Lalampan.com. 1444. Dhalem buku karangan epon AhHasmidi se abul-ombul Damar Kambang (ngombar dhari Penerbit Sulur Pustaka
Yogyakarta taon 2022) paneka aesse sabellas carpan. Buku paneka aropa’agi
satengkes careta pandha’ (antologi carpan/cerpen basa Madura). gambar buku
paneka dominan celleng se nandha’agi settong kabadha’an petteng tor badha
tello’ apoy mellok menangka damar kambang.
Dhalem carpan damar kambang dibi adunggeng oreng se
pajat atogu damar kambangnga sopaja ta’ englep, ta’ mate sakale, angen kene’
otaba etambu angen raja, baremma guna akal damar kambang kasebbut se ta’
mateya. Oreng bine’ se ajaga ganeka pon seppo, towa, oedhi’ kadibi’an. Sanajjan
ero-aro mon oreng sopaja ta’ usa ajaga damar kambang pole, babine’ kasebbut
ngambul ngoso’. Saenggana masyarakat pon ngaonenge ja’ babine’ seppo kasebbut
paggun bakal maratene damar kambang se badha se attas lencagga.
Babine’ seppo ganeka ngarep abalina oreng lake’ se
ta’ paleman ampon abit. Abit. Saabit-abidda. Coma kalaban abandha odhi’na damar
kambang aba’na nyonjung pangarep sopaja oreng lake’ kasebbut abali pole ka
lencagga.
E dhalem pekkeran tor panggaliyan masyarakat Madura,
bannya’ hal kajunelan se dhalem pekkeran masyarakat samangken ekoca’ ta’ addhu
sakale, akadiya ngobu kerres, cangkolang monggu kerres, sarombanan atengka ka
kajuwan otaba bungka’an. Manabi atengka saromban ka kerres bakal abakta calaka’
e budhi are, mela dhari paneka, kerres ello’ tello bellas e jaga kalaban
parjuga tor ta’ olle nyengla dhari pakarangan kasebbut asabab abakta kajaja’an
monggu se arabat kalaban onggu-onggu tor ta’ olle ngenye.
Saka’dhinto jugan, e dhalem pola tengka otaba adat
monggu kajuwan, asabab kajuwan paneka badha se ajaga, dhalem careta se
pongkasan, badha kaju raja se ampon taonan, bungka raja tor dhaun gamba’,
ebabana kaju kasebbut badha somor (somber) se bisa ecello’ kaangguy pandhi tor
dha’ar (enom), settong bakto badha lanceng/kacong ngala’ pakanna embi’, notto
ranca’ ka dhajana, kantos satengnga are, ranca’ kasebbut ta’ tolges, banne gun
saka’dhinto.
Oreng se notto ranca’ kasebbut, songkan, ambu
sonson, ambu korabi tor enomi aeng dhari somber ebabana kaju kasebbut.
Carpan-carpan dhalem buku paneka apareng oneng
kalaban mar-samar, kadhinapa pola panggaliyan masyarakat Madura se pajat lakar
emba tor ngestowagi monggu alam, bume magarsarena. Ta’ gampang moger kaju, ta’
gampang arabat tana sangkol, badha adat-adat se kodu lakone sopaja pan-ponapan
se ekalampa, se daddi lalampan paneka abakta kajembaran tor kabunga’an. Manabi
sakerana ta’ abakta kajembaran, minimal ta’ abakta balai, ta’ abakta babaja
monggu aba’na dibi tor oreng laen, mela dhari paneka apanduman monggu bakto se
teppa’ saenggana bannya’ se nyabis, atare monggu bangaseppo, bila epon kerana
bakto se sae kaangguy kalowar dhari roma ban en-laen epon.
*Resensi Paneka etoles Mat Toyu