Pidato Bahasa Madura|| Paramasastra|| Teks pidato berbahasa
Madura ini disusun untuk mendukung upaya pelestarian Bahasa Madura di kalangan
generasi muda, khususnya di lingkungan Lembaga Pendidikan. Dengan tema “Arabat
tor Malangggeng Basa Madura”, pidato ini dapat dijadikan contoh sambutan atau
materi latihan berbicara di depan umum menggunakan Bahasa Madura. Naskah ini
dikumpulkan dari seluruh peserta FTBI Kabupaten Sumenep Tingkat SMP
(Negeri/Swasta).
Semoga teks pidato ini bermanfaat bagi guru, siswa, maupun
masyarakat umum yang ingin mempraktikkan pidato Bahasa Madura untuk acara
sekolah, lomba pidato, atau kegiatan kebudayaan lainnya || Redaksi Lalampan.com
Arabat tor Malangggeng Basa Madura
Bismillahirrohmanirrohim Alhamdulillahirobbil alamin washolatu
wassalamu ala asrofil anbiya wal mursalin Sayyidina wa Maulana Muhammadin wa
ala alihi wa shohbihi ajma'in Amma ba'du.
Para rabu se molja, kong-langkong dewan juri se parjuga. Ta'
loppa jugan ca-kanca se padha ngereng lomba pidato e saat mangken malarmoga
namba'a kaelmoan monggu dha' badan kaula tor sadaja se padha ngereng lomba
pidato ka'dhinto.
Se sapesan, nyara same-same ngonjuggagi poji sokkor monggu
dha' ajunanepon Guste Allah, se ka'emma bakto mangken badan kaula sareng ajunan
sadaja teptep kapareng rahmat, taufiq tor hidayah epon, saenggana padha bisa
appanggi salera e kennengngan ka'dhinto e dhalem tojjuwan enggi ka'dhinto padha
terro ngaolleya tambana elmo pangaonengan e dhalem hal tor-mator e ajunanepon
panjennengngan sadaja.
Sholawat tor salam nyara ja' sampe' cokba eyatoragina monggu
dha' salerana se Agung Nabiyullah Muhammad SAW, ponapa pole e bulan mangken gi'
badha rekka' bawuna bulan kalaheranepon, bulan molot.
Para rabu tor dewan juri se padha parjuga.
E saat mangken badan kaula nyo'ona edi tor sapora se raja
amarga badan kaula badha tor-ator se badhi eatorragina otaba pidato, enggi
ka'dhinto hal Basa Madura menangka Basa Ebu se e baja mangken molae esenglae
otaba edina'agi sareng oreng Madura dibi' egante sareng basa-basa camporan se
maso' lebat pan-saponapan cara. Badha se lebat HP se kasebut basa toktok, badha
jugan se kasebut Bahasa Gaul, se agiba gan sakone' jau dhari Basa Madura otaba
Basa Ebu. Kabaddha'an kadi samangken ka'dhinto manabi terros eocol paju ta' jang
burungan Basa Madura bakal elang.
Pramela dhari ka'dhinto, komalancang badan kaula sakadar
maemot monggu dha' sadaja cakanca sakola'an konglangkong badan kaula dibi',
nyara padha'a ngagungi kaparduliyan ka'angguy padha'a aromat tor malangggeng
Basa Madura paneka se aropa Basa Ebu didinan dhari para bangaseppo se ampon
aracek tor ngajum badhana Basa Madura.
Para rabu tor dewan juri se padha parjuga
Lakar ta' gampang arabat didinan para bengaseppo, ponapa pole
aropa Basa Madura. Tantona gudha'an tor gangguwan ce' rajana amarga kamajuwan
jaman mangken ce' santa'na tor bannya'na macem kadaddiyanna. Ngabidi antara magarsare
Madura asli sareng oreng lowar Madura, tor salaenna mangken ampon acampor
rokon, odhi' e settong kennengngan se ka'dhimma aherra kadaddiyan campor basa
aneka ta' bisa esenglae. Salaenna ka'dhinto e sakola'an-sakola'an ampon
nganggguy Basa Indonesia, sae e tempona kagiatan pangajaran e kelas, e jam-jam
istirahat, e barung-barung sakola'an se esebbut kantin. Hal kasebbut malarat
esenglae amarga guru tor jugan siswa ta' sakone' se dhari luwar Madura.
Sadaja rabu se padha parjuga.
E kasempadan mangken badan kaula arassa ce' butona tor ce'
ngarebba monggu: se sapesan dha' cakanca sakola'an ka'angguy manyettong
semangat ngangguya Basa Madura sanaossa sakone' malarat, sae e jam-jam
istirahat e sakola'an ponapa pole e compo' bang-sebang. Se kapeng dhuwa',
panyo'on dha' oreng seppo tor sadaja guru jugan padha'a saroju' ka' angguy
aguna'agiya Basa Madura e bakto-bakto se sae kadiya e kalongguwanna ajunan para
guru tor reng seppo ponapa pole e sakola'an pas wajibbagi tekka' sa'are
dhalemmanna saminggu ka'angguy nganggguy Basa Madura.
Panyo'on ka'dhinto ekarassa cangkolang, amarga badan kaula gi'
kabilang moret. Nangeng e kasempadan mangken badan kaula kapaksa ngatoragi niyat
ka'angguy areng-sareng arabat tor malangggeng Basa Madura. Asabab manabi banne badan
kaula sareng ajunan sadaja, pasera pole se bisa malangggeng Basa Madura ka'dhinto.
Sadaja rabu se molja
Saka'dhinto tor-ator se bisa badan kaula atoragi aropa
panyo'on tor nge-angen ka'angguy arabat tor malangggeng Basa Madura saenggana
Basa Madura se badha tep-tebba langgeng daddi Basa Ebu monggu dha' sadaja
magarsare Madura.
Manabi epanggi' tor-ator tor jugan sola tengka badan kaula se
korang sonduk monggu dha' panggaliyan ajunan para rabu tor dewan juri sadajana,
badan kaula nyo'ona sapaora se saraja-rajana.
Summa salamualaikum wa rahmatullahi wabarokatu.
