Jangka’
bisa ekagabay kalaban seppet, lonyo ban sepet
kaju paddu empa’ tebbel pa’ nyare
kadhang bato kombung, se magaliya’ ka tombung
ngala’ jangka’ sopaja bisa toju’
nyaba’ monteng, ora’ epaenneng
bannya’ oreng arebbu’
padha terro toju’
dhari sakeng terrona, adu’a e sokona embu’
ta’ loppa saleng tambu’
sopaja olle jangka’ lembu’
loppa ka taretan
laju mara tan-kotan
se pon arebba palotan
jangka’ eosong, eja’-taja’
sampe’ ora’ le’erra pegga’
loppa temor, loppa bara’
sabab jangka’ sajan berra’
polana ta’ andhi’ ora’
ta’ noro’ ngosong jangka’
bali’ ngampar lama’
buso’ bannya’ ban ta’ sella’
Labbuwan, Sappar 1442
Powan
nyeor essena ancor
ngamennyor ta’ usa sorsor
badha se aremmes sampe’ essena lemmes
aengnga jeddu, lembu’ akantha sella maddu
esombat kalaban rajang mereng
buntegga atancek ka perreng
nyeor ancor dhalem bathok
banne manossa se nekthek otaba mathok
ekalembur campor maddu ban tellor
bathogga ekerra’ mowana
ekagabay cantheng peret kandhung
kalaban danangan baringen
babbar kacong lembu’ panggaliyan
akantha nyeor powan
mangkorong naong sadhaja kaodhi’an
nyeor powan dhari parse papowanan
banne nyeor burung, se ancor daddi baluggung
powan epatoron sabban bulan
se ngala’ ta’ amonyean
sanajjan ta’ kodu sonson kalaban mennyan
Labbuwan, Sappar 1442
e Labbuwan Kesong
e Labbuwan Kesong
mekol juko’ song-tarosong
reng-oreng ondhur dhateng
sampan mole kosong
ranyeng kowagga messin
atharat sakarat: ora’-ora’ mellar
e Labbuwan Kesong
reng-oreng agarungngong
parjalanan ta’ ontong, buttong
pangara mekola pangara
ngusonga sajja
dhari sampan-sampan bajra
bannya’ sampan mole kalaban ontang
agentang, asandhing teyang
pandhira mera ta’ adhara
pote olay lajarra
asapo’ angen: pangara se barenteng dhalem pekker
abantal omba’: nyaba-nyaba tapalga’
Labbuwan, Sappar 1442
Buja
nyapcap aeng ojan ngalampar sagara
sonar panas ngalampar ka sagara
garinap omba’ pote
garinap buja pote
egarap sampe merres pello
lake-bine, mekol ban nyo’on
seddha’na magersare
pa’ tane nangdang posang
e babana panas are
buja pon ta’ andhi’ arga
bujana pon ta’ accen pole
tadha’ oreng buto buja caabi
pello koneng, nyapcap aeng mata accen
agalibis kemme attheng
maongga buja ka renjing
epekol jing-tajijing
argana gumbang-gumbing
rembit!
ha
ha
ha
ta’ paju
sagara bujai
Labbuwan, Sappar 1442
Bako
panas ban ta’ ojan daddi arebban
panas nyengnge’ ta’ ekarassa
nyare rassa marena aban-dalumban
abidhing, maongga sajja
nyeram bume, nyarbu pangara
ngeccer, malandhu eber
argana bako ta’ nanto
embar, kabar nyalebar
pa’ tanena nyalabar
ondhem petteng, nyalemot nyapot
rese’, nyapcap aeng mata
dhara amardha, nyaba ta’ dhugga
pekkeran orjek, panggaliyan serbek
bako etartar e bidhek talpos
atane kasta, tombu sossa
bako-bako ta’ tombu solang
pola daddi pamellang
sossa paggun ta’ elang
garusu’, dhaun kerreng
akantha odhi’na, berging
Labbuwan, Sora, 1442
Sokana
bila pon lesso
ajuma’ ban ngaso
ja’ amaen napso
manna daddi burnyo
sabban oreng padha terro
ala-bala ban ana’ poto
bunga tompang taresna
nyengla majau dhari talkana
padha kalaban abalangngaja
tekka hajat dha’ sajja
sajjana odhi’ lebur
kembang malathe atabur
tape bato, juglang
kadhang daddi lang-alang
badha jalan nyerang
malle bisa nyabberang
dhalem odhi’ lesso
kadhang gi’ atompang lempo
jalan pajat ta’ nanto
sela lelere gi’ tasaleo
mabannya’ sango
malle nyaman bila ngaso
ngaso banne ta’ kaburu
sakeng gun bu-ambu
nompo’ ora’ se pon retto
kalaban sojud ban atempo
Labbuwan Jembar, Sora 1442
*Mat Toyu aropa’agi oreng biyasa. Asakola mare pon. Samangken abine jugan. Adha’ar nase’, aeng, enggi kadhang aroko’. Facebookan jugan. Ban samacemma. tadha’ bidan ban oreng laen. Lebur ka bal-balan. Lebur nenggu pera’. Manabi badha parlona bisa langsung entar ka facebook Mat Toyu ganeka pera’. Ta’andhi’ media sosial laen.
