MEYARA KASEHADAN BADAN
Resensi : Fendi Chovi
Lalampan.com—1447. Aponapa ma' seggudan bannya' oreng tarapas
badanna tor katebanan panyake' ta' bu-ambu? Sala settongnga manabi etalegtegi
enggi ka'dhinto ta' meyara kasehadan kasaeyanna badanna.
Arabat badan tor majau tebana panyake', tantona kodu akor
antara dha'aran sareng partengka laenna se ta' ngonjang dhatengnga panyake'.
Badha settong serradan anyar, se aropa buku se terbi' e taon
2025 tapongkor. Ngatorragi jajarbaan dhalem anggidan se jarna', kaangguy
apareng sen-pessen tor babulangan sarta pangaonengan kaangguy emaos sadaja
magarsare. Anggidan paneka abul-ombul, 'Roseyaepon Kasehadan", buku tepes
coma 72 kaca.
Maos jugan
- MENU LALAMPAN.COM
- Download Kamus Ini Sekarang
- Oca’ Pangalemma Anggota Badan
- Bakto Loppa se Abajanga || Fendi Chovi
Eanggit sareng guru Pamerte Basa Madura seasmaepon, Haji Abdir
Arifin, kalonta kalaban sebbudan pandha',
Ji Abdir.
Parlona maos buku paneka e baja mangken tantona akor kalaban
kabadha'an tombu jurbuna macemma panyake' se ampon teba dha' sadaja magarsare
ta' kalaban mele omor.
Towa tor ngodha ta' nyengla dhari anglo se saabidda cekka' e
badanna kantos egiba daddi patena. Tantona para maos apetanya e dhalem ate?
Kadinapa pandumannepon meyara pangaonengan kaangguy aromat
badan?
Dhalem okara Ator Kabidan seatorragi panganggit buku paneka,
ejarbaagi kalaban jarna' na' na' kaangguy epetthek tor amaos areng-sareng.
Tantoepon bannya' megunane e nalekana maos buku paneka.
E dhalem pamanggi Ator Kabidan salerana se nyoson tor nganggit buku paneka, aromasa
korang panthes nyerrat Roseyaepon Kasehadan amarga banne bagiyan panglako :
pakar kasehadan, dokter tor perawat. Coma pangaterro kaangguy nombuwagi
pangaonengan 3 Sunnah Nabbi kaangguy arabat kasehatan sesaestoepon argana
meyara kasehadan banget larang e baja mangken. Salerana ajajal nerbittagi buku
paneka. Kaangguy panduman.
Manabi Ajunan, padha poron kaangguy metthek pangonengan
ngengenge roseyaepon Kasehadan, tantona parlo mondhut buku paneka.
Parlo ekagali, manggi'i reng-oreng aomor ballung polo taon ka
attas tantona malarat e baja mangken. Napapole, nyare oreng seamor saratos
taon. Berra', kabbi ampon katon aomor pandha'. Sanajjan badha, tantona
rang-rang.
Odhi' sehat tor lanjang omor tantona eyareb sadaja oreng.
Namong, ta' sadajana ngagali. Maske pangaonengan kaangguy arabat kasehadan
badan paneka epetthek dhari lalampana Guste Kanjeng Nabbi Muhammad Saw.
Ngaromat kasehadan tor meyara kasaeyanna badan se daddi
majembar bungana kabadha'an e dhalem kaodhi'an se bakal ejalane tantona
langkong parlo. Eparenge badan sehat tor omor lanjang kenneng giba ngadebbi
kabadhaan aobana taon tor lebbi abit kaangguy along-polong sareng bala tangga
sareng na' poto.
Tantona, ta' sadajana kellar ngalampaagi. Namong, manabi ta'
karomat dha' bingkeng are bakal ta' sae tor ajunan bakal ngaonenge ce'
kasehadan paneka larang argana.
Pangarep kaangguy arassa ta' seggut anglo e dhalem badan
mosthena badha pandumanna tor mal-amalan se kenneng toro'e. Kadinapa?
Ta' katebanan anglo, tantona ampon rangrang eoladi e baja
mangken. Ta' bannya' reng-oreng se serra' roba tor badanna, sadajana katon
tarapas manabi eoladi. Ta' sakone', ngangodha-dhan enggal adinggal omor e baja
ngodha. Macemma panyake' tombu e badanna reng-oreng ta' duli nyengla. Kantos
egiba daddi pathena.
Pramela kadipaneka, tantona parlo settong panduman, kaangguy
meyara tor arabat badan sopaja kengeng jembar jumambar ta' eomek kalaban
panyake'.
Amarga Kasehadan settong kabadha'an se larang argaepon
tantoepon parlo buku panduman paneka emaos. Saestona se nganggit buku
roseyaepon kasehadan paneka ta' lendha nyebarragi elmo kaangguy epetthek sadaja
magarsare.
Maos jugan
- Puisi Madura:Cangka Asela
- Esai:Sakola’an Tombu Nyenna
- Pidato Bahasa Madura: BAJENG AJAR MANDAR DADDIYA ORENG SE POJUR
Tantona buku paneka ta' kera epangombar
kantos eoladi. Asabab tamaso' elmo se larang. Asabab ta'
kengeng saestona roseya paneka aetorragi daddi pamaosan tor pangonengan dha' ka
oreng bannya'.
Nangeng, Ji Abdir ta' kellar kaangguy nyempen mal-amalan se
epondhut dhari dha-dhabunna oreng Socce, enggi paneka Guste Nabbi Muhammad Saw
tor pangaonengan laenna searopa abadi "Jamo Pagaran" kaangguy jamo
kasehadanna badan tor kakowadan.
Ponapa petodu tor dhabuna Guste Kanjeng Nabbi kaangguy arabat
Kasehadan se arganaepon larang paneka?
E jarbaagi e dhalem buku paneka bab Tello' Amalan Sunnah
Nabbi, searopa tengka bagus tor adab e dhalem adha'ar, aseram kantos asaren.
Sakabbina ejalassagi kalaban jarna'. Esellae pangaonengan macemma tamba otaba
obat, sen-pessen sareng riwayatepon panggit.
Ngereng paduliyan pondhut buku paneka kaangguy enggal emaos
sabelunna apangrasa ketabanan anglo se
tantoepon bakal nyeksa dha' ka badan e bingkeng are. Asabab ta' ngagali
panduman se lerres meyara kasehadanna badan. Lerres enggi?
Tajjan, 2025
Fendi Chovi, na'-kana' ngodha se lebur nyerrat macemma careta
e dhalem Basa Madura
