Rampak Naong, Song-Osong Lambung Sasarengan
Lalampan.com. 1446. Ka’dhinto banne berita se
serius, manabi sampeyan badha bakto kaangguy maos kantos lastare enggi sae,
namong manabi ampon oneng, tape gi’ terro maosa, enggi sae jugan. Kabar paneka
sakadar apareng oneng, ja’ neng Aula Majelis Wakil Cabang Nahdlatul Ulama
Pragaan, ampon kalampa Halal Bihalal Keluarga Besar NU Pragaan.
Halal Bihalal ekalampa tanggal 21 Sabal 1446, bakto
epon, pokol sanga’ (9), Bakto Indonesia Bara’ (WIB). Esambat kalaban Halal Bihalal
Keluarga Besar NU Pragaan, asabab banne namong MWCNU sareng Lembaga epon se
alonggu, namong dhari sadaja Badan Otonom same-same eatore longgu, Akadiya
Persatuan Guru NU (PERGUNU), PAGARNUSA, JQH, GP Ansor, IPNU-IPPNU, Fatayat, tor
jugan Muslimat.
Halal Bihalal ka’dhinto jugan dhalem maemot tor Haul 100
(saabad) taon epon Syaikhona Kholil Bangkalan, se ka’dhimma haul ka’dhinto
biyasa epon manabi neng Bangkalan elaksana’agi neng tanggal 12 Sabal.
Mela dhari Paneka, Ketua Tanfidziyah, K Hambali
Makhtum, maemot tor ngajak manabi taon dhateng, e tanggal 12 Sabal (12 Syawal)
badha se kasokan kaangguy rabu dha’ Haul Syaikhona Kholil Bangkalan bisa rabu
areng-sareng (rombongan) dhari Pragaan.
Enggi Rombongan, Nahdlatul Ulama ka’dhinto banne
namong sakadar rombongan, badha sopir tor penumpang, namong sadhajana bisa
saleng banto, akadiya se edhabuwagi, Ketua Tanfidziyah, apa se bisa elakone
monggu dha’ NU, sanajjan coma tokang sapo, tokang ellabba bang-sabang tanto
jugan ekaparlo.
‘Badha sera, badha badan, tor parlo jugan dha’ ka pada
(soko), manabi ta’ lengkap neka ta’ kera bisa ajalan.” Dhabuna bakto sambutan.
Hal ka’dhinto eteggesse kalaban sae sareng Rois
Syuriyah, KH Abd Warits Anwar, se ka’dhimma dhalem Jam’iyah ka’dhinto lakar
kodu padha kompak, Song-Osong Lambung sasarengan, manabi namong settong se
ajalan, ka’dhinto bisa ginjat, tembang. Bisa asababbagi ta’ duli ban ta’ duli
ranta.
“Pajat lakar se kodu ranta kaadha’ paneka perekonomian jama’ah, ranting, wakil cabang, saenggana manabi dhari baba ampon kowat, ka’dhinto badhi kowat kaattas.” Dhabu epon Rois Syuriyah.