sadhumalem ta’ nyelpettagi
ka dhadhana tandha’na.”
“Parobbu (bung)kana jatena, manna ta’ asallim ka
tandha’na.” parobbu otaba poger artena jual, malle daddi pesse.
“Parobbu mon sanonto. Parobbu (bung)kana nyeorra,
parlo ta’ asalamana.”
“Ba... Todhus keya mon asallim ka nyaena (tandha’na)
tadha’ lampenna.”
“Dika se entar rang-karang malem ahad kalebun olle
gi.” Rang-karang biasana aropa’agi oreng entar nyare senggi’ kalaban
nyongka’-nyongka’ bato karang se badha e tase’, mega’ senggi’, rajungan ban
tan-sataretanna tape dhalem kandha paneka rang-karang earte’e ngeco’ sape,
embi’ ajam, sapedha motor ban salaenna.
Maos jugan
“Pateppa’ dika acolo’. Bula bari’anna nekke’. Bula
akerrem ban bine.”
“Mon ebagiya ka tandha’na, pesse padhana se alonca’a
dibi’. Mon ebagiya ka binena. Sara gallu’. Tolos binena birsep.”
“Dika nape ekacator, ma’ kose mara-mara cobbu’, sela
bariya kose komo’ gallu’ ganeko colo’na.
“Bunga onggu
Sakelem garowa. Sound pon amonye.”
Sound Bintang Karteka se pajat ka lonta dha’ sadhaja
manca. Saestona Bintang Karteka ganeko aropa’agi sound se rang-rang mole.
Sabellunna ngalle ( ka beng)kona Sakelem, Bintang Karteka pon mare maramme,
maenger gabay e disa Bun Temor, panemoran neko, e bengkona Bunadin. Sakelem olle roko’ keya (onjangan ka
bengkona Bunadin). Sakelem atolong dhalemmanna tello are. E bakto ganeko
Sakelem olle penjung karana ka ekakejung ja’ bakal nangga’ “ngereng bungae.”
Sound Bintang Karteka pajat kalonta dha’ sadhaja manca. Bila nangga’ gabay,
Sounna mon ta’ Bintang Karteka balekkadan korang samporna. Mon arorokat, sounna
banne Bintang Karteka ta’ kera berse (artana).
“Sounna ngonjanga se pasera ke.”
“Ya mon ta’ Bintang Karteka balekkadan, egabaya apa
ollena nyeorra.”
“Todhus dibi’ kaula se abunga’ana sampean mon gunna
sounna ma’na Bungkaladan. Napa pole gunna lo-halo, coronganna masjid rowa, ta’
ekaeding.”
“Ba... ja’ lalagiyan.”
“Enten ongguwan neka.”
“Mon ta’ Bintang Karteka, gi se Sokma Tasernak
balekkadan. Garowa sepa’ keya.”
Bintang Karteka aropa’agi ratona sound se pajat
kalonta. Daddi se paleng kalonta, bila entara nompo (karana narema onjangan
aneka ekoca’ nompo ka disana oreng), Bintang Karteka kodu ngastete. Se kaloara
pamangkadda paleng lu-dullu neka apangaji gallu, asalameddan. Karana angen se
agiba’a soarana sound asale’bung. Sound Bintang Karteka bila amonye banne gunna
matager ka kaca, tape sampe’ mabella kaca. E settong disa, Bintang Karteka mate
migga. Egadhiya pa-sounan gali’dheng, tako’ tuan ruma todhus. Katoana pa-sounan
duli abala ka se andhi’. Ta’ abit lekka’ kalaban eserrop (tantona eca-bacae
gallu sabellun nyerrop) pas amonye pole.
Sorop are ganeko, oreng se atolonga otaba ngaterragi
tengka pon dhateng aban-dhalumban. Genna’ kalaban bin-sambinna. Berras
dhugintal, sakampel, tello corong, ebuwa’ sapedha, badha se ebuwa’ kalaban
garubak. Badha se nyo’on palasa kalaban berras tello gantang atompang gula
paser ban tellor. Badha se nyo’on banji aesse berras dhugantang, badha se
nyo’on banji kopeng aesse kalembin. Reng-oreng ganeko badha se nompangana tor
badha se mabali tompangan ka Sakelem. Se mabali tompangan/kombaliyan ta’ usa
nyathed. Manabi se nompangana bakal ecated nyamana bisa nyamana dibi’ otaba
atoles nyamana ana’na se paleng towa: Akadi Bu’ Ibrahim, tandhana oreng
kasebbut paneka embu’na Ibrahim, tompanganna, alamadda. Tokang cathet tantona
ta’ asengla’an toju’ manyettong. Bila are daddina karja. Tokang cathedda ta’
gunna kasorang.
