lalampan.com. 1445. Ampon kalampa enggi ka’dhinto technical
meeting (TM) otaba papanggiyan se ajajarba’agi lomba/adduwan kasebbut badhi
elampa’agi. Badha pettong lomba/adduwan e dhalem festival basa madura paneka. Saenggana
sadaja dewan juri, nyampeyagi ponapa bisaos se bakal enilai. Akadiya dungngeng,
se juri epon enggi paneka Mas Afan sareng bareng epon, badhi anilai ret-moret
SMP se noro’ tor adungngeng e bakto se ampon esadhiya’agi, dhalem bakto pettong
mennit, ta’ olle lebbi. bakal badha tello’ lampu molae dhari biru, tandhana
ampon ekanthang, bila lampu odhi’, tandha bakto ampon para’ sobunga (kare
dhumennit) tor bila lampu mera odhi’, tandhana bakto ampon sobung.
Sapaneka jugan metorot juri lomba pidato, tello’
lampu kasebbut jugan eguna’agi, dhalem apidato ka’dhinto bisa epalappae sareng
rarenggan basa, molae dhari rora basa, kerata basa, pantun tor en-laen epon,
saenggana basa tor rassa se esampeyagi arassa samporna monggu pameyarsa.
Maos jugan
Manabi pidato sareng dungngeng naska epon
eparengngagi sabellun ongga kapanggung, monggu paleggiran eparengngagi lastare
ongga ka panggung, namong ta’ olle baca, kodu alawa’. Tor kodu alawa’ kalaban
basa Madura. Dhalem lomba noles carakan kalaban badhana bakto 30 mennit, tor
maca tolesan carakan dhumennit, ta’ olle eja.
Dhalem lomba maca sanja’, se ka’dhimma sala
settongnga enggi paneka serradan epon Arach Jamaly se abul-ombul “Dhara Campor
Mardha” paneka sobung baktona, bisa lema mennit, bisa sapolo mennit otaba
lebbi. Badha lema’ pangarang sanja’ se epondhut sanja’epon.
Dhalem adduwan ngarang carpan (careta pandha’),
sadaja siswa kare nyambi alat toles, tor kertas folio ampon esadhiyai sareng
panitia. Saenggana peserta kare mangkat, toju’ sepa’, ngarang dhalem bakto dhu
jam, kalaban minimal (paleng sakone’) dhuwa’ halaman (dhu kaca).
Metorot Bu Tina, Kabid Kurikulum Dinas Pendidikan
Sumenep, ampon lebbi dhuratos peserta lomba se adaftar monggu petto’ lomba
kasebbut, se ka’dhimma lomba baca puisi aropa’agi se paleng bannya’. dhalem
sadaja lomba paneka, coma bakal badha tello’ pemenang, se ka’dhimma pemenang
nomer settong se badhi epamangkat ka jaba temor.