Mahwi Air Tawar, Aeng se Abakta Jembar

Biografi Mahwi Air Tawar

 

Mahwi Air Tawar enggi paneka lalake’ se babbar e tanggal 28 Oktober 1983, e disa Leggung Temor, kacamadan Tang-Batang, Songennep (Sumenep). Molae ajar noles sanja’ (puisi) dhari gi’ toju’ e bangku sakola’an, enggi ka’dhinto gi’ asakola Madrasah Tsanawiyah (SMP) e Pondhuk Pesantren Mathaliul Anwar, Songenep. Sanja’ se kapeng pertama se eserrat bakto gi MTs ganeka ampon ngombar e Majallah Ummi, Jakarta, esosol pas e suara Merdeka, tor jugan pas jugan ngombar sanja’na se laen e Majallah Kuntum, Yogyakarta. Bakto SMA, Lalake’ se lebbi akrab esebbut Mahwi paneka lebbi seggut nyerrat artikel monggu media massa tor daddi contributor pangarang opini Majallah Pendidikan Jaba Temor. Aba’na nyerrat sanja’ pole bakto nerrossagi akulya e jogkarta, lerresepon e UIN Sunan Kalijaga. Salaen akulya, Mahwi Air Tawar jugan aguru monggu settong keyae se tor jugan sastrawan enggi ka’dhinto KH Zainal Arifin Thoha.


Maos jugan

 

Serradan epon se aropa carpan basa Indonesia (Cerpen) tor sanja’ basa Indonesia (Puisi) ampon ngombar di bannya’ antologi areng-sareng, akadiya 3 Penyair Timur (Puisi, 2006), Herbarium (2006, Puisi), Medan Puisi, Sampena the 1 International Poetry (2008, puisi) ), IBUMI: Kisah-kisah di Bawah Pelangi (2008, puisi),  Sepasang Bekicot Muda (2007, cerpen), Jalan Menikung ke Bukit Timah (TSI II, cerpen), Ujung Laut Pulau Marwah (TSI III, cerpen), Tuah Tara No Ate (TSI III, cerpen), Perayaan Kematian (2011, cerpen), dan Rendezvouz di Tepi Serayu (2009, cerpen). Serradan epon jugan ngombar e media akadiya Kompas, Jawa Pos, Republika, Suara Pembaruan, Suara Merdeka, Kedaulatan Rakyat, Suara Karya, Jurnal Sajak, Majalah Sastra Horison, dll. Naskah epon se bul-ombul “Alalabang” menangka naska se paleng bagus e tingkat Asia.

 

Bannya’ epon serradan sanja’ (puisi) tor carpan (cerpen) ampon ta’ kabitong saenggana epakompol daddi buku akadiya buku puisi epon “Taneyan (2015), sabellun ka’dhinto e taon 2010 babbar buku carpan (cerpen) enggi paneka Blater. Tor buku Blater kasebbut ngaolle tandha pangesto menangkat “Cerpen Terbaik” dhari Balai Bahasa Yogyakarta e taon 2012. Taon 2016 babbar pole buku puisi se bul-ombul Tanah Air Puisi, Puisi Tanah Air (2016) para’ asareng kalaban babbarra buku carpan Karapan Laut (2016), e taon 2018 babbar buku puisi Pengembaraan, Perjumpaan, Puisi. Taon 2019 eonjang kaangguy maos sanja’ (puisi) e Vietnam asareng pan-sanapan penyair Indonesia.

 

Salaen nyerrat, Mahwi jugan eonjang dha’ man-kadhimman akadiya lalampan sastra e dhalem tor e loar negeri. Jugan daddi curator Temu 4 Penyair Indonesia, curator tor jugan editor buku kumpulan puisi perdamaian “Menggerus Arus, Menyelami Aceh, (puisi perdamaian penyair 8 Negara, 2018), jugan menangka peserta tor curator lalampan Majelis Sastra Asia Tenggara (MASTERA). Kantos are mangken, Mahwi kabilang menangka redaktur Majallah Sastra Horison tor nettep e Jakarta. Sampe’ samangken jugan kabitong menangka se nyeppowe Arsip Puisi Madura tor jugan Arsip Prosa Madura.

 

Carpan epon se bul-ombul “TOYA” ngaolle tandha pangesto daddi “Cerpen Kompas Pilihan tahun 2022. E taon 2022 paneka jugan, buku epon se abul-ombul “Dari Ruang Belakang Peracik Kopi.” Eonjang Balai Bahasa Jaba Temor kaangguy maloros, mateppa’ tor masae terjemahan sastra basa Madura ka basa Indonesia e taon 2021. Samangken, Mahwi Air Tawar nettep e kottha Depok Jaba Bara’ sambi aracek tor agaluy kopi e barung “Ada Kopi.”


Maos jugan

Tags

Posting Komentar

Lebih baru Lebih lama

Formulir Kontak