Ban sabendherra oreng long-nolonge pon molae samenggu
sabellunna, badha se gunna cek-ngocek palappana, asadhiya kopi kaangguy se
long-nolonge molae lake’an otaba bine’an. Tantona kodu nyangngar kobi bannya’,
karana tamoy se bakal alonggu aropa’agi tamoy lake’ ban tamoy bine’. Nape pole
romana Sakelem aneko jau dhari jalan disa, ban jalan kampong, saenggana
dhumenggu sabellunna reng-oreng pon kaso agabay lorong se bisa ejalani sapedha,
sapedha motor ban motor (mobil). Sakelem pon amit dha’ pan-barempan oreng ja’
bakal ngampong teggalla dhalemmanna samenggu, karana banne coma pangantan
lake’-bine’, maen, bisan se bakal lebat e jalan ganeko, tantona moy-tamoy se
dhari man-dhimman bakal lebat e jalan ganeko.
Agabay jalan ganeko kalaban arabas bet-rabet se
nalar ka pan-barempan bungka. Epalebat e dhuwa’ bungkana nyeor se ngapeng kanan
kacer. Lebat ka tegalla Mudanna, nyerang ka teggalla Musdallim. Motor se lebat
teggalan ganeko bakal gu’-onggu’an. Karana jalanna mandhugul-mandhugul. Bannya’
tana saka’an. Akottha’.
“Aneko ta’ kera ta’ aonjan bila lebat edhinto.”
“Kan se nyaman bila eonjannagi, Ke.”
“Ba enggina... padhana omba’ garo saestona langngo,
sakeng karana ta’ biasa, pas raja gallu’, enggi gibana ka ba’-aba’an seyal se
badha. Salawat ekabbiyagi.”
“Apora’alla. Apora’alla. Buh napena salawadda ngatalbes.
Sabban arena ta’ kocapa.”
“Ganeko jalanna epaddu bara’dhajana teggalla
palebari.”
“Ganeka katonna pera’ korang lebar, coba’ oddi, mon
ta’ losdung.”
“Mon gunna sapedhana motor me’ lollo rowana, tape
mon pikep me’ ecetcet.”
“Ba empon, neser ka se andhi’ motorra, manna daddi
caca. kaneserre keya.”
“Manna bila eonjang dha’ento ta’ kasokan pole.”
“Ganeka buntegga tarebung ampu bungkar, malle sajan
lebar. Daddina sanajjan trak se rajja paggun ta’ kera merre, ten.”
“Bila nyapo’ ya pajat merre. Ngothas wa. Ebret.
Pas!”
“Man Busahla apal taker kose.”
“Bula abit nyopir pon, daddina tao pon, mon
so’-paso’an sakone’, mon mang-mang gi ja’ paksa’agi. Manna ernest.”
“Empon. Empon. Se kera nyamana. Manna daggi’ badha
motor ebret molena dhari dhinto. Mon tandha’na ta’ kera ebret polana eperre
buntek. Tao pola dhi’ dika merre daggi’.”
“Ba enggi mon daggi’ paggun merre.”
“Dhu eobuwa bariya.”
Oreng-oreng se agabay lorong ganeko amandak ta’
ngabas towa otaba ngodha, karana pon tao bila alakon cara ganeko paggun kodhu
badha meler-mandak, malle ta’ lekkas lempo ban ta’ ekarassa ja’ alalakon.
Mandak-mandak cara ganeko ta’ epamaso’ ka dhalem ate. Coma apa’-galeppa’
epenggiranna kopeng.
“Ganeka kosare jalanna, manna sajan sara
bat-lebadanna.”
“Mon ta’ agunjal balekkadan ganeka korang arassa
ne’-nae’an.”
“Ekocel!”
“Ba enggi sambi kocel kosaranna. Landhu’na
ekatongkedda enggi! Mon gunna entara jeng-manjeng, Man Sakelem jaga bainan.”
“Hahaha...”
“Manabi kadipaneka, olle ganjaran keya enggi Man
Ji?”
