Bunces ta' arassa lesso. Molae gu-laggu kantos malem
gi' paggun toju' mejet agabay teker. Kantos oreng-oreng la padha tedhung kabbi,
Bunces gi' ta' mare se agabay teker. Menorot para tatanggana, Bunces ce' koduna
agabay teker kaangguy macokop kabutowanna kaluwargana.
"Mara, kemma rakarana, tekerra elakonana
pole," ca'na Bunces.
Se bine' ngala' laddingnga pole. Motong rakara.
Epabagus ban esaba' eaddi'anna lakena se agabay teker.
"Ella, ba'na istirahat gallu," ngoca'
mattowana. "Ja' bi-kabbiyagi Mon alako." Sawodda dhari attas lencak.
Bunces lakar lebur agabay teker. Polana argana teker ampon
larang. Ponapa pole, mosem bako ampon dhateng. Settong tekker argana bisa paju
sagame' ebu ropea.
Oca'na oreng badha teppa'na. Ja' Bunces kodu onggu
alako. Taker koduna kadhang kantos loppa se abajanga.
Biasana sa/are Bunces bisa ngalakone ban mamare dhuwa'
teker. Kadhang lebbi mon tadha' hajat otaba kaparlowan e tatanggana.
Badhana teker ka'dhissa ejuwal ka oreng se biyasa
nangga' teker. Omomma teker neka ekagabay bungkossa dhaunna bako otaba lama'
ajemmor dhaunna bako.
Maos jugan
- Rora Basa Madura
- Oca’ Bakal dhalem Basa Madura
- Perjalanan dan Perjuangan Dakwah Abu Hasan al-Shadhili
- Alembay Pole
Kabiyasaanna masarakat se ekennenganna Bunces. Lakar
biasa agabay Teker ban ejuwal ka oreng laen, otamana e mosemma oreng namen
bako.
Omomma, Teker ganeka ekagabay dhari rakara. Rakara
ganeka eokor ban eketthok. Bila lanjangngga rata. Pas ebaccae aeng sopaja lemmes sabelunna eanggit
daddi teker.
Rakara se eyangguy biyasana se ampon towa tor kodu ekala' dhari bungkana Tarebung se ampon tenggi. Oreng-oreng seagabay teker paneka biyasana ampon andhi' panaek Tarebung e dhalem matoron rakara kasebbut.
Mon rakara dhari bungkana nanagan, arassa gi' korang
towa ban hasella ta' bagus. Bunces ta' kera kobater bakal kakorangan Rakara.
Asabab bannya' bungkana Tarebung.
Rassana sabban teggal badha bungkana tarebungnga.
Ajajar tombu e penggirra otaba etabunna tana teggalan. Badha jugan se tombu e
nga'-tengnga’anna teggal.
"Kabutowan oreng se namen bako ka teker sajan
atamba. Kadhang badha se mowa' lebbi dhari sa Pikep," sawodda Bunces.
Bunces ta' alako kadibi'an. Biyasana ebanto moso
binena, kadhang etolongi ana'-na. Poko’na sa’are bisa mamare dhuwa' teker.
"Maju' pamare teker reya. Ma' lekkas ekone'e bila
la bannya'. Kan lekkas keya andhi' pesse," ca'na Bunces ka binena.
"Pongpong mosem bako. Argana teker onggu larang.
Mon bisa mamaso' bannya' teker. Asli Pesse reya." oca'na pole.
Bunces kadhang loppa se abajanga sakeng leburra e
dhalem agabay teker. Poko’na bila toju' agabay teker. Bunces pas mejet akaton
ta' ngurus ka se laen.
Sakeng gatena e bakto agabay teker. Bajang duhur
kantos sobbu daddi lako ceccer ta' elakone. Parentana Pangeran edina. Bajangnga
edina. Gun se paddhang eadha'na mata gun ya alako tekker se madhateng pesse
bila ejuwal.
"Kassa' se abajanga." ca'na se bine'.
"Antos gallu, engko' mamareya sakale. Acora'
nanggung." Saodda ka binena.
Sabban se bine' lako nyoro se abajanga. Badha bai
alasan dhari Bunces.
Bila toju' agabay teker. Bunces toju' mejet. Kadhang dhu
ejjaman ta' jaga sakale. Kantos tekkerra mare saparo.
Bannya' oreng se noro' ngalem. Ja' mon teker gabayanna
lakar bagus. Lebur eabas ban tadha' se rang-rangrang.
Bila la mare agabay. Teker jareya e gulung ban
epanalpe' ka geddung romana. Epajajar. Etale'e sopaja ta' salsal.
Kadhang gulungan teker jareya daddi kennenganna budhu'na
koceng ban pangorbina ngetek otaba tedhung.
Malem jareya Bunces mamare ngalakone teker. Molae baja
asar kantos lebat esa', gi' paggun alako nganggit teker.
"Ba'na mon lempo tedhung gallu, Dina ja' paksaagi
mon la ta' pate kowat." ca'na se bine'.
"Lakone laggu' pole. Mon alako ja' bi-kabbiyagi me'
badanna ta' kellar daggi' sake'." Ca'na se bine' sambi' nyander.
Kabutowan dha' tekker atamba. Se agabay teker ta'
bannya'. Bunces olle hasel raja e bakto ajuwal tekerra.
Hasel se bannya' madaddi Bunces atamba bajeng alako.
Baktona abajang ta' eguna’agi abajang. Tape eyangguy ako'-roko'an ban ngenom kopi.
Sabban are Bunces terros agabay teker. Kadhang kol
sapolo malam gi' paggun agabay teker.
Se bine' abanto ngetthok rakara, epabagus ban esamba'
ka aeng sakejja'. Bunces se majalan agabay teker.
Asabab korang istirahat, Bunces ngoca' ja' aba'na
sake' cethak'. E bakto jaga dhari kalakowan agabay teker. Arassa cethak
tolelengen. Ekarassa ta' nyaman.
" Bruk !!!
Badanna Bunces robbu ka tana. Binena se nengale noro'
akowak dhari jauna. Nyander ka lakena.
Oreng-oreng padha dhateng. Ngedhing badha sowarana
oreng aberruy. Bunces kalengnger.
Badanna gi' ta' jaga.
Oreng-oreng se dhateng nyoro ka se bine'. Sopaja
Bunces lekkas esambi ka roma sake'.
Oreng-oreng kompak nolonge. Badanna eyosong ka mobil pikep.
Etarragi ebuwa' ka roma sake’ kacamadan.
Oreng-oreng badha se ngoca'. Nesserra ka Bunces.
Bajeng alako tape taker loppa se abajanga. Jarowa', la ecapo' panyake'.
E dhalem parjalanan nojju ka roma sake’. Bunces gi'
ta' jaga. Binena sossa asabab bannya' pekkeran.
Se bine' ngosap badanna lakena se gi' kalengnger
sambi' nyapcap aeng mata.
Fendi
Chovi, ngabdi daddi guru. Jugan lebur nganggit careta ngangguy Basa Madura.