Carpan: NGAMBA' PARAO ALAJAR

carpan: Fendi Chovi

NGAMBA' PARAO ALAJAR

Carpan: Fendi Chovi

CARPAN|| LALAMPAN.COM-1447|| Kana' bine' jareya nanges sesegunan baja asar maba. Robana baringos. Ta' mangga rassana e bakto ngabassagi aeng matana nyapcap. Omorra gi' buru lema taon. E babana bungkana pao, kana' jareya nanges ta' duli ambu. Oreng-oreng se ngabassagi noro' neser. Duli esanderri kana' jareya. Ropana, kana' jareya atamba ranyeng sowara tangessa. Kana' jareya nyamana Fatimah.

"Badha apa ma' Fatimah nanges sesegunan ta' duli diyem," saodda Marjati, tatanggana dibi' ngoddi atanya.

"Kana' jareya paleng kerrong ka eppa'na," saodda se laen, noro' nyambit pamanggi.

Dhari jau kaoladan reng bine' ngodha ajalan dhing-ngendhing lok-ologan, masemma' ka na'-kana' jareya. Sabatara, kana' bine' jareya paggun manjeng e babana bungkana Pao.

"Jareya cebbingnya manjeng e babana Pao," saodda reng-oreng ka Suryani, reng towana kana’ bine’ jareya kalaban nodhuwi kennenganna.

Suryani mandeng robana cebbingnya, mowana baringos padhana reng ta' mandhi sa’are benteng abidda.

"Mara mole, ebu' andhi' jajan se ce' nyamanna e bengko!" Saodda laonan,  ngapose potrena kalaban neggu' tanangnga.

Kana' jareya ta' nyaot. Robana se baringos ta' duli atole ka salerana reng towa bine'na. Saellana epaksa, kana' jareya buru gellem, duli mole noro' bunte' e budhina reng towana.

Dhari jau, se kadhuwa ajalan le-lere, nete tabunna lorong nojju dha' romana, se ta' kose jau dhari kennengan jareya.

Ropana Suryani buru dhateng dhari kaonjangan ka mordhaja dhari romana. Mangkana, kana' jareya edina kadibi'an e bengkona.

Maos jugan

• MENU LALAMPAN.COM
• Download Kamus Bahasa Madura
• Oca’ Pangalemma Anggota Badan
• Kamus Bahasa Madura Ejaan Baku (1973)

***

Mare abajang isya', Suryani ngabassagi cebbingnga ropana gi' ta' tedhung. Badanna agaliseng ka dhaja ka lao' e attas lencak katedhunganna. Reng towa jareya duliyan nyander nyemma'e ban toju' e seddi'na potrena se sareyang.

"Arapa ma' ta' duli nyeddha tedhung, na'? Saodda Suryani, ngabassagi robana gantongan atena, mowana bunter akadi bulan pornama, ce' raddinna eoladi. Kana' jareya ta' duli nyaot.

Ngadhebbi kabadha'an gapaneka, Suryani tantona la tao. Kana' jareya masthe enga' ban kerrong ka eppa'na. Kaangguy majembar Fatimah, reng towana pos-ngapose kalaban adungngeng macemma careta.

Suryani ta' manglo e nalekana ana' bine'na seggut kerrong ka eppa'na. Tantona bida rassana, e bakto ajalane kaodhi'an ta' apolong sareng reng towa dhuwa'na akadi re-are sabelunna.

"Baramma terro ngedhingngagiya careta pole. Ebu andhi' careta se ce' leburra?."

Mereng dhabu gapaneka, ta' dumadiyan robana aoba binar, atena gumbira, badanna duli jaga aca’-ginca’ ban apa'-kopa' dhari attas lencak kasorra, aromasa perak akadi nemmo maenan.

"Mara pasemma' dha' enna'!" Saodda Suryani ka potrena, egellu' kana' jareya sambi dhung-tedhungan e seddi'na. Suryani biyasana adungngeng sambi ngellone Fatimah.

Kana' jareya noro' agellu' nyangkelle' ka badanna embu'na. Pangrasana aba'na ce' bunga e bakto reng towa bine'na acareta.

"Engko' sateya acareta'a badhana settong rato e dhalem sagara," Saodda Suryani nganthang adungngeng dha' ka potre bine'na.

Fatimah mesem sambi mereng dungngeng.

"Lamba' badha ratona juko' e dhalem  sagara. Juko' jareya ta' gampang la nyala dha' juko' laenna. Apapole, dha' sampan parao se alajar lebat e attassa sagara. "

Fatimah merengngagi, badanna ta' aguliyan, sokona ngonjur. "Rajamena, nyamana juko' jareya." Suryani ajarbaagi laonan, sowarana jarna' na'na'.

"Maske ta' la-nyala. ja' kantos Rajamena reya epangoso'. Mon Rajamena reya kantos dhuson ban kalowar dhari patapa’anna e dhalem sagara. Kabadha'an aeng tase' reya bakal agunjag."

Fatimah merengngagi, badanna paggun ta' aguliyan, tamba nyangkelle' ka badanna embu'na.