“Baremma tanggi, jarengan aneko long-nolonge,
long-nolonge neko, abanto bala tangga neko mapadha aba’, mabunga aba’. Sanajjan
aneko ekoca’ parkara se korang nyamporna’agi dhalem agamana bula ban dika. Tape
ja’ senga ta’ nolonge acora’ korang ngestowagi ka bala se badha edhinto.”
“Malar mandhar, kabunga’an neko daddiya kajembaranna
bula ban dika pagi’.”
“Manabi ka Sampeyan laju tadha’ juba’na oreng Man Ji.”
“Banne tadha’ juba’na oreng. Tape bisa abasa’agi
kalaban se lebbi lemmes.”
“Dina aneko pon bak aban, addha lakone, aneko pon
kare arabas jalan-jalan se dalupang, rokem penggir lorongnga me’ nyoco’ ka
banna sapedha motorra bula ban dika, kan korang samporna pas lan-jalanan.”
“Enggi Man Ji.”
Oreng-oreng se entara atolong se ta’ lebur katandha’
dhateng malem kabinna. Sopaja ta’ nengngale ka tandha’ ban ta’ olle penjung.
Otaba ta’ kaelangan pesse bannya’ se kodu bagi ka tandha’na. Sabendherra
bannya’ tan-taretanna Sakelem se korang lebur ka tandha’, polana tandha’ ca’na
se ca’-oca’an, Setanna badha eadha’. Asabab tako’ melo dusana.
“Pangarana ba’-aba’an gunna ngedinggagiya dhari
jau.”
“Tape jarengan ngestowagi taretan. Enggi kodu entar,
keng ta’ usa ro’-noro’, otaba rok-ngerok. Enggi ngero’ kowana bainan.
Lang-tolang ngodhana garo. Pong-pong gi’ badha karena ora’ se ngalenyemma.”
“Ba empon, dusa raja garowa. Ja’ lalagiyan. Banne
gaja’. Napso neko ta’ enneng kabbiyagi. Abas dibi’ dika, mon oreng neko
arebba’a ka tandha’, neko ta’ eman. Badha jatem, ong-ko’ong ta’ erebbai balekkadan.
Dhu dhamma ngabas matana.”
“Ka Mekka pan-barempan kale, tatanggana lapar.”
“Senga’ polana dika ta’ erebbai gi.”
“Anggep enggi laju, malle ta’ abit.”
Salaen korang lebur, bannya’ tan-taretanna se tako’
ka keyae mon sampe’ nangga’ tandha’ bila bin-kabin, babakalan otaba salameddan
rorokadan polana ekoca’ haram. Salaen bannya’ se tako’, sengka tor todhus,
jugan tadha’ bandhana se ekalokowa gabay otaba karja. Bungana sa’are. Sossana
para’ lema taonan. Akaton ecapo’ balai. Sang-tasangsang nyare otangan bila
mabaliya tompangan. Orengnga se alako gabay, akarja bunga, tan-taretanna
ekacaremmeddi. Ca’-oca’ cara ganeko gunna aenter e budiyanna romana. Noro’
angen. Taselpet ka tabing se ngesel. Gaggar ka pacarren. Sanajjan ngacaca,
la-balana ban tan-taretanna noro’agi bunga. Malle ta’ nespa. Paggun entar
eteppa’na are karjana.
Padhana are ganeko se pon are nyellem. Mega mera
ngamennyar e langnge’na. Sakelem gi’ emo’ kalaban tamoyya. Soun epate’e
sakejja’ sampe’ daggi’ bila mega mera pon agante pote. Baja sorop are ganeko
coma ekaeding monyena messinna lampu ban soun. Oreng-oreng e dhapor gi’ bannya’
se kaso. Kaso kalaban atana’. Kaso’ agaluy kopi. Kaso kalaban nyethok kowa,
ngajum pereng. Ngajum jajan. Ban laen samacemma. Oreng-oreng abajang giliran.
Badha se ngampong abajang ka tatanggana. Sella’. Badha se nyempattagi entar ka
masjid. Emba.
E malem ganeko Sakelem ta’ kaloaran dhari
mengkangnga. Me’ tadidda’ ka carang otaba bisa bai epo’-capo’. Sanajjan
dhukonna pon genna’. Dhukon se ajaga aeng epasra’agi ka Buntalan, Dhukon ojan
epasra’agi ka Menhajit, dhukon se ajaga apoy epasra’agi ka Satroma.
