Pidato Bahasa Madura|| Paramasastra|| Teks pidato berbahasa
Madura ini disusun untuk mendukung upaya pelestarian Bahasa Madura di kalangan
generasi muda, khususnya di lingkungan Lembaga Pendidikan. Dengan tema “BAJENG
AJAR MANDAR DADDIYA ORENG SE POJUR”, pidato ini dapat dijadikan contoh sambutan
atau materi latihan berbicara di depan umum menggunakan Bahasa Madura. Naskah
ini dikumpulkan dari seluruh peserta FTBI Kabupaten Sumenep Tingkat SMP
(Negeri/Swasta).
Semoga teks pidato ini bermanfaat bagi guru, siswa, maupun
masyarakat umum yang ingin mempraktikkan pidato Bahasa Madura untuk acara
sekolah, lomba pidato, atau kegiatan kebudayaan lainnya || Redaksi Lalampan.com
BAJENG AJAR MANDAR DADDIYA ORENG SE POJUR ASARENG BINARENG
LAMPAEPON HARI PENDIDIKAN NASIONAL SE KAPENG 116,
Assalamu'alaikum Warahmatullahi Wabarakaatuh.
Alhamdulillah ...... Wasyukkurillah ...... Alhamdulillahi
rabbil 'alamiin
Se molja para rabu, dewan juri, para seppo, para anom,
tan-taretan, sareng ca-kanca se same parjuga, se sapesan ngereng badan kaula
sareng panjennengngan areng sareng ngonju'agi poji sokkor ka ajunan epon Allah
Suhanahu Wa Ta'ala se ampon apareng pan-saponapan kani'madan; omor lanjang,
bakto se legga, kakowadan, kong-langkong pangaonengan tor elmo se eparengngagi
guru neng e sakola'an, langgar otaba pondhuk. Panyo'on tor pangareb malarmoga
elmo ka'dhinto daddiya elmo se ngontongngagi monggu dha' ka aba' kaangguy sango
kaodhi'an e dunnya tor aherat.
Para rabu sadaja, e bakto samangken badan kaula sadaja salaggi'
marengeddi Hari Pendidikan Nasional se kapeng 115 (lerres e are Salasa tanggal
2 bulan Mei taon 2023). Tanggal ka'dhinto menangka tanggal kababbaran Ki Hajar
Dewantoro se kasambat Bapak Pendhidhigan Indonesia. Saestona Ki Hajar ka'dhinto
menangka sala settong manossa se etantowagi sareng Allah daddi lantaran
kaangguy mabecce' tor malandhu pendhidhigan neng e nagara Indonesia.
Pramela dhari ka'dhinto ampon daddi kawajiban kaula sareng
panjennengngan kaangguy nyokkore ni'mat epon Allah ngengenge kamajuwan
pendidikan, kalaban bukte sokkor se lerres tor nyata.
Para rabu se same parjuga
Asabab bakto samangken badan kaula sareng ca-kanca namong
daddi moret e sakola'an, guli enneng se bisa elampa'agi menangka bukte aba'
asokkor dha' ajunan epon Allah SWT tadha’ laen enggi ka'dhinto kalaban bajeng
ajar.
Tareka se kabilang bajeng ajar enggi ka'dhinto akadi ta' cokba
maos buku pangajaran, mabannya' nyo'on petanya dha' ka guru, bajeng ngalakone
ponapa se daddi parentaepon guru. Kalaban bajeng ajar, badhi gampang nambai pangaonengan.
Ta' oneng daddi oneng. Se malarat daddi gampang. Se sakone' daddi bannya'. Se
cope' daddi lebar. Serbek daddi jembar.
Ponapa pole e jaman kamajuwan akadi samangken ka'dhinto. Jaman
se namong buto dha' ka reng-oreng se anggadhuwi pangaonengan tor kalongedan.
Kalakowan marlowagi oreng se penal sareng kodu gaduwan kalongedan. Daddiya
ponapa bisaos tanto esongler esare se paleng penter sareng se gaduwan
kalongedan e cem-macemma bidang. Oreng bannya' bakal amolja'agi oreng se
penter. Rengkes epon, bajeng ajar badhi andaddiyagi oreng penter, oreng penter
tanto bisaos daddi oreng se pojur. Lerres dhabuepon bangaseppo dhimen ja' oreng
pojur neka matena ngonjur. Malar moga badan kaula sareng ca-kanca moret SMP
kabupaten Songennep sadaja tamaso'a dha’ ret-moret se penter tor pojur. Aamiin
Ya Robbal Alamiin.
Saka'dhinto pamator badan kaula, manabi badha tor-ator se
korang sonduk monggu dha' panggaliyan para rabu sadaja, sae ngengenge okara, sorot
sanderra basa otaba laennepon, badan kaula nyo'on sapora se tadha’ bates epon. Kacepot
gulana mera sala lopot nyo'ona sapora.
Wabillahi taufik Wal Hidayah, Wassalamu'alaikum Warahmatullahi Wabarakaatuh.
