Ta' bannya' banta, gella' marena Asar Durahem ngolok
engko' dhari adha'na tokona Mon pa-nyapana lu-galluna matabar kopi ban roko',
sakeng ta' tao maksot marena. Engko' poko'na laju pas entar toju' e lencak se
badha e adha'na tokona. Lencakka dhari perreng dhuri. Cora' gi' buru agabay.
Sekken abasanna. Sanggerra koko. Rapet epako tong-settong. Sepa' egabay
moy-tamoyan, pi-kopiyan gan samalem. Sakeng engko' enja' ta' kera samalem.
Marena rop-sorop are engko' paggun mole. Mare Magrib badha tahlilan e temorra bengko.
"Toju' pasepa' lu, eya' kobina, roko'na la
genna' kretek ban filter. Pas kare sarotot." Oca'na ka engko' sambi
mateppa' selana ngangguy tanangnga se teppa'na ajeppet roko'.
Durahem orengnga pajat lamba', apa pole ka oreng se
pajat la ekennale akrap. Engko' jat la ta' getton pole mon Durahem nenggesi
enga' reya.
"Barramma ramme tokona?"
"Ya, Alhamdulillah. Ngoca'a seppe ta' seppe.
Ngoca'a ramme ta' pate ramme. Sakeng la badha ka'rowa"
"Ya se penting ta' pegga', Hem. Reng le-melle
asambung terros."
"Ya, Alhamdulilah. Le-olleyan la cep-nyecep
tello ebu."
"Sakeng enga' reya, Nam. andhi' dibi' otaba
ajaga toko reya ta' ngenneng aguliyan man-dha’emman. Ta' enga' ka tengkana tan-taretan.
Loppae se atatolonga ka tatangga. Ya, kan toko ta' notop sakale. Areya engko'
ma'-semma', apa pole se jat merantau ka jauna, sajan tadha' kasempatan sakale
se ajung-rojunga satatangga'an. Paleng enja' sataon sakaleyan, e are tellasan.
Naudzubillah, kadhang gun mole bila embu'na mate."
Maos jugan
- Puisi Madura Sorat Ibrahim
- Se Paleng Paraten
- Sajak Manusia Sekarang
- Odhi’ Juntrong ban Patteha
- Bulan Gerring Pesse Panas
Engko' gun nengneng, sambi nyergu' roko' nyamlanyam.
Ne'-sakone' sambi aonggu'. Nalektegi ban-sabban keccap se kalowar dhari
caretana Durahem. Cora'na Durahem teppa'na badha se ekakobaterre.
"Melana engko' terro ajuwalla toko reya, Nam.
Terro ngalleya ka bisnis se lebbi tennang ban bisa aguli. Aba' paggun bisa
kapra ban tengkana tan-taretan. Dina tekka ollena ta' pate raja, poko' bisa
apolong ban ana' bala."
"Ba, baramma keng..."
"Ella, eco-koco dunnya nyamana mon pas etorot.
Ya Mon kapolana sapa se ta' tagiyurra ka pesse ra-ngamera. Ja' mon toko reya
jat onggu jellas ontongnga, apa pole pas mokka' e kotta-kotta raja, kadiya
Jakarta, Banten, Karawang, ban Sidoarjo. Ya juta'an onggu ollena. Tape ka
gulina bala e budhi ada' kaloppae. Sakola'enna ana' kadhang ta' etemmo ja'
dhapa' gan dhimma."
Durahem sajan daddi se acareta. Engko' gun aonggu'.
Ta' etemmo kanan roko' la nyolet dhulencer. Ja' toro' kretek. Bak abit
sergu'enna. Areya nandha'agi ja' caretana bak lemma'. E pekker gun acaca dibi',
garungngongnga Durahem reya persis ban caretana Salim. Ri'-bari'na Salim jat
acareta keya engko', naleka engko' nyepper ka tokona se badha e Sidoarjo, e
temorra pasar Kangenan.
"Ba, mayu enom kobina. Pajat banne kobi celleng
ja' rengan ta' kober se ngandella." Durahem ro-moro matakerjat engko'.
Cora'na tao ja' engko' cengngeng. Ngalamon. Melana pas agettak peyape matabar
kopi.
