Lanceng Talpos Ban Salbut


N Shalihin Damiri se biyasa kasambat sareng “Bin” ka’dhinto aropa’agi santre alumni Sidogiri. Bin paneka lalake’ se babbar e kabupaten Sampang, lerres epon 17 Januari 1992, se aropa’agi potra kapeng lema’ epon keyae A Damiri Mudzhar sareng Nyae Muslimah Anshori. Sabellun ngarang “Salbut”, Bin paneka ngarang “Lanceng Talpos”, pangarang paneka aropa’agi sastre e Pondhuk Raudlatul Ulum Arrahmaniyah (RUA) Pramian Taman Sreseh, Sampang tor jugan materros ka Sidogiri Kraton Pasuruan, Jaba Temor.

Lalake’ paneka ampon biyasa ngarang noles sajjegga kellas tello’ Madrasah Tsanawiyah otamaepon serradan basa Indonesia, aropa cerpen, puisi tor jugan artikel. Serradan epon jugan ampon bannya’ ngombar e media, otamana media pondhuk, tor jugan badha se ampon akompol tor daddi buku akadiya Nama Saya Santri (Kumcer Majalah Ijtihad), Sowan (Kumcer tiga santri) Tora (Carpan JPRM), Mata Siul (antologi Sastra Sampang)  tor jugan buku Secamam Catatan (esai).

Maos jugan

Nyerrat basa Madura ekabidi molae taon 2016 se aropa’agi careta pandha’ (carpan) tor jugan seggut ngombar e media basa Madura, otama epon Jawa Pos Radar Madura, saenggana badhana careta kasebbut se eserrat sareng Bin epakompol dhalem settong buku “Lanceng Talpos” sabellun paleman tor ngeket taresna (abine) ka Jember.

E taon 2021, buku Lanceng Talpos (terbit e DIVA press taon 2020 kalaban eja’an 1973) tamaso’ dhari empa’ buku basa Madura se eterjema’agi dha’ Basa Indonesia sareng Balai Bahasa Jaba Temor asareng buku Tora, Oreng-oreng Palang (Lukman Hakim Ag) tor jugan antologi sanja’ Sokana (Mat Toyu). Sajjegga Salbut aropa’agi buku kapeng dhuwa’ se terbit e DIVA Press e November 2021 kalaban ejaan 2011, se adungngeng maemot panyake’ se masalbut kabadha’an e aher tawon 2019 kantos awal 2022, saenggana sadaja oreng kodu (wajib) ngangguy masker.

Potraepon ke Damiri ka’dhinto lebur tor senneng dha’ Metallica tor arabat Maduread, se ka’dhimma tojjuwan Maduread ka’dhinto pangarep sopaja masyarakat lebur, senneng tor emba saengga bisa maos tor taresna monggu basa tor kabudhajaan Madura. Basa Madura se kantos are mangken paggun ta’ pate eanggep kalaban orengnga dibi’, namong gi’ ebillai sareng Bin sopaja lebur, bisa nyerrat kalaban teppa’, tor ekaembai sareng bangsana dibi’ tor se paleng otama ta’ plagiat dhalem agabay karangan akadiya lagu tor serradan (tolesan).

Jurbuna sastra Madura agantong monggu oreng-oreng Madura jugan, asabab Madura menangka bangsa paneka gadhuwan basa, menangka bangsa, Madura gadhuwan kabudhaja’an tor tradisi, se ka’dhimma budhaja tor tradisi paneka ngombar dhari pola tengkana masyarakadda, tamaso’ basana. Basa Madura menangka bukte se paleng semma’ monggu kabadha’an masyarakat Madura se bisa nandha’agi badhana bangsa. Bila basana tadha’, tandhana ampon badha se elang dhari bangsa kasebbut. Mela dhari paneka, Bin salaen nyerrat basa Madura, jugan gadhuwan “Maduread” sopaja oreng Madura lebur ka basa dibi’.

Maos jugan

Carpan-carpanna Bin adungngeng kabadha’an masyarakat se kodu odhi’ kalaban badhana kaodhi’an se rengsa, atane se terro bakal atana’, namong badha pokpara se banne sakadar magunjal badha, badha kalendhuwan se mangetterran ka pekkeran ban dhadha, careta-careta kasebbut bisa emaos dhalem dhuwa’ bukuna Lanceng Talpos tor Salbut. Serradan Bin jugan maso’ dhalem Antologi Carpan Basa Madura “Tora” buku paneka aropa’agi sadaja carpan se ngombar e eccaban are ahad koran Jawa Pos Radar Madura dhalem satawon satengnga.

Samangken ampon araji ke Jember namong netep e Camplong Sampang tor kaparengan potra. Salaen seggut nyerrat, Shalihin jugan menangka guru, nyeppowe santre tor samangken bisa tor- catoran lebat media sosial twitter: @nshalihindamiri tor jugan fesbok epon: Bin.

Posting Komentar

Lebih baru Lebih lama

Formulir Kontak