Areka Barangka Carpan: Panduman Matombu Pekkeran
Okara-Lalampan.com|| E settong Kellas se garidhu, guru Basa Madura seggut ngadhebbi
petanya sakone’ keng tajem akadhiya kerres, haha (ta’ lucu). “Pa’/Bu, mon
nolesa carpan, ganeka kodu emolae dhari ka’dhimma. Kaula ta’ oneng. Ta’ nemmo
careta?” nyaroscos petanyana tombu dhari na’-kana’ se sabendherra gadhuwan
bannya’ careta lebur se badha e pekkeranna, tape ta’ ngarte kadinapa cara
mateppa’ se tabalindhet dhalem pekkeranna. Kaodhi’an na’-kana’ tanto laen dhari
oreng seppo, bisa jugan aleburan, akadiya badha se buru nemmo koceng kene’ e
budhina sakola’an, badha se ngabas ojan raja, tor ojan ganeka etotta’ sareng landau,
badha jugan se terro acareta kancana se temmo ngalle sakola’an. Namong bakto epenta
sopaja noles careta se pandha’, pas elang sakaleng ngadha’.
Aponapa kerana (Yo Ndak Tahu Ko Tanya Saya)
Asabab ngen-angen (imajinasi) ta’ kalaban barangka neka
akadiya lajangan se tadha’ sennarra. Lebur, magumbira (katonna), namong bisa ceppet
elang eanyo’ angen.
Mela dhari gapaneka, barangkana carpan neka parlo, penting. Barangkana
carpan kasebbut, akadiya gambar kene’, otaba gambaran ngadha’, se noduwagi
jalan. Ta’ kako, tor jugan ta’ sampe’ nyambugel, coma apareng ondhagga otaba
rontodanna, sopaja se noles ta’ posang e tengnga jalan. Manabi pon ana’-moret-siswa
paneka ajar agabay barangkana carpan, garowa sabendherra pon ajar nyoson
pekkeranna dibi’, ngola panggaliyanna (wabil khusus emosi), tor majarna’ sampe
paham dibi’ ka kaodhi’an aba’ dibi’na.
Okara Gancara paneka coma panduman gu’-ganggu’, akadiya
guringnga sokon, otaba kurkit se pon rangrang etengngale e pasar. Saenggana molae
dhari ide, kantos kalemat neka bakal ekarassa gampang.
Se kabidan enggi paneka pajat tema: ngala’ tema se semma’
kalaban kaodhi’an re-sa’arena na’-kana’. Coba tanya’agi “Are samangken,
sampeyan lebur ka ponapa?” tema neka pajat aropa settong frasa/okara rengkes,
akadiya kajujuran, addreng asakola otaba alako otaba lebur ajalan/ongga ka
gunong, lebur ka alam se asre tape rombu, mesalla, se regget ka mata. Aneka abanto
moret kaangguy ngara’agi caretana, napana pole pon ngagali ka nilai-nilai se
badhi esampeyagi.
Tokoh: Panjak se maodhi’ careta
Panjak dhalem careta, aropa oreng se nonjul, panonjul, daddi oreng/keban
se lako ekacareta, kadaddiyan tor kaodhi’anna, ja’ nya’-bannya’, cokop dhuwa’an
sampe’ tello’an, manabi bannya’ gallu’, bakal alarbat tor bannya’ ranca’na.
sara sajan. Se parlo etantowagi enggi paneka: Nyamana, omor, sepak, karakter,
tengka-lakona dhalem careta.
Akadiya Sahi se tako’an tape orengnga emba’an. Mia penter tape
korang ngastete, Awan ta’ pate acaca’an tape lako andhi’ ide/pekkeran, otaba Ida
se lebur nolong oreng tape todhusan.
Ajak na’-kana’ sopaja angen-ngangen (membayangkan) tokoh, neka
akadiya kancana dibi’, baramma carana acaca, napa ngaceplos, napa kebiasaaanna,
napa se ekaleburi, manabi pon tokona neka tagambar kalan jarna’, jijib ban na’na’,
careta bakal odhi’.
Latar careta: Kennengan ban bakto kadaddiyan careta
Latar paneka kadaddiyan dhari kennengngan (banne kose
kalongguwan gi), bakto tor kabadha’an se nantowagi tokoh (suasana). Sajan semma’
latar careta kalaban kaodhi’an na’-kana’, sajan gampang dhalem noles. Akadiya:
sakola’an, roma, masjid, lapangan, perpustakaan, pasar.
