 |
| Carpan-madura-Fendi-Chovi |
Lalampan|| Carpan|| Fendi Chovi || Baja sar-asar maba, la bannya' reng-oreng se mangkat alako e baja laggu padha mole ka romana bang-sebang.
Tantona reng-oreng jareya aromasa aba'na geddhur, lesso ban
ngaronyo sabadan. Sabban are, ka bara' ka temor ta' ambu sakale kaangguy
nyokobi kabutowan odhi' re-saarena.
E Disa jareya kabannya'an alako tane ban badha se ajurung
ajaring juko' ka tengnga tase', alaban omba' ban angen se tandhes.
Bila mole alako, reng-oreng jareya padha saleng nyapa pa'
reppa'na atemmo e jalan.
"Baramma olle se alako," saodda Rama Jahri, saellana
tatemmo Satwi, tatanggana dibi'.
"Enggi, badha ollena keng sakone'. Kop-cokop kaangguy
dha'aran." Saodda Satwi, badanna gi' bacca saellana toron dhari parao
aba'na gi' sempat adhubas kalaban aeng tabar.
Rama Jahri tapanggi Satwi ban Dulla. Kadhuwana tatanggana
dibi'. Dulla buru abali dhari saba. Saellana saare bentheng abidda, ngopene
tatamennanna.
"Badanna bula ngaronyo kabbi, " serrona Dulla
nyambit dha' Rama Jahri ban Satwi sambi ajalan laonan katellowan.
"Enggi, tape Dika bakal jembar mon hasel tatamennanna
ngontongngagi dh' budhi are."
Oca'na Rama Jahri se buru ngongngang tamenanna, asabab aba'na seggut
madherrep lalakon dha' oreng laen.
Se katello ros-terrosan adha-kandha sambi ajalan on-laonan ban
apesa saellana dhapa' ka jalan patak dhang-dhang.
Dhapa' ka romana, Rama Jahri mokka' labang bengkona. Ta' abit, sowarana oreng Aqurra'
ekaeding ce' lantona ka sakobangnga e enggun jadiya.
Saellana mokka' labang bengkona ban ajalan nojju dha' kamarra,
Rama Jahri nengale potrana, ngonjur soko dhung-tedhungan.
"Ba ... ba ... Ba'na ma' gi' ma nyaman. Cong. Ta' ngeding
monyena Qurra', ya,?" Saodda Ramana.
Kacong jareya gi' paggun ta' aguli. Badanna dhung-tedhungan
sambi jur-ngonjuran e dhalem Romana.
"Mara duli se mangkada ka Langgar." Saodda sakaleyan
laggi' potra gantongan atena.
Sabatara, rama Jahri ka bara' ka temor e palemperra romana,
marengkes barang-barang se etangale car-kalacer, apo'-tompok, acalecceran
sabtraala.
Ropana na'-kana' se anyama Hamim jareya, gi' paggun ta' aoba
kacengkalanna. Aba'na manyaman ta' duli jaga. Rama Jahri duli maenga' pole
sakaleyan laggi'.
"Duli kalowar, Cong. Mon kal-macengkal. Ebes-bessa onggu
daggi'," saodda Ramana, matenggi sowarana.
Hamim jareya gi' paggun ngala' karebba dibi', manyaman
jur-ngonjuran ban sokona te'-kette'an.
"Mon ba'na ta' bajeng ngaji. Ba'na bakal kasta dibi' e
budi are," saodda ramana dha' Hamim.
Kana' jareya lakar seggut momos kaangguy ngaji ka Langgar.
Kana' jareya gi' paggun manyaman, badanna tedhung
jur-ngonjuran, ta' marduli pangestona tor babulanganna ramana.
Ta' dumadiyan, manjeng Ramana jareya sambi neggu' panebba, e
patao ka potrana se gi' ta' duli mangkat, se paggun maketthek toju' ngonjur e
dhalem romana.
"Duli, mon ta' jaga mesmes kole'na," saodda kalaban
sowara lebbi ranyeng, akaton nako'e.
Mereng dukana Ramana, Tamin ngagaludhus kalowar nojju dha'
kamar mandhi.
Ja' senga paggun enga' gella', tantona ana' cengkal jareya
bakal epoppo sakajana-kajana, sakellar kellarra kantos aba'na jarra.
"Na'-kana' tes-pettes balakka', kal- macengkal."
Oca'na Rama Jahri, apeggellan.
Baja sar-asar maba jareya. Rama Jahri aromasa bunga nangale
potrana ajalan kadibi'an. Nojju dha' Temor, dha' Langgarra Bindara Moji.
Langgarra Bindara Moji badha e penggirra Saba. E Langgar
jadiya badha Keyae seppo se kalonta alem tor seggut daddi panodan, asmana
Bindara Hasbi, bangaseppona Bindara Moji.
Rama Jahri emot e bakto potrana gi' kene', ngabassagi
kanca-kanca se ta' bajeng ngaji. Dhala la towa daddi oreng se ta' adhapor.
ngaji gu'-galuggu', kantos ta' kenneng kaparlo saamponna badha oreng se
adinggal omor.
Ja' tako'na aba'na mon na' potona ta' epaenga' sakale ban ta'
egiggiri daddina momos ajar ngaji ka Langgar.
Lamba', bangaseppona
seggut maenga' sopaja na' potona ekaneserre kalaban erabat tor epacokop
kabutowanna tor ekaemane kalaban etarragi ka Sakolaan otaba ka Langgar kaangguy
nyare elmo.
"Maske engko' nyangkole dunnya' dha' na' poto. Tape se
lebbi engko' eatorragi dha' Guste Pangeran, iya areya, nyangkole elmo na'
poto," oca'na bangaseppona lamba'.
Rama Jahri, pajat ngaolle sebbudan Rama dhari bangaseppona.
Sebbudan se nandaagi sadaja bangatowana menangka oreng molja tor bajjra.
Sabatara, Robiyana se gi' buru dhateng dhari Pasar duli
ngandel biddang kobi. E baja jareya,
Rama Jahri senneng ngenom kabi sambi ngenga'e kadaddiyan se ejalane e dhalem
odhi'na tor pan-saponapan se apakon dha' aba'na, se aropa kagateyan maenga' na'
potona.
"Asabab, manabi reng seppona ta' gate masakola tantona
na' potona badi korang pangaonenganna e budhi are," dhabuna Bindara Moji
apareng pamanggi e settong bakto se daddi panduman dha' aba'na.
Daddi mon badha na'-kana' cengkal tor ta' gellem kenceng
ngaji, duli paenga' kaangguy mangkat ka Langgar.
"Sabab ponapa", Bindara Moji neggese dha' Rama
Jahri.
Rama Jahri gu'-onggu'na, narema babulangan.
"Tadha' laen kaangguy nambai pangaonengan tor kajegjeggan
e dhalem nyare elmo."
Manabi reng seppona adinggal, tantona na' potona se bakal
ngerem du'a kaangguy daddi tera'na Koburanna bangaseppona.
" Sadaja amal manossa pegga' saamponna adinggal dunnya.
Kacebana tello parkara, sala settongnga ngangunge na' poto se ta' tos-potos
ngerem dua' kabagusan dha' bangaseppona. "
Rama Jahri gu'-onggu'na, meyarsa babulanganna Bindara Moji.
Tajjan, 25 November 2025
Fendi Chovi
