Ajar Basa Lowar
Lalampan.com. 1446. Samangken kaula ajar Basa Lowar,
enggi paneka basa se eakowe sadunnya, ca’na oreng basa se amonye wes-kowes,
aisy, ban samacemma, saestona gun bur-lebur, malle tao essena dunnya, saestona samangken
gampang manabi sampeyan terro oneng kabadha’an, samangken pon badha AI (e-ay),
mesal epon sampeyan terro onenga kabadha’an neng palestina, nyare neng google,
kala’, pas alle ka AI, soro arte’agi ka basa Indonesia, samangken gi’ ta’ earte’agi
ka Basa Madura, ganeka pon bagus ollena arteyanna, ta’ akadiya taon-taon se
tapongkor manabi sampeyan aguna’agi Google Translet.
Lebat napa kerana kaula ajar Basa Lowar, samangken
bannya’ media sosial akadiya tiktok otaba applikasi laen se bisa ajar basa
ponapa bai se sampeyan katerrowe, se badhi akursus pon tadha’ baktona, tadha’
pessena, saenggana cokop adownload (donlot) applikasi, samangken pon bannya’,
akadiya Duolingo, Stimuler, moondly, IETLS ban samacemma, kaula saestona pon
abit se adonlot Duolingo, keng ta’ pate ajar, ajar sabulanan, ambu, ajar pole
sampe lema bulan, namong gun olle mare, tao-paggun ta’ pate tao, bannya’ abi’na
ka ate.
Manabi ajar neng Duolingo, aneka padhana se amaen game
(gim), enggi paneka buto nyaba (ate), sampeyan eparenge ate lalema’, bila
sampeyan ajar, sampeyan bakal esoro mele, mele ban mele, manabi sala, elang
settong atena, manabi sala terros sampe’ lema kale, sampeyan bakal esoro nyare
ate pole, carana nyare ate acem-macem, badha se kalaban nenggu iklan (biyasana
mon gratisan enggi lakar, eberri’ iklan).
Enggi manabi samangken pendha ngarte manabi nenggu
tiktok se abasa engris sanajjan ta’ ngarte sadajana, tantona kaula perak polana
pon sakone’ bannya’ ngarte carana noles Basa Madura se teppa’, sanajjan sorot
sanderra Basa Alos Madura gi’ bannya’ kalerona, akadiya bila ngoca’ kaula adha’ar,
sampeyan nedda, ka’dhinto tantona tabalik, se lerres, kaula nedda, sampeyan
adha’ar.
Samangken kaula gun coma oneng Basa Lowar, banne kose
penter, enggi pentengngen jugan ajar Basa Lowar paneka, asabab ta’ eguna’agi sabban
are, manabi Bahasa tor Basa Madura ampon eguna’agi sabbar are, saenggana pon ta’
kako, napa pole gun ollena ngedhingngagi e tiktok akadiya kaula paneka, banne
ollena asakola.
Sanajjan Ajar Basa Lowar, Pangarep Basa Madura ta’ Lobar
Mat Toyu noles buku basa Madura: Embi' Celleng Ji Monentar, Kerrong ka Omba', tor jugan Ngejung saenggana ngaolle tandha Pangesto Yayasan Kebudayaan Rancage 2020 tor 2022.