Bakto bisa aropa gi’ laggu, rebbeng, ra’-tera’ tana, asar
maba, ondhung are, seyang, panas, otaba malem petteng calemodan, saenggana
ekarassa dhalem, napa gumbira, posang-kapekkeran (gelisah), otaba esto-emba. Ajar
noles latar-kabadha’an neka ngajari na’-kana’ peka/duli ngagali kabadha’an alam
magarsare.
Konflik: Papadu, Palappana Careta
Papadu dhalem careta (pandha’, novel otaba drama) aropa’agi
masala se eadhebbi tokoh/panjak-panonjul, tor ealami. Manabi tadha’ papaduna
sakale, careta bakal tadha’ rassana, atang, tadha’ ongga’an, tadha’ toronan,
tadha’ bilugan, napapole ta’ posang sakale, paleng enten, mon mangkada asakola,
neka tatandhung, otaba ojan. Papadu-konflik neka antara pangaterro-sajja-pangarep
aneka ta’ padha kalaban sanyatana tor kadaddiyan.
Akadiya se mangkada asakola, ta’ duli nemmo sango, buku PR elang,
tasengsal, sapatu bacca polana ojan, otaba polana etampesse oreng, kanca se
temmo ngoso’ tadha’ sababba, ebbal temmo maso’ ka dhalem roma, kue molang are
gaggar, es campor bakto para’ buka nompa, se apangngara agalanjar (wisata)
burung, tor samacemma.
Papadu-Konflik asababbagi oreng se maca neka pas anya-tanya,
baramma carana tokoh kasebbut, mamare masala ganeka, ngatase masalana ganeka
baramma. Papadu jugan bakal apareng kasempadan tokoh kaangguy dibasa tor ngagali
aba’na dibi’.
Alur: Jalanna careta: Pamokka’-Tengnga’an-Pongkasan.
Jalanna careta paneka aropa’agi rontodanna
kadaddiyan/peristiwa, manabi ka na’-kana’, se gi’ buru jar-ajaran, neka cokop
tello bagiyan, babak pon cokop
Pamokka’: kennalan tokoh, latar, kabadha’an
Tengnga’an: tombuna papadu-masalah/konflik tor sajan daddina
papadu
Pongkasan: ngatase masala/konflik.
Contona Barangka Pendha’
Tema: Sakanca’an, Tokoh: Awan (Todhusan), Asri (Baranca),
Latar: Sakola’an, gi’ laggu, Papadu: Buku PR Dina elang.
Alur:
·
Pamokka’: Awan ban Asri dhateng ka sakola’an
·
Tengnga’an: bukuna elang, esare areng-bareng
·
Ponca papadu: Bukuna etemmo dhalem kabadha’an
bacca
·
Pongkasan: Awan ban Asri nyalen PR areng-bareng
·
Baburugan becce’: Kanca emba/esto bakal ngancae
abanto
Barangkana carpan paneka banne pagar otaba dheng-andheng se
abatesse caccella na’-kana’ agabay careta pandha’, namong justru bakal abanto
na’-kana’, se ajar anoles bisa sajan apekker kalaban lebbi tarteb otaba jarna’
tor salpa’, ngagali kabadha’an magarsare (peka) tor parcaja dha’ aba’na dibi’. Kalaban
barangka se gampang/ringan, ta’ kose berra’ paneka, careta se asalla bakal morang-morang
ta’ etemmo konco’-bungkella (liar) neka bakal gampang esoson tor eanggi’
kalaban salpa’, nyennengngagi tor bisa apareng makna otaba baburugan becce’.
Tamba’an Pamanggi: bila badha lomba noles careta pandha’
(Carpan), eka’dhimma bai, tor e juknis (petunjuk teknis) neka badha baca’an:
Carpan harus mengandung pesan moral. Neka ta’ usa toles pajarna’ akadiya tolesan
ilmiah. Akadiya, kalaban tema lebur arabat-ngopene magarsare, pas etoles: Pesan
Moral-Baburugan becce’.
- Lebur asapowan
- Ta’ mowang sarka-sampah plastik ban samacemma sarombanan
- Ajaga kaberseyan neka banne coma kaangguy samangken, tape jugan…
TA’ USA TOLES KADI PANEKA. COKOP DADDI CARETA, otaba PABADHA
DHALEM CARETANA.
Badha se ta’ etoles neng ka’dhinto: enggi paneka PANGGALIYAN (perasaan
yang dialami tokoh atas kejadian-konflik) se ekarassa sareng tokoh atas
kadaddiyan se teba kaaba’na, tor KEMBANGNGA OKARA.