"Bila aeng tase' agunjak, tantona sampan paraona reng-oreng se alajar bakal karem talebbu egulung omba' se raja." Suryani nerrangngagi.

"Ta' jamburungan, roma-roma se badha e penggirra tase' bakal elanyo'.  Amarga, aeng tase' lowa ka daradan." Ebuna agambarragi, e nalekana juko' reya epangoso'.

Sabelunna caretana eterossagi, Fatimah atanya dha' ebuna, "Kadiponapa sopaja juko' rajamena ta' lanyala tor ta' aganggu ka oreng-oreng se alajar?"

"Iya, kabadha'an alam paseser kodu ejaga ban erabat. Ompamana, ta' ban-saromban mowang bu-rombu e penggirra tase'."

Ta' loppa, Suryani maenga' parlona arabat alam sopaja ta' lekkas rosak ban bingkeng are bakal marogi dha' kaodhi'anna manossa.

"Bu-rombu jareya mon ebuwang ban saromban. Bakal nganthang e attassa aeng sagara. Laonan bakal adaddiyagi panyake' dha' ka juko' se ne'-kene' ban bingkeng are tantona Rajamena ngoso' sara," Saodda Suryani, abirji' pangaonengan dha' ana'na. Fatimah sakejja' sakejja' aongguk.

"Parlo kerana tana paseser jareya erabat ban ta' olle e padaddi pamowanganna bu-rombu. Sabab, mon juko' se ne'-kene' mate, salaen rajamena ngoso'. Hasella oreng ajaring juko' ngorange e budhi are."

Fatimah duli megga' careta, atanya pole ka reng towana sabelunna eterossagi.

"Sopaja paraona oreng alajar ta' ekothek rajamena, manossa kodu ta' sarombanan mowang bu-rombu enggi, bu?"

"Iya, teppa' jareya," Saodda abendherragi jawabanna sambi' agellu' badanna ana'na.

"Mon oreng la ta' pate ngastete arabat paanaban e tana paseser. Bakal arassaagi kabadha'an alam bakal rosak e budhi are.”

"Kadiponapa manabi juko' rajamena kalowar dhari dhalem Sagara," Fatimah atanya pole sakaleyan laggi', ropana aba'na terro taowa.

"Iya, bume bakal agunjak. Tantona toron se anyama lendhu se nyebabbagi aeng sagara agili ka tana daradan ka angguy mapole macemma bu-rombu se ebuwang oreng-oreng e tase'." Saodda Suryani ajellasagi kalaban jarna' na'na'.

"Enggi, Bu." Saodda Fatimah sambi aguk-onggu'an mereng kateranganna.

"Daddi molae sateya, ba'na ta' olle ban-saromban mowang bungkossa jajan e tase', ya." Saodda ebuna, eberri' babulangan ka potre bine'na.

Bakto adungngeng kaangguy ngapose potrena, kadhang Suryani apaleggiran, sopaja majembar atena ban magella' robana potrena. Tantona, bila kana' jareya mesem. Robana paddhang se ce' raddinna.

Sambi merengngagi dungngeng, laonan ta' egarassa kana' jareya nyeddha taleyer kantos ekaedhing sowarana ngerrok ngasower.

Maos jugan

• Puisi Madura:Cangka Asela
• Esai:Sakola’an Tombu Nyenna
• Pidato: Membiasakan Berbahasa Madura di Rumah
• Carpan: Andharun || Helmy Khan

***

E baja laggu jareya, Fatimah toju' e adha'na romana asareng reng towa bine'na.

"Kadiponapa kabarra eppa' se alajar, enggi."

"Eppa'na sakejja' laggi' bakal mole dhari alajar. Dina tos-dhantos e dhiya."

Fatimah aromasa perak saellana ngedhing reng towa lake'na moleya dhari Polo.

"Sakejja' laggi' eppa'na bakal mole. Malar moga hasella alajar majembar ate kalowarga se badha e roma." Suryani abala dha' Fatimah, sambi aparnyo’onan dha' Guste Pangeran se Maha Kobasa.

Ngedhing kabar gapaneka, Fatimah tantona ce' peragga. Kana' jareya aca’-ginca’, ka bara' ka temor e palemperra romana. Amarga, abulanan abidda ngamba’ paraona eppa’na alajar lekkas tanduk.

"Sakejja' laggi', badha tatenggun Petik Laut, enggi, Bu," saodda Fatimah, atotoran ka ebuna.

"Iya, bendher. Sabulan laggi' pole. Tantona eppa'na la tanduk dhari alajar." Saodda Suryani, aberri' tao ka Fatimah.

Kana' jareya atamba perak, mowana ce' binarra. Alengleng ka bara' ka temor e palemperra romana, Ater-poter kadibi'an kantos lesso badanna.

"Iya. Dina dhaggi' mangkat katellowan, areng-bareng ban eppa'na. Nenggu tatenggun Budhaja Madura." Nyambit Suryani sambi mesem ka Fatimah, potre bine' se sareyang, gantongan ate e kalowarga.

"Hore  ... Hore ... !!! Saodda Fatimah pera' sambi' aca'-ginca'.

 

Tajjan, 5 April 2025