Puisi Madura: Arach Djamali
BANG-NOREBANG
Bang-norebang tombu neng eppot
Ta’ eopene ta’ esapot
Sateya la ngembang
Badha se koneng, badha se abang
Badha se mekko, badha se mekkar
Sakeng aba’ ta’ gellem oneng
Arapa ba’nengan ?
Me’ pera’ ngembang samosem ?
Pas, gaggar
Nangeng ta’ daddi buthok ?
Me’-ame’ panassa bume ? se mangalto’ karena nyaba ?
1991
Maos Jugan
BABBAR MANDHIRA
Dha’ Kacong Cebbing se Mangkada
Ja’ aggi’ sedha badhi mangkada
Dinggallagi aba’ alero’ e lencak
Arapa me’ kodu mangkat ?
Arentenga “kalong mosteka” ?
Arengrenga “kejung pornama” ?
Mangkat cong ! Mangkat bing !
Jarumattagi jagat
Rantep temor bara’
Tandhengngagi angen barat
Badhi sasemba’an dha’ jeng Ebu
Aba’ pessen tandha tresna
Pangonong ja’ duli dhuccol
Kerrap raja gi’ ngolkol
Sronen thokthok gi’ padha ngarak
Se nenggu gi’ ngremmet padha asorak
Horeeeee…….. horeeeee ………..
Se Kelap gabay gul-agul
Se Guntor gabay panambu
Se Meyang nonggul bunto’
Horeeeee ……. Horeeeee ……….
Se Jagir mleyot ka penggir
Kerrap raja gi’ ngamba’
Sronen thokthok gi’ earak
Se nenggu gi’ aorak
Mangkat, babbar mandira
Du’ana emma’ gi’ ra-dhara
1990
ASARE PANGLEPOR ATE
Aba’ atendak dhu … me’ me’ sajan jau,
Jang-bajangan lobar esergu’ pettengnga malem
Areng-ereng bi’ dhatengnga rese’
Katonna nanemang dha’ ka aba’
Tembang Kasmaran akanthe’ kejung Ram-eram
Poncana sagara esareya dhu e dhimma enggunna
Aba’ naglosot e cellana bato karang
Ekaloskos omba’ se nambek ka gir sereng
Aba’ nyacak alembak kadibi’an
Nangeng, dhu, seppe
Me’ ce’ rengsana ate
Dhu langnge’ ban bume
Ba’ e dhimma tresnana ate se tasangsang
Aba’ asare jemjemma sokma
Badhi panglepor pekker se rengsa
1987
BARAT
Barat kaballu namoy ka bume
Abatbat
Kabbi edhardhar daddi dhedhar
Kabbi eterrak daddi kerrak
Ongel se nyosop, locot
Cambur daddi babur
Se sokkla, serna
Se teron katon
Aba’ ta’; mongkat nadhung
Barat kaballu se asabung
Dhu aba’ !
Terrona agutonga lencak se reyot
Se taselpet e padduna dhapor
Eajuma neng mandhapa
Eajuma neng e roma
Aba’ ta’ mongkat nadhung
Barat kaballu se asabung
Dhu jagat
Terrona agutonga karena iman
Se nyaleke’ e gumbingnga dhadha
Ecangkengnga dhalem sokma
Ecangkengnga dhalem soss
Ecangkengnga dhalem tresna
1991
Maos jugan
DHARA CAMPOR MARDHA
Sasembaa’an dha’ Jeng Ebu Pertiwi
Tareka ka’dinto ebu, medal dhari sokma
Se talempet dhalem nespa tor nyangsara
Arastosan taon
Tareka ebugel, sowara edunggem
Roba ta’ odhar, labang ta’ adhardhar
Naleka Hirozima Nagasaki epajunge kolat mardha
Samoray taselpet, Hinomaru aleppet
Nippon gippon, ta’ kobasa namba’
Mok-amok Sakutu
Pottra nyelpettagi tareka, akerek mera pote
Majunge bume Nusantara
Tareka mardika agarudhu’ magundhek jagat
Raga se kendhur sakojur, odhar
Nyaba se ta’ kababa, abangbang alapes baja
Kacong cebbing padha asabung, aorak, arakrak
Ta’ marduli dhara se nyapcap
Ta’ marduli mardha se nyapsap
Dhara campor mardha
Agaluy dhalem dhadha
Tojjuwan nonggal
Mardika, jaja, rajja.
*Arach Djamali, (almarhum) lahir di Sumenep tanggal 15 Pebruari 1939, dengan nama Abd. Rachem. Hidup bersama seorang istri, lima anak dan enam cucu menurutnya cukup memberikan kebahagiaan tersendiri, karena paling tidak “amanah” yang ia jalankan selama pengabdiannya sebagian telah dilaksanakan.
metthek dhari blog: https://sastramadura.blogspot.com.
