lalampan.com. Salasa, 14 Jumadil Awal 1445 (28 November 2023), are ganeka ondhem pon petteng molae gi’ laggu, sobung are nyongop sakale, molae buru mella’, dhari sabellun sobbu kantos bakto dhuha, biyasana kol ennem lebat lema bellas mennit, asabab badha loudspeaker se amonye sabban bakto, akadiya bila ampon pokol ennem pas amonye, sekarang tepat pukul enam, tepat pukul enam. sapaneka jugan bila pokol petto’, amonye pole, sekarang tepat pukul tujuh, tepat pukul tujuh, sapaneka saterrossa dhalem saare samalem, enggi badha se perak kalaban badhana jam se amonye lebat loudspeaker, enggi badha keya se ta’ laten. Bakto ganeka are katon ta’ ngombar sakale, asabab kaalangan ondhem petteng.
Maemot ojan, se ka’dhimma bannya’ oreng noles
kalaban ocen, ojen, namong manabi se lerres dhalem eja’an 1973 enggi paneka
OJAN otaba ojan (aneka pera’ eparaja epakene’, tadha’ bidana), manabi eja’an
2011, enggi paneka ojhân, sae kalaban horop kene’ otaba raja, langkong sae
ekaenga’e sopaja ta’ paggun noles ocen, ojen, ozen, banne sapaneka enggi.
Maos jugan
- Luka yang Menua
- Soal Bahasa Madura Kellas IX SMP MTs
- Puisi-Puisi Jufri Zaituna
- Coma Bisa Esto
- Puisi Nailus Sururi Barisan Masa depan
Bara’, bila ampon bulan November, paneka pajat bakal
maso’ monggu mosem bara’, osomma ojan, dhalem noles bara’, neka pajat same
sareng noles bara’, enggi ara kiblat, manabi oreng madura, bila ashalat,
abajang, neka ngadhep kiblat, ngadhep ka bara’, abajang ngadhep ka bara’,
samangken ampon (mosem) bara’, napa bidana, ban kadinapa cara abida’agi. enggi
ebutowagi pangarteyan dibi’, ngarte ka badhana okara. mon badha okara sengko’
abajang ngadhep ka bara’, tandhana oca’ bara’ kasebbut agandhu’ arte ara enggi
paneka bara’, bara’ dhaja, dhaja, mordhaja, temor, mor lao’, lao’, bara’ lao’.
manabi badha okara, sateya la bara’, tandhana ngoca’ dhapa’ mosem bara’, ojan
bakal toron sabban are sabban malem, bisa bu-ambuwan, bisa aella’, poko’na
dhalem mosem bara’, ya badha ojan, badha panas, banne etoles perek, pere’, bere’,
berek.
adungngeng ojan, se ka’dhimma taon samangken,
panemor lakar abit gallu, sampe badha se kakorangan aeng, asabab somor epon
kerreng, somber ta’ metto aeng, tor salaenna, enggi se pojur, tase’ ta’ asat.
Dhimen kaula jugan pangalaman arassa’agi sossana aeng, enggi paneka bakto neng
kosan, somor se ta’ pate dhalem ka’dhissa’ kerreng, melana se paleng ekarekong
enggi paneka bakto aba’ bakal mowang, akadiya nekkane hajat (BAB), aneka se
paleng ekarekong, saenggana ambu majar ka WC terdekat, akadiya pom bensin. e
nagara paneka pajat ta’ esadhiyai WC Umum lan gratis. padahal oreng mangken
neka ampon biyasa aparjalanan jau. musafir.
Taon mangken oreng paneka pajat ngantos ojan molae
aher bulan oktober ka’dhissa’, asabab panas se ngartang, se manggang ka badan
katon ta’ kenneng pellang. Seyang otaba malem, oreng bannya’ se ojang, lalak,
pello ngerray, akaton e babana bume paneka badha apoy se rabak, saenggana bume
ekarassa ce’ panassa, napa pole bungka’an otamana jate, neka ampon sobung
dhaunna. Napa pole ampon bannya’ alas-alas se ampon molae gundhul, konyong,
enggi, ampon sajan panas, bannya’ oreng sajan ngalengsang, asabab panas, pelka’,
ngenom aeng enggi, namong akemmeyan se badha, ngenom aeng sakone’, sakadarra,
aneka asababbagi apello, ngerray, manabi ta’ ngenom, enggi pelka’ se badha.
bannya’
bungka’an se pon epoger, saenggana bungka’an ampon rang-rang neka sajan mapanas
ka bume, tor sajan etambai kalaban bannya’na sarpa plastik, se mossa’e songay,
bannya’ oreng se aromasa ja’ songay paneka menangka pamowanganna plastik ban
samacemma, enggi ampon, neka sakone’ bannya’ paggun apareng akibat monggu tamba
panas. Lakar manabi bulan November paneka lakar baktona ajaga roma, ta’ kera
neng ajalanan, keng polana sobung sempenan, akadiya sempennan berras, jagung,
otaba juko’ kerreng, saenggana pagguna kodu ajalan.
Maos jugan
- Nyanyian Rindu Untuk Pemimpin
- Rakara (Naskah Lakon, Anwari)
- AH Hasmidi Lebur ka JokPin
- Parebasan Madura, Sanja' Kona
- carpan: Mahbi Abine Pole
Kantos are mangken, ampon tello are ojan e kampong
paneka, manabi kaula apanggi ojan, enggi paneka ampon molae menggu se
tapongkor, bakto aba’ entara ngajar ka kottha, are ganeka epenta tolong sopaja
apareng pangaonengan bab tolesan careta pandha’ basa Madura. bakto ganeka kaula
ngaop e romana kanca, saenggana salamet dhari leppos. Are satto se buru, kaula
tatemmo kalaban ojan, bakto aba’ entara ka kottha, lebat lao’, enggi paneka
lebat jalan raja, dhapa’ ka balanan, se kanan kacerra ka’dhissa’ balanan tor
bungkana camara, eka’dhissa ojan kantos lampu merah terminal Arya Wiraraja
Songennep, badan kaula pajat ngangguy jas hujan, namong sapatu bacca. Are ahad
molena dhari wisuda’an, enggi ondhem ampon petteng, namong kantos dhapa’ ka
roma, salamet ta’ kaojanan, namong jalan dhari dhaja kapedi paneka ampon bacca.
Dhari satto ampon ojan, keng en-laen kennengngan,
sennen ba’ari’ paneka ojan para’ saare. badha se sampe’ lowa aengnga, enggi
ekoca’ banjir, genangan, aeng cekka’ ta’ agili, asabab jalan palebadan gilina
aeng paneka asompet, asabab bannya’ plastik se ebuwang saromban.