Lalampan.com—1447. Pidato Bahasa Madura|| Paramasastra|| Teks
pidato berbahasa Madura ini disusun untuk mendukung upaya pelestarian Bahasa
Madura di kalangan generasi muda, khususnya di lingkungan Lembaga Pendidikan.
Dengan berbagai macam tema setiap teksnya, pidato ini dapat dijadikan contoh
sambutan atau materi latihan berbicara di depan umum menggunakan Bahasa Madura.
Naskah ini dikumpulkan dari seluruh peserta FTBI Kabupaten Sumenep Tingkat SMP
(Negeri/Swasta).
Semoga teks pidato ini bermanfaat bagi guru, siswa, maupun
masyarakat umum yang ingin mempraktikkan pidato Bahasa Madura untuk acara
sekolah, lomba pidato, atau kegiatan kebudayaan lainnya || Redaksi Lalampan.com
ASSALAMUALAIKUM WR.WB
Badan kaula badhi ngatorragi pidato kalaban bul ombul ARABAT
TOR MALANGGENG BASA MADURA
Karengga sareng sadaja epon kahormadan:
1. Moga kaonjuga dha' salera epon se molja ebu katuwa MGMP
basa Madura Kabupaten Songennep
2. Moga kaonjuga dha' salera epon se molja dewan juri lomba
pidato
3. Moga kaatora dha' salera epon se molja para rabu se padha
parjuga
Pangapora moga ta badhi rapa' moddha dhadha ngambuwagi dhadha
abdina se nyecceng pekker dhume' akkal, kajal panengal andaddiyagi sabab
mosabab epon gampang tajira' dha' samugellanna tale rassa birassa, rassa se
atalekong ngangen langenna sowara ate, ate se meltas-meltes tor lothe' ngaddu
bangal arancap sapangka' okara mergi tombuna basa, basa basa kaarep mandi
sengnga' mokka kemmo, pamator saat mangken, se lir gumilir anglebadi kabidan
ator se ejalujur lajir ka angguy kadaru dha' pocedda accem se salaggi' ngodha
celo' parana, ca' epon okara bangsalan madurana komancer padha gumeccer tor
ngalecer lanthogga okara pamujja dha' poserra cahja guste Allah guste Amorba
Alam.
Alhamdulillah hirobbil alamin marga sadaja epon tanto asareng
binareng tometa karsa epon Allah se amorba jagat. Jugan badan kaula se padha
aromasa cap - capba dhara poto Madura pettengan molja, biasaepon gampang
talecang neng rekka' renggangnga ca'-oca'an Madura, Sareyang badha Kaka'na,
Bungso badha ale'na, se adaddiyagi abdina takodang noro' biyugga kaom se
ngonjang kadaruyya ate, ate se talanyo' ngatorragi Sholawat tor salam dha'
guste Kanjeng Nabbi Agung Muhammad SAW, se ampon kengeng pangkat karomat ta'
patandhing kaonang menangka Kenase Rahmatan Lil Alamin
PARA RABU SE PADHA PARJUGA
Basa madura sala settong macemma basa daerah se badha e
Indonesia se ka'dhimma kabadha'anna ampon ce' ngenessa asabab para anom gampang
asalen ropa lata daddhi reng manca, adigang adigung adiguna se ta' paguna, tor
jugan korang koko, korang esto dha' basa Madura tor rarengeddan madura Bupa'
Babu', Guru, Rato. Tamba abit takocel korpas rorro, rempek gumbing gan sasuwep
dhari ate se ampon tato.
PARA RABU SE PADHA MULJA
Bupa' Babu', Guru, Rato { Pamarenta} gaduwan pengaro se ce'
rajana ka'angguy nombuwagi ten-aten penotra penotre padha'a kadaruy maranta tor
miyara basa madura, pramel dhari ka'dhinto
1. Bupa' babu'; molae dhari gi' kene' penotra-penotrena dhalem
kaodhi'an re-sa’arena kodu epabiyasa ngangguy basa madura kalaban basa se
lerres ondhangga basana tor andhap asor sola tengkana.
2. Guru; aropa obur kaca kebbang se mapaddhang, maserdhang
bakta ate lodang marga guru gadhuwan kawajiban ka' angnguy miyara basa madura
kalaban ngajari ret-moredda ngangguy basa madura se sae. Sananjan berra’ asabab
ret-moret samangken korang esto dha' basa madura nangeng kodu tettep tapekol
dhalem kawajibanepon, sanare ambet, kodu ta’ tengteng jugan dhalem lalampan.
3. Rato { Pamarenta}; kalaban kakoasaana bisa maranta ngoker
tareka sopaja basa madura tettep tombu jurbu, gumbus neng ten-atenna reng
madura. Sala settongnga kalaban badhana Festival Tunas Bahasa Ibu se bisa
magintrang tor mataresna para poto madura kaangguy merte Basa Madura saenggana
basa Madura ta' eloba gibana jaman, basa madura teptebba ka'oker neng pekker
kaoopen neng baten.
Pramela dineng dhari ka'dhinto ngereng, badan kaula sareng
para ajunan padha'a anteng-barenteng, juntrong taronggu, samakta ngoker tareka,
padha maranta congabba songay emongging tase' ca' epon okara bangsalan madura
se tengges torodda muara se apangara padha rojung majaja, rembuk-sarembak,
marduli marsoddi, padha'a mapak, padha'a nyendemme esoppre basa Madura
lerres-lerres epamadura, pamadurana ta' epalopoda angguyanna, Madurana e
patoju'a e kennengnganna.
Para rabu se padha parjuga
Ta' essa manabi ta’ ebato kene'e langkong dimen (baliker)
eker-pekker, poro dhalem lesan (dhusdhus) aromasa todhus paddhang dhari
kabidhan kantos pongkasan pidato badhan kaula, tanto bannya’ sala sesep pamator
se erenteng tor arontong sola tengka se ta' sarmo alif biddeng tor ta’ nyokot
buja accem dhari ka'dhinto sabang-bang lala' sakoko ereng ta' ngabri duka
panggaliyan para ajunan se padha rabu e ka'dhinto. Rassa tadha' sagara se
tadha'a omba'na.
RENG
SONGENEP
ANDHAP
ASOR TENGKA GULINA
LEMMA'
MANIS PADHABUNA
BUDDHI
TENGGI AJI LARANG KABBI MONJUNG MOJI
Pateppa’
ja' lalagiyan
Jalan nengkong
adat kona
Se korang
sepa' dha' pangggaliyan
Ta'
langkong nyo’on sapora
Wabillahi taufik walhidayah Wassalamualaikum Wr.Wb
