Sobung Banne Tadha’

Lalampan.com. 1445. E dhalem basa Madura lakar badha ondhagga basa, se ka’dhimma, ca’epon manabi abasa, dhalem arteyan mabagus basana neka nandha’agi oreng kasebbut atengka, otaba oneng ka tengkana oreng Madura. Ponapa se ta’ abasa neka ta’ oneng ka tengkana oreng Madura, enggi bunten jugan, sabab oreng abasa neka badha katantowan epon. Akadiya kaula monggu para rabu tor para maos sadaja, asabab se badhi maos lalampan neka ta’ epanggi, melana tor kadhang kaula aguna’agi basa tengnga’an se ta’ pate alos, tor jugan se ta’ pate kasar, napa pole aguna’agi basa se kasar parana. Melana parlo same-same ekagali ja’ abasa neka aropa’agi etika partengkan. Se parlo enggi eatore, se ta’ parlo enggi…

Dhalem serradan paneka kaula coma matora otaba nyampeyagi ja’ oca’ “SOBUNG” paneka banne basa alos epon “TADHA’”. Tadha’ neka pajat tadha’ basa alos epon. Sobung neka aropa’agi basa alos epon monggu oca’ seppe. Otaba artena sobung neka seppe.

Bannya’ ca-kanca se takerjat. Ja’ sobung paneka banne bakkel monggu oca’ tadha’, tape seppe. Ampon bannya’ se adhabu ja’ tadha’ neka enggi tadha’, banne sobung. Akadiya ebakto se tapongkor, bakto Optimalisasi Penguatan Kapasitas Guru Bahasa Daerah se ekalampa sareng Dinas Pendidikan, se marabu Bapak Sunarjo tor jugan Bapak Abd Aziz, bapak-bapak se pon nyeppowe basa Madura kasebbut  same-same ngatoragi ja’ Tadha’ neka banne sobung.

Maos jugan

• Namaku Maira
• Konye’ Gunong
• Parsasat
• Tadha’ Omba’
• Kerata Basa

Bannya’ ru-guru (asabab sadaja se rabu ka’dhinto aropa’agi guru Basa Madura monggu SMP-N tor SMP-Independent) se mareksane kalaban petanya, kadinapa manabi adha-kandha, asa-gessa sareng keyae, kadinapa hokomma tor en-laen epon. Metorot Bapak Aziz, enggi ta’ anapa. Mela dhari paneka Pak Aziz adungngeng ja’ ampon biyasa asa-gessa tor adha-kandha kalaban keyae-keyae kalaban aguna’agi oca’ Tadha’, tor eoba kalaban oca’ Sobung.

Keyae kasebbut se ngagali enggi ta’ protes, otaba ta’ nyala’agi, asabab ampon same-same oneng ja’ ka’dhinto aropa’agi basa epon. Tadha’ enggi tadha’, banne sobung. Sobung neka artena seppe. Enggi pajat acora’ korang samporna rassana ka pangaedhingan, ekarassa ngaresnges ka kopeng manabi badha oreng akandha tor ngoca’ tadha’. Acora’ mapas. Enggi paneka polana dhalem pan-sanapan taon paneka, bannya’ oreng se ampon aguna’agi sobung bila epareksane. Akadiya:

Badha Si Pulan? Tanto paneka badhi ejawab kalaban sobung. Berra’ manabi pas nyambit kalaban tadha’. Pajat lakar berra’, napa pole sala kapra. Tor tanto dhari gella’ neka badan kaula ta’ oneng jugan ponapa basa alossa badan kaula ampon lerres sadaja ponapa bunten. Manabi bannya’ sala tor lopodda enggi ngereng epaenga’agi. Malle padha teppa’. Mator sakalangkong!!! Lalampan.com.

Maos jugan

• Cangka Asela
• Nyangkole Kerrong
• Pantun Madura
• Duwana
• Majang