ORENG ganeko paggun
rerengen ta’ re-mare. Nyala’agi perreng se malang ban dhurina gaggar saromban.
Sela gaggar saromban, jeng-manjeng e tengnga jalan. Sambi agusot sokona se
ngalocor dhara, oreng ganeko acareta ja’ sokona se ecoco’ e padduna teggal se
bannya’ dhadharra perreng, se ta’ ale’-pale’ sakale. Oreng ganeko acareta
kalaban dhai se marongo’ ban makomo’ colo’na.
”Huh, empon, ma’ korang
ajar bariya dhuri e padduna jalan garowa. Bula se entara ka Ma’na Tukina
burung-burung bariya. Ja’ senga bisa, eja-kaja bula paggun ajalan. Tape bila
cara neko, dharana laju ngalembak. Bula dibi’ gariming ngabas dharana,” komo’na
acareta dhara se saongguna gun nyapcap.
Pan-barampan tatanggana
dhateng. Polana oreng ganeko ekakabar ginjat. Ta’ bisa ajalan ecoco’ dhuri.
Dharana ngalembak. Lobangnga raja. Ban careta-careta laen se etambai kalaban
palappa-palappa se magarimingan reng-oreng. Saengga bannya’ oreng se dhateng
kaangguy nyapot.
Badha se taker matoron
so’onanna se aesse aeng. Badha se matoron palasa. Ambu aedder dagangan. Nyepper
sakejja’ polana dhalem settong taneyan egaribbunge oreng bannya’. Badha oreng
se nyaba’ pekolanna ban dhuwa’ renjingnga.
Badha se nyaba’ peltong
ban sadha’na polana takerjat nangale e settong taneyan bannya’ oreng. Bila
badha bung-garibbungan pajat makabateran. Nape pole sampe’ para’ possa’a
sataneyan.
Maos jugan
- Teks MC Bahasa Madura
- carpan: Noles Sorat
- Agantong Kakapper Sabellun Pajjar
- Algoritme dan Kerja Afiliasi
- Lautan Politik, Sajak Nailussururi
Abasanna dhari lowar
taneyan pajat sella’ kalaban oreng se apol-kompol. Padha asandhakep. Akaton
dha-padha ngosap dhadha. Notop colo’na karana ta’ mangga. ”Dhu, ma’ barinto...”
”Buh empon, pajat
berrit e padduna teggal garowa. Dhurina bila nyoco’ ta’ sakera-kera. Sela
dhalem, gi’ sake’,” komo’na careta. Bannya’ colo’ se abendherragi dungngingnga.
”Badha nape, gi?” sala
settong oreng se aropa’agi tokang edderra juko’ atanya.
”Mat ecoco’ dhuri, laju
ginjat, sambi dhalem, ban lobangnga raja. Dharana kose ta’ ekenneng tamba’,”
settong oreng acareta. Oreng se ecoco’ dhuri ganeko ngadhudhu. Polana dhuri se
potong e dhalem sokona gi’ ta’ ekenneng aju’.
”Dika ajalan baramma,
na, ma’ bisa taker potong dhurina?” sala settong tatanggana atanya sambi
matoro’ montengnga ka padduna lencak.
”Enggi ajalan biyasa,
kose aothala. Aba’ ajalan pon biyasa. Ta’ emodhil-modhil. Gi’ palang. Nape pole
ja’ senga taker epethal-pethal.”
”Iya palangnga ba’na
pajat. Bila aba’ ajalan biyasa, ta’ kose mosse’, ta’ kose athal-pethal, pas
ecapo’ balai, tandhana ba’na pajat palanga. Ca’na gi’ ta’ eaju’ dhurina ya?”
oreng se agentang eattassa lencak ganeko gunna akepek.
”Aneko gi’ ngantos
susterra, ma’ olle eberri’ obat gallu, ma’ olle ta’ sake’ parana bila eaju’.”
”Mangkana gunna ecoco’
dhuri ne’-kene’ la ta’ bisa’a ajalan. Apana pole sampe’ togel sokona. Bisa
keya, keng ginjat. Mangkana oreng reya ta’ usa ga’-masoga’, ga’-magaga’. Pera’
ecoco’ dhuri ne’-kene’, la ne’-marene’,” reng-oreng se pon nyaba’ montengnga
molae gella’ agella’ areng-bareng. Badha se gunna aonggu’. Tandhana nyerrep ka
panggaliyanna.
