Lalampan.com—1447. Pidato Bahasa Madura|| Paramasastra|| Teks
pidato berbahasa Madura ini disusun untuk mendukung upaya pelestarian Bahasa
Madura di kalangan generasi muda, khususnya di lingkungan Lembaga Pendidikan.
Dengan berbagai macam tema setiap teksnya, pidato ini dapat dijadikan contoh
sambutan atau materi latihan berbicara di depan umum menggunakan Bahasa Madura.
Naskah ini dikumpulkan dari seluruh peserta FTBI Kabupaten Sumenep Tingkat SMP
(Negeri/Swasta).
Semoga teks pidato ini bermanfaat bagi guru, siswa, maupun
masyarakat umum yang ingin mempraktikkan pidato Bahasa Madura untuk acara
sekolah, lomba pidato, atau kegiatan kebudayaan lainnya || Redaksi Lalampan.com
Bupa' Babu' Guru Rato
Assalamualaikum wr. wb.
Mukaddimah
Sadaja rabu seppo se kaoladan same molja namong se kaoladan
same parjuga. Kaonjuga saleraepon se molja dewan juri otaba menangka kon-konan
se abakkele dhari Dinas Pendidikan Kabupaten Sumenep. Karengga sareng
sadajaepon kahormadan, jugan songkem pangabakte, ta' cokba tettep kaatora dha'
bapa' ebu guru se kaonang penter socce menangka kaca kebbang monggu magarsare. Ta'
kadinggalan jugan para kanthe, ngangodhadan se addreng gumate merte dadinggalan
bangaseppo se same gumbira.
Katengal sadaja rabu ampon abaris damar. Saleraepon padha
binar asareng caja are se ampon nyonar. Pramela dhari ka'dhinto, ngereng
sambung tor buntel ja' ga'-pegga' dhalem ngaungngagi poji sokkor dha' Guste
Allah Se Amorba Alam. Amarga badan kaula sareng sadaja ajunan salaggi' tettep
kengeng tambana barokah, inayah, karunia sareng ridaepon saengga bisa apanggi
salera kalaban jumambar panggaliyan. Ta' kalep jugan, Solawat sareng salam
malar moga tep-tebba kaator dha' ajunannepon guste, se sakalangkong mokte
matentrem essena ate, bajjrana ommat e bingkeng are, guste Kanjeng Nabi
Muhammad SAW sareng bala karabaepon.
Sadaja sasemba'an sareng sadaja rabu se alonggu jimet parjuga.
Saestowepon badan kaula ca'epon bangsalan rancanganna badan, cangkolang
rassaepon. Amarga aba' aromasa nyecceng pekker dume' akkal kajal panengal
abandha rajana ate bisaos kaangguy ngopene dadinggalan bangseppo lebat adduwan
pidato basa Madura. Se tantowepon badan kaula sasarengngan gaduwan kawajiban
kaangguy ngopene kalaban taronggu. Same-same ekagali, magarsare Madura gaduwan
ten-aten se aeddet neng baten enggi ka'dhinto bupa' babu' guru rato. Menangka
baburugan R.A. Kusuma Negara dha' jaji'epon, R.A. Atmaja Negara e nalekana
nyemba dha' Bindara Saod menangka rengseppona. Se kantos samangken epadaddi
jimat sareng magarsare Madura nyoppre dhalem ajalane kaodhi'an salamet dunnya
akherat.
Se sapesan enggi ka'dhinto adab dha' bupa' sareng babu'. Ana'
kodu toro' oca' dha' reng seppo, sae manabi tor-mator bibirra kodu mara elaburi
maddu, ajja' kantos comanthaka. Tor jugan tendak tandukkepon kodu ta'
cangkolang akadi ta' tao nyongjung tanang. Nangeng, badhana kamajuwan jaman
akadi samangken ka'dhinto. Ra'-cora' ampon jau dhari ten-atenna reng Madura.
Bannya' ngangodhadan se bangal dha' reng seppona amarga para penottra sareng penonttre
Madura ampon kasengsem, gumeccer tor kalello dha' kabudhajan manca.
Saterrossepon enggi ka'dhinto guru otaba kyae. Rassa adabba
magarsare Madura dha' ka guru otaba kyae sanget taronggu. Saleraepon menangka
kaca kebbang tor somber ka'angguy kengeng baburugan se bisa epadaddi panduman
dhalem ajalane odhi'. Dhabuwepon elampa'agi amarga ngobasane elmo agama tor
jugan sanget semma' dha' Guste Allah Se Amorba Jagat. Pandu'aepon eanggep
mostajab salastarena pandu'a reng seppo dhuwa'.
Se keng-bingkeng enggi ka'dhinto rato otaba pemimpin. Manabi
ta' adab dha' ka rato ka'dhinto kasambat ta' tao juda nagara. Metorot sejarah,
Juda Nagara (Yudo Negoro) menangka sala settong Bupati Sumenep se abillai
Pangeran Trunojoyo e nalekana alorok alaban Balanda. Salerana kasambat penonjul
magarsare se sanget andhap asor tor ngaungnge babatek se sae.
Para rabu se same alonggu jimet parjuga, tartep jatmeka.
Ngereng areng-sareng arabat tor merte dadinggalan bangseppo.
Nyoppre basa Madura ta' kantosa katopowan gumbussa kabudhajan-kabudhajan manca
se alecang cekka' nyalpepe'. Amarga, ampon ekarassa rempek gumbing gan sasowep
dhari ate penottra penottre Madura. Ra'-cora' ampon tato korpas, rorro ta'
butto. Alhamdulillah, badhana Festival Tunas Bahasa Ibu badan kaula ngatore
mator sakalangkong dha' Dinas Pendidikan Kabupaten Sumenep se ampon soddi
maddhai ngangodhadan kaangghuy ngopene, malanggeng, arabat dadinggalan
bangseppo.
Laen dhari ka'dhinto para ajunan, atas sadhaja tor-ator se
ampon taloccor kaator tor se bakal kaator. Sola tengka se jatmeka se korang
jatmeka. Sareng totor basa se ta' akalimat tor ta' karomat. Badan kaula dibi'
anyo'ona sapora, marga badan kaula ka'dhinto kabilang oreng se buddhu banne
coman oreng budhu. Badan kaula ka'dhinto ta' oneng battonna langgar, tanto ta' nyempang
dhari korang ajar. Melaepon badhan kaula ampon tadha' tatta sateppong meber se andhaddhiyagiya
masamporna dhari sadhaja kakorangannepon. Manabi badha rassa se nyangkabel e
dhalem panggaliyan para ajunan se same molja. Kong-langkong dha' saleraepon se molja
dewan juri, badhan kaula namong bisa ngatorragi sapora se tadha' batessepon.
Sadhajana
akadi:
Kaju
papan kaju kosambi
Kaju
dhaddha' jargajiyan
Ja'
kadhukan ja' kagali
Manabi
korang seddha' dhalem panggaliyan.
Saka'dhinto
bisaos pamator, wabillahi taufiqul hidayah wassalamualaikum wr wb
