Barung Madura: Pekker ban Gi'-gigi'
Pongpong gi' anga', ri'-bari'na badha oca' dhari Sekretaris Kementerian Koperasi dan UKM,
Arif Rahman Hakim. Beliau abala ja' toko kelontong Madura (warung Madura) kodu
noro' atoran jam operasional (jam operasional) saengga dhari oca' gella'
bannya' reng-oreng, tokoh-tokoh se garidu. Bannya' se aberri' komentar,
tafsiran, ban laen samacemma. Badha se ta' setuju, ban badha'an keya se
adukung.
Barung Madura lakar jat manyagara e are-are sateya.
Cora' jat kapra ban ramme e man-dhimman tempat, kottha, ramme ban barung
Madura. Banne karo e Jakarta, tape cora' la sakabbi'na kottha raja possa' bi'
barung Madura. Melana bar-kabarra pa'-dhapa' tekka ka man-dhimman. Ban jat se
paleng kasohor, jat barung Madura reya mokka' pa' lekor (24) jam. Ban sampe'
badha cap-ocapan ja' barung Madura reya notoppa gun bila are keyamat, jareya gi'
mokka' satengnga are. Artena lakar jat teppa'na ja-jajana barung Madura e
duwa'-tello' taon se keng-bengkeng reya.
Saestona banne hal se anyar, naleka ngemodi ka
pan-barampan usaha, bisnis, tor kalakowan se ekalette'e bi' oreng Madura se adaddiyagi
hasel ban ramme. Kabit dhari lamba', oreng Madura malarat se guttongnga naleka
agabay usaha ka disana oreng. Ban paste terros atamba bannya' ban terros badha
se nero dari balana, tatanggana, ban taretanna, kadiya alako bangunan e
Malaysia, ajuwal jamo ban tokang cokor e Kalimantan, tokang kaen e Bandung,
alako besi tua, rop-porop, rongsokan, tokang sate, daddi TKI ka Arab, ban laen
samacemma. Tantona kalakoan kasap kasebbut andhi' kajajana bang-sebang, e
zamanna bang-sebang. Namong, ta' sampe' daddi pangaro raja ka kaodhi'na
masyarakat Madura. Ekonomi ban pendapatan oreng Madura gun-paggun. Ban se
paleng ekamengnga' kalakowan se kasebbut gella' ta' etemmo dhi-budhina, tadha'
kettos konco'na. Laju elang ta' etemmo pangarona. Ban sateya ngalle ka barung
Madura se (teppa'na) badha e konco'. Cora' masyarakat sa-Indonesia tao kabbi ka
barung Madura.
Abali pole, ka oca'na Sekretaris Kementerian
Koperasi dan UKM, Arif Rahman Hakim saestona badha duwa' parsangka se kodu
pekker ban gi'-gigi' aba' se aropa'agi masyarakat Madura. Se sapesan, cora' badha
bendherra keya oca'na Arif Rahman Hakim, artena cora' sakone' gunana naleka
mokka' barung dala 24 jam, ebillai ta' le-mole sakale, namong ollena ta' agabay
sabab ka'angguy matamba pendapatan daerah, ta' bangal mokka' lapangan pekerjaan
ka'angguy masyarakat Madura e bume Madura dibi'. Oca' pendha'na gun cokop sogi
aba'na dibi'. Banne ngorange reng-oreng ka'angguy merantau, bali' tamba are,
tamba bulan, tamba taon, tamba bannya' oreng se mangkat ka disana oreng.
Oreng merantau banne ta' olle, namong ja' senga'a
bisa mele bango' aji'ji'anna se badha e pamengkang dibi'. Yaktena paggun bisa
naleka barung Madura se la agandhu' omset raja epabudhu' daddi usaha laenna se
bisa mukka' lapangan pekerjaan e bume Madura dibi', saengga reng-oreng sajan
ngorange se marantau. Sabab dhari pan-barampan kadaddiyan, reng-oreng Madura se
merantau margana e pamengkangnga ta' nemmo lapangan pekerjaan ka'angguy ngaolle
pengasilan se cokop.
Se kapeng dhuwa', emot ka kabannya'an maksot dhari badhana
barung Madura, se neyat ban tojjuwanna melle ban majaga barung Madura e dhisana
oreng, ban torkadhang ta' sakone' se sampe' ajuwal tana sangkolla ban tana
pergina ka'angguy daddi bandha (modal) barung Madura, sakeng terro mamondhugga
ban masakola'a na'-poto sopaja bisa 'kapra' ban oreng laen. Namong,
pan-barampan kadaddiyan e keng-bingkeng are, sajan jaja barungnga, sajan elang
maksot ban tojjuwanna.
Ta' sakone' se ampon kadaddiyan, na'-kana' bannya'
epaambu mondhuk, ta' nerrosagi sakola'anna margana epajaga barung. Ban badha
keya se esambi molae gi' kene', ambu ta' epangaji, kalowar dhari langgarra ta'
amet margana noro' eppa' embu'na ajaga barung. Ban se paleng marenges,
samangken ampon badha'an oreng towa se ta' kobater pole makabin otabana manika
ana'na e omor ngodha (usia dini) margana mare akarja la cokop mangkat ka disana
oreng ka'angguy ajaga barung. Jat la para' daddiya kapra ban lumrana. Ja' toro'
sango e dhalem ajalanagi keluarga reya banne kop-cokop gan dunnya malolo, bali'
kodu andhi' nilai kematangan sareng elmo pangaonengan.
Pramela dhari paneka, mokka' barung dala ebillai 24
jam ta' bu-ambu sakale, namong loppa ban adina ka tojjuwan lu-galluna, adina
na'-potona, dala ta' kasarbi adina ka pondhuk ban sakola'anna, ta' kaladin, ta'
kaopen, ta' katekkem elmo agamana, ra-kera dunnya se bannya' pas egabayya apa?
Ja' lo'-tello' ban to'-petto' banne karo eberri' sarabbi, tape buto ngajiyagi.
Ach Jazuli nama penanya Ajaz Elmazry, penulis buku Odi' ban Ta-caretana sekaligus pegiat Komunitas Gai' Bintang (KGB)