”Nape pole se ecoco’
soko. Bila sokona se ecapo’, laju empon, ta’ bisa aguli. Ongguwan neko...”
”Enggi. Lerres.”
E taneyan, reng-oreng
pon molae sengset gan sakone’ kalaban adina pangarep mandara lekkas baras. Se
aedder juko’ ngangka’ palasa ban eso’on pole, bakal nyepper ka ga-tatangga se
buru etemmone. Ca’na, juko’na pon bannya’ se korang ban abit ta’ melle juko’ ka
tokang edder ganeko. Di dhalem palasana badha talam. Salaen ajuwal juko’, oreng
ganeko ngeba karici’, kepeng, temon, terrong, ban samacemma.
”Aneka’ kobi gallu, ma’
olle ta’ pae’ dhalem parjalanan.”
”Empon, cokop. Bula
molae gella’ banne gunna ngedderragi juko’. Tape ngedderragi caca. Pon
pan-barampan kale eberri’ kobi mon oreng. Taker sembeng tabu’ bula neko.”
Susterra pon dhateng.
Makalowar pakakas kaangguy ngaju’ se cengkalan ganeko. Tape, susterra bak
cengkalan keya. Dhuri ganeko gi’ ethek-guthek. Saengga orengnga ngadhudhu lebbi
marenges.
Suster ganeko pas
maccowe sokona se balagat ban kandel. Sela bariya, dhurina nyelket dhalem
sokona se epet-leppet. Marena ebaccowe, esunti’ sakone’ pas eaju’ kalaban
lekkas, sampe’ orengnga takerjat kalaban ngekke’ bibir babana.
”Buh... Pendhanan
nyengnge’. Banne gun nyengnge’. Huuuuh!!! Aba’ laju maranga’. Senga’, dhuri
ganeko badha seherra. Mon rokem se ne’-kene’ ta’ kose matakerjadan kajana
aneko. Aneko dhuri carang macem nape, sampe’ mata’latenan. Mon dhaggi’ bisa
ajalan, esareya dhurina. Pas etetteya, enyambiyagiya kapak. Laju ta’ eberri’a
asapora dhurina. Dhuri ca’na. Tape kose nyeksa cara neko,” marongo’na kalowar
kalaban colo’ komo’na.
Maos jugan
- Proses Perpanjangan SIM di Sumenep
- Serradan Epon Ach Jazuli
- Belajar Bisikan Tanah
- Parebasan Madura
- Sanja' Irman Hermawan: Pangarep Taresna
”Se nyamana dhuri mon
edidda’ enggi nyake’e. Ja’ rengan dhuri ta’ minta didda’. Enggi mon oreng se
minta didda’, re-mareyanna daddi nyamanna ka se edidda’, ka se nedda’ enggi
pendhanan,” saodda susterra se sakejja’ bakal mole, marena eberri’ bajaran.
”Buh... Empon, aneko
nyeksa parana. Bula nyangka pajat badha ba’-saba’na dhalem dhuri ganeko. Aneko
badanna bula laju maranga’. Ta’ kajana se biyasana mon ecoco’ carang. Aneko
katon pajat esangaja kaangguy bula ma’ olle ta’ bisa ajalan. Ma’ olle ta’ bisa alako.
Sela aba’ cara neko, gi’ ta’ ebagiya alako. Sajjana aba’ ta’ epangakana.”
”Ma’ sampe’ taker ta’
bisa ngakan?” Susterra takerjat.
”Mon ta’ alako edhimma
olleya se ekabelliya berras jagung?”
”Ca’na bula me’
babajana dhuri ganeka taker mata’ bisa ngakan. Bula pamet palemana. Aneko
ngalleya ka laen kennengngan. Ma’ olle padha lekkas baras.”
Samolena susterra,
oreng ganeko paggun marongo’. Ngolange cacana. Nyala’agi dhurina se manjeng e
tengnga jalan. Atanya dibi’, anape ma’ bisa nyoco’ aba’na. Anape ma’ ta’ nyoco’
oreng laen se ajalan gunna sakarebba sokona. Se kadhang ajalan gunna mapalanga
oreng laen.
Dhaina sajan kerso’.
Dhuwa’ alessa sajan semma’. Colo’na sajan komo’. Bibirra sajan agermo’.
Rejjep, 1437