"Ya, Hem. Dina la tekka banne kopi celleng se penting
careta paggun kobassa."
"Haha.. haha... Haha..." Engko' ban
Durahem pada agella' . Ngakak wa'-dhuwa'an.
"Ella mon ba'na nemmo bai, Nam." Oca'na ka
engko' sambi neggu' tabu'na margana mare agella' ngelkel.
Kabadha'an laju pas nyalam. Seppe sakaleyan adha'.
Motor ban sapedha teppa'na tadha' se lebat. Angen ngalesser keng ta' lebba'.
Padha nengneng. Padha mekker. Roko' esergu' li-baliyan.
"Ellu' ra gallu, arapa keng ma' ejuwalla ba'na
tokona?" Engko' nyoba' nganthang atanya lebbi serius.
"Korang nyaman, Nam. Mon kapolana tadha' bisnis
nyaman, sakeng toko reya pas ta' ngenneng aguli. Engko' laju pas loppa ka
pendidikanna na' poto."
"Ba, kan ana'na ba'na epasakola. Kan ta'
epalako."
"Bendher, Nam. Tape ja' engko' sadar sateya.
Mon eker-pekker pole na' poto reya ta' cokop gan sango, tape buto bellas kasena
reng towa. Kabadha'enna reng towa se kodu ngontrol. Ta' cokop gun poko' apa se
epenta badha, tape baremma se epenta reya ana' bisa aberri' alasan se teppa'.
Nah, bila enga' reya ce' butona onggu along-polong ban na' poto. Banne ta'
partaja ka embana se ngapolong, tape paggun bida ana' se ekapolong reng towana
dibi' ban ana' se ekapolong embana. Tekka dha-padha neser, tape paneserra ta'
kera padha."
Maos jugan
- Martabhât Orèng Madhurâ ḍâlem Bhughellân Traḍisi
- Girl Syndrome; Penyakit Psikis Remaja
- Tatakrama Madura Se Pon Elang
- Ghul-ghul, Pertunjukan Tahun 80an
- Bukan Lagi Pertempuran Fisik
"Ya, mon kapolana ra."
"Ban pole enga' reya, Nam. Ana' reya arta se
paleng aguna. Bi-lebbi bila aba' la tadha'. Mon pas ana' pendidikanna ta'
epabendher pas daddiya apa. Ja' arta ta' kera ekalongsolong mate."
Langnge' la sajan sordhep, e bun bara' la nganthang
mera. Jam e lengngen la pokol satengnga lema'. Lorong sakejja' agi' bakal ramme.
Reng alako padha moleya kabbi. Pada santa' lep-salepan. Badha se kaburu
tatemmowa ban binena. Badha se ngune'na ana'na ka madrasah. Badha se gi' ta'
abajang asar. Engko' sakejja' agi' moleya keya. Dina caretana Durahem la-pola
bisa paterros la-bila pole. Ja' engko' mon teppa'na e Madura paggun ban are ka
kottha. Paggun lebat e adha'na tokona Durahem.
"Hem, engko' marena kol lema' moleya, ya. E
roma mare magrib badha tahlilan. Ta' nyaman mon ta' entar. Ma'-semma'
polana."
"Ya, la, Nam. Ta' arapa..."
"Sakeng dhante' gallu. Tang roko' gi' kare
tello ratossa. Eman se ebuwangnga. Kobi gi' ta' nangket. Nanggung."
"Haha... Haha..."
"Ya patotok gallu. Ma' ta' ker-pekkeran."
Poko'na mon Durahem engko' jat pagaja'na ampo. Areya
gi' agaja' pembukaan. Ta' maso' ka inti. Mon pas maso' ka inti. Ella poko'na.
Cora' bungkarra essena kampong. Keng ella ta' kenneng paterros. Ta' mole onggu
engko' pas. Durahem reya mon elajjai tekka samalem dala korang malemma. Jat la
biasa ta' tedhung rowa nogui tokona. Ca'na reng-oreng, reng madura reya agabay
toko se tadha' labangnga.
"Ella, engko' mole la, Hem."
"Ya, Nam. Senga' kabarin ya, me' pola bada se
melleya toko."
Malang, 27/12/22
*Ach Jazuli Pangarang buku Odhi' ban Ta-caretana