PARAMASASTRA || Pidato berbahasa Madura ini ditayangkan bertepatan dengan Jum‘at, 15 Agustus 2025, di lalampan.com.
Tema pidato “Mardika Dhalem Pekkeran, Maju Dhalem Tengka Lako” mengingatkan kita bahwa kemerdekaan bukan hanya soal bebas dari penjajahan, tetapi juga tanggung jawab menjaga ilmu, moral, dan masa depan bangsa.
Melalui bahasa Madura, pesan kebangsaan disampaikan dengan kuat sekaligus menjadi upaya melestarikan bahasa daerah sebagai bagian penting dari identitas dan kebudayaan. || Catatan Redaksi Lalampan.com
“Mardika Dhalem Pekkeran, Maju Dhalem Tengka Lako”
Assalamu alaikum wr. wb
Bismillahi Alhamdulillah, assholatu wassalamu ala rasulillah, sayyidina muhammadibni abdillah, lahaula wala quwwata illah billah, amma ba’du.
Songkem pangabakte salerana se molja bapak kepala dinas pendidikan kabupaten Songennep.
Songkem pangabakte salerana se molja bapak dewan juri sareng sadaja ca-kanca lomba pidato bahasa Madura.
Ator kabidan, ngereng areng-sareng same-same ngonjuggagi poji sokkor Alhamdulillah, Allah Se Amorba Jagat, ebaja laggu ka’dhinto kaula sareng ajunan sadaja kapareng tambana ni’mat saengga bisa rabbu dha’ ka’dhinto enggun tadha’ laen kangguy same-same netene lomba pidato bahasa Madura. Tanteopon kalaban lomba ka’dhinto, badan kaula ngarep malor moga’ basa madura etetteppagiya langgeng ta’ elompa’ kalaban badan basa-basa se laen akadiyan basa Indonesia, basa inggris, basa mandarin, tor jugan basa-basa se laen.
Bapak juri se badan kaula amolja’agi.
E baja mangken ka’dhinto badan kaula badhi madhapa’ settong bul-ombul “Mardika Dhalem Pekkeran, Maju Dhalem Tengka Lako”.
Bapak juri sareng sadaja rabbu se badan kaula amolja’agi.
Ponapa se emaksud kalaban mardika monggu kaula sareng ajunan sadaja menangka se edhabuwagi generasi milineal tor generasi Gen Z, ponapa pera’ sakadar lebur asakola tor netene upacara pandhira e sabban-sabban are sennen?
Mardika gaduwan arte bebas, namong banne bebas dhari tanggung jawab. Mardika gaduwan arte kaula sareng ajunan bebas dhalem mele, namun tanggung jawab e dhalem peleanna aba’.
Ngereng kaula sareng ajunan pamardika e dhalem pekkeran kalaban hal-hal se sae:
- Paparcaja ja’ kaula sareng ajunan bisa asaeng e jaman global ka’dhinto.
- Padaddi aba’ ka’dhinto, aba’ se bisa abadhi settong-settong (istilahna kreator ca’apon basa Indonesia) banne daddi oreng se coma bisa ngangguy badhiyanna oreng laen.
- Padaddi dhad-ngodhadan se penter e dhalem apekker ban ja’ daddi dhad-ngodhadan se gampang eadduh kalaban kabar-kabar se ta’ sae.
- Bajeng e dhalemmanna ajar sabab e jaman maju kadi ka’dhinto nagara buto dha’ dhad-ngodhadan se gaduwan SDM se sae.
- Jaga nagara ka’dhinto dhari oreng-oreng se aro-rosak kama’muranna nagara.
Parlo ekaenga’en kamardika’an apareng dha’ kaula sareng ajunan sadaja kaangguy maju ban ja’ sampe’ abadi karosagan se marogi dha’ kaula sareng ajunan sadaja.
Bapak juri sareng sadaja rabu se badan kaula amolja’agi.
E bingkeng pidato badan kaula ngajak dha’ ka dhad-ngodhadan otamaepon ret-moret, kangguy terros pabanjeng ajar, kangguy masa depan nagara se lebbi maju, ngereng parenge bukte ja’ generasina badan kaula sareng ajunan sadaja bisa abakta Indonesia lebbi maju dhari nagara-nagara se laen.
Bapak juri sareng sadaja rabu se badan kaula amolja’agi.
Saka’dhinto sakadar pidato dari badan kaula, saporana manabi badha se korang sae. Baik dhari tengka lako se korang nyondaggagi dha’ panggaliyan ajunan sadaja otaba sosonan okara se korang samporna.
Nagara Indonesia, Mardika!
Wassalamu ‘alaikum wr. wb