RUBAH ajalan gi’ laggu, polana lapar, nyare kakanan
neng alas, pas nengngale mano’ GAGAK pon nyolpe’ sakerra’ keju ban pon nengga’
e tas kajuwan.
‘Katon engko’ la nemmo sassarap gi’ laggu sateya,
katon nyaman keju jareya. Baremma carana olle keju jareya tayya, malle pas
ngalle ka tang colo’, tantona kennyang.’ Ca’na RUBAH dhalem pekkeranna. Atempo e
babana kajuwan, tor ngabas mano’ GAGAK se pon nyolpe’ keju e tas kaju.
‘Salamet laggu, Bu’ Gagak.’ Oca’na. ‘Sateya are se
lebur, kan?’ oca’na pole. Ngedhing oca’na cara ganeka, Gagak gun ngabas ka baba,
ka Rubah.
‘Bula ngoca’ Salamet laggu, Bu gagak. Dika ta’
ngedhing kopengnga gi. SARA GALLU’ LAKAR MON BADHA E ATTAS, TA’ NGEDHING KA
SOWARANA SE BADHA E BABA.’ Oca’na Rubah, maranyeng.
Gagak curiga, sajan maserret colpe’na se nagenne keju
se badha e colo’na. colo’na pagguna ta’ akebbi’ sakale. Rubah sajan apekker
sopaja Gagak bisa duli akebbi’.
“Areya ma’ katon sara se olleya kakanan!!!”
“Dika tao bu Gagak, Dika aropa’agi mano’ se paaaleng
raddin parana, buluna nyonar tera’, matana penter ngabas kabadha’an, cocco’na
se paleng lebur, moncong, tanto se paleng lebur, sakabbiyanna se dhari dika
aneko lebur parana, tadha’ se jang leburan pole.” Sanajjan pojiyan pon ekabiyagi,
kalowar dhari colo’na Rubah, Keju paggun cekka’ e colo’na Mano’ Gagak. Rubah
para’ potor pangara.
“Tape cora’na, coba’ careta’agi, sowarana dika se
paleng lebur neng alas dhinto? Bula terro ngedhingngagiya.” Oca’na Rubah.
“Bula tao, ca’na bannya’ mahlok, sowarana dika se
paleng lebur, Jenning, ban ngamennyor, tanto bula terro ngedhinga sowarana.” Oca’na
Rubah Pole.
“Melana dhari ganeko, ta’ langkong sanonto dika
anyanye ka bula, sanajjan coma settong lagu, otaba ngejung na bai pon cokop.”
“Pas bula bakal acareta ka sabban mahlok se bula temmowi,
ja’ dika andhi’ sowara se paleng bagus neng alas neko.
Dika, Gagak, aropa’agi Ratona mano’ dhari sadhaja mano’
se badha neng alas raja neko.” Ngedhing oca’ ganeko, Gagak mesem balibis e
katongko’anna tas kajuwan.
Asabab sowarana terro ekaedhinga ban bakal daddi
ratona mano’, ban sowarana aropa’agi se lebur, Mano’ Gagak Mokka’ colo’na
kaangguy amonye. Keju gaggar dhari cocco’na, Keju se gaggar langsung esalbak Rubah
se pon molae gella’ anganga.
aneka aropa'agi careta salenan dhari basa inggris.
Somber careta paneka dhari AESOP