Pan-barempan karja, badha kadaddiyan nase’ ta’ massa’, berras se etana’ paggun
berras, badha se ollena nase’ laju nganyer. Badha keya apoyya se ta’ duli
odhi’, sela eobbar kalaban kolare, tomangnga eseram kalaban mennya’ gas, paggun
ta’ duli odhi’, dhukonna eolok kaangguy ngodhi’i. Sakelem pon kobater. Aeng
sanajjan ajalan, aengnga mera. Lekko. Aeng agili kalaban acampor cellot. Barang
kabutowan-kabutowan otama ganeko nandha’agi ja’ aba’na ta’ rida’. Aeng, Apoy,
Tana ban Angen. Dhukon-dhukon ganeko epanamoy, kalaban eangka’e jajan se paleng
nyaman tor edha’ari, kalaban roko’ se jugan samporna. Ta’ olle sampe’ kaceba.
Manna aberri’ bala’ se mababaja kajembaran eteppa’ daddina karja. Akarja.
Pang-gampang sara. Sanajjan terro bunga’a. Ta’ sakabbiyanna oreng bakal saratos
persen bunga. Badha se caremmet polana otangnga ta’ ebajari. Badha se ta’ laten
polana ta’ pate nyapa. Badha se dengngang polana sakaleyan ta’ esalamane. Badha
se paggun ta’ re-mare ngacaca juba’na taretanna dibi’. Pajat kodu padha kowat
tapana. Padha kowat japana. Padha kowat dhukonna. E are ganeko sempat agariyung
polana aeng ta’ dhuli dhateng, apoy panase’an ta’ dhuli odhi’. Gali’dheng. Polana
roko’ ta’ duli ekaolle.
“Kodu patennang!”
Sakelem paggun asandhakep. Matennang kabadha’an.
Sakelem sanajjan rekong. Kodu etengale tennag. Manna se laen noro’ rekong.
Elang ka bunga’an.
Maos jugan
***
Gi’ laggu ganeko sapena esambelli. Sa’are sabellunna
daddina gabayya. Sape ganeko pon epangger e babana bungkana sokon se manjeng e
bun temorra romana Sakelem. Sape bine’ se lempo. Dagingnga bakal bannya’. Sape
bila esambelli. Cethagga esebbut serana. Pangantan bine’ se bakal apangantan
epalengka ele’erra sape se bakal esambelli. Padhana gi’ laggu ganeko. Ana’na
bine’na Sakelem epalengka. Sape ganeko esambelli e taneyanna. Epadharak. Ngolok
bala. Kalaban etale’e sokona, malle nyaman naja’ ka angguy eparobbu, ban eteggu
le’erra. Kalaban etotobi dhaun geddhang. Le’erra esambelli. Eattasanna le’er se
esambelli, etopowe kalaban dhaun, saenggana dhara ta’ nancel ka jauna. Dhara
agili ka lobang ebabana le’erra sape ganeko. Eporak egadhiya keya. Ekolet
kole’. Eketthok. Ekala’ sampella. Olor. Ban bai’ dhalemma. Bila ajijji’i bai’
dhalemma se aropa’agi tempadda calatthong. Epekol kalaban renjing ka budhiyanna
padhaporan. Teg-tegganna juko’na jugan elakone ebudhiyanna dhaporra. Bannya’
jugan se nolonge ngetthok juko’na ban nektek tolangnga. Sajjegga bila badha
karja, lo-parloan se aropa’agi kaparloan onggu. Bannya’ oreng long-nolonge.
Ajung-rojung. Akantha bilis bila ngosong kakanan dhari settong kennengngan ka
rongkangnga dibi’.
E are ganeko bannya’ keya bine’an se long-nolonge nyangngar kobi, ngerra’ babang mera, babang pote, tor sadaja palappa, kaangguy palappana (juko’) sape, ajam tor juko’ tase’ se aropa panet se raja. Oreng-oreng se atolong, banne gunna nyo’on palasa, banci otaba banci kopeng, badha se nyambi ladding, badha se nyambi cobik ban cek-kocegga. Badha se nyambi parodan, tape sanonto pon badha messin panyellibanna nyeor. Sabellun badha sannyo, aeng ecello’ kalaban ngangguy palako aeng, se kasebbut kalaban paaengan. Mon sabellunna, oreng atolong kalaban labu, kondhur, kates, nyeor, se ekagabaya kowa otaba kowa pathe ban acar, tape sanonto abannya’an se melle labu, kondhur, kates ban nyeor.