"Tesissa cecel, Mas!" Oca'na sambi aberri'
semangat ka sengko'. Angen kalesser sakaleyan adha'. Ngaseyap lebat
bun-embunan. Panas cellep dhari bungkella dhadha.
"Enggi..." Sakeccap se kaloar dhari colo'. Tadha'
pole. Ta' metto pole. Sakalanngkong se raja ba'na la ros-terrosan ngenga'e sengko'.
Ngancae sengko'.
Sakalemba' e mata nyarembeng. Asokkor raja. Ba'na lakar oreng
se ta' bu-ambu maenga' sengko' se lessoan. Lempoan. Ta' bajeng. Lako tedhung.
Ka'angguy gancangan alako tugas. Bi-lebbi tesis se daddi tugas dhi-budhina sengko'
e kampus.
Are teppa'na jareya ta' pate panas. Ong-naong. Sengko' se gi'
buru mare ngare' dhang-ngendhang e padduna teras. Aseyol ngolok angen margana
lalak. Akeppay ngebessagi kalambi ka badan. E tanang sambi pi-hapiyan, mokka' medsos (media sosial) li-baliyan. Mare settonganna
ngalle ka settonganna. Mare Faceboogga ngalle ka Instagram-ma. TikTok ban WA-na
ta' kaloppae keya.
"Mas, mon badha se ta' oneng e bab empa' kabala, gi...."
Mekar nge-chat pole. a-WA pole. Ngenga'e pole.
"Kaula marena mangkatta alako lebbi awal, Mas. Polana badha
rapat yayasan."
"Enggi...." Sakeccap nyengnga'. Sakeccap anga'. Adha'
pole. Ta' metto jawaban pole. E dhalem dhadha gun atokar. Cora'na akakar. Terro
rassana merranganna aba'. Lessona aba'. Budhuna aba'. Sakeng pekker ta' kabuwa'.
Raja'an momossa. Sabban are gun alekser tadha’ ollena apa.
Saestona todhus. Pera' gun anyama ta' sabban kalowar kadhalemma
nyaba. Mekar se maenga' sengko' sopaja ngalakone tesis. Sopaja nyecel. Sopaja
mare. Tape dhari onggana are sampe' nyompet ban ongga pole, sengko' gun-paggun bai.
Adha' obana. Adha' pangarona.
"Palangnga daddi ba'-aba'an. Sabban are gun tep-ketteban.
Nampa cangkem le-toleyan." E cethak abanta.
***
"Le', nyanyonson. Sateya malem Jum'at. Mennyanna badha eadha’
e roma lao'."
"Iya, Ka'..."
"Mon la mare, reya' kopi ban geddhang taragi ka roma temor.
Karebba. Kakerem ka babaja. Sanaossa sakerra' neyatte abakte ka se arabat
pamengkang. Nyokkore nikmat se ta' epakorang."
"E Masjid owa' la aneda'. E gar-langgar la ker-dhikkeran.
Asyi'eran. Ca'-baca'an. Pas mayu duli ongga ka kobung. Sambi tos-ngantos eppa'
se naragi sawi."
"Iya, Ka'...."
Lakar jat ekoduwagi. Sabban malem Jumat sabala'an ajama'a.
Ayasinan. Atahlilan. Ngerem patteha ka bangaseppo. nobadi dusa se ekalako.
Nyokkore nikmat se epareng teba.
"Guste...." Aeng mata nyapcap ta' mare.
"Guste, sakalangkong raja badhana nikmat se teba. Aba'
lakona gun agabay dusa. Badhana lako ta' daddi apa."
Tanang eyangka'. Mata ngeddem. Nyarembeng. Agi'-gigi' aba' se
teppa'na ta' pate seddha'. Ngalemba'. Enga' ka bantana Mekar. Esoro pabajeng.
Pagate. Oca'na paggun mare. Adha' lalakon se paggun nombuk mon ekocel. Adha'
caretana atompo' mon ecaer.
baca jugan: samoga tabarengnga
"Paelangagi kabudhuwanna aba', Guste...."
"Ta' terro rassana aba' paggunna daddiya oreng se
momos. Dhalmos. Ta' enthos."
"Samangken teppa'na aperrang. Nyo'onna kakowatan. Ampon
abit atolo kabudhuwan. Adina bakto lebat sakeddeban."
"Peddi, Guste...."
Ta' kowat namba' eyantarana bibir se akemo' nyebbut asmana
Pangeran. Lebat sepat-sepatta aba' agantongagi pangarep se ta' ga'-pegga'. Ate
ban pekkeran saleng saot. Abanta saleng sapa.
Bintang ngaredhap. Paddhang eyabas dhari adha'na kobung. Se
nyamana kerrong atompo'. Taresna e sokma asapo'. Le' Mekar sakalangkong ba'na
ta' buk-tobuk se maenga' aba'. Sanaossa gi' ta' abit ekennal. Ba'na reng bine'
se badhana adaddiyagi tennang. Masenneng naleka epandeng.
"Mas, engko' buru dhateng dhari kantor." Tang hp
amonye. Ebaca. Badha chat dhari Mekar.
"Ma' buru'enna malem?"
"Terros ngellesin, Mas. Ta' paleman pole margana gella'
rese' ra'-para' Magrib."
"Neka' kaula manggi'i buku se sampeyan sare, Mas. Buku
Manusia Madura karanganna Mien Ahmad Rifai."
"Kaula buru teppa'na lebat e toko buku pas ambu. Re-nyare.
Pas enga' ka sampeyan ja' ri'-bari'na nyare buku neka"
"Duh...."
"Kalangkong, Le'. Sengko' lako marepot ba'na." E dhadha
ngabiyas. Cora' angen malem atotta' e bungkella ate. Mekar sanaossa sibuk alako
gi' paggun enga' ka sengko'. Tugassa sengko'. Mekkerre tesissa sengko'. Lebat
nyareagi buku se ekagabayya referensi.
"Dinggal laggu' epakeremma, Mas."
"Kaula gi' neddha'a saos. Dhari ban-aban ta' neddha."
"Hehe...."
"Enggi,..."
"Sakaleyan agi', sakalangkong, ya."
Ta' abit samarena chat-tan ban Mekar, e Masjid la adan. Adan
Isya la dhapa'. Sengko' nyaba' hp pas jaga abajang sonnat qobliya. Sabellunna
ikomah nyempattagi aduwa. Menta kakowatan ta' buk-tobuk. Nyo'on petodu eli-bali.
Sengko' paggun partaja ja' ud'uny astajib
lakum.[1]
Dhabuna Ki Musleh Adnan, mon la duwa ka Pangeran epakon pacareme. Ja' ambui
sakale. Re-sa'are. Sabban are.
Sumenep, 31 Januari 2023
Ajaz Elmazry aropa’agi nyama khusus dhari Ach Jazuli. Lanceng paneka
babbar e Disa Tambaksari, Rubaru, Songennep. Nganthang asakola dhri SDN
Tambaksari tello’ tor lastare tawon 2010, nerrossagi mondhuk sambi asakola
Tsanawiyah (2013) tor jugan Aliyah (2016) e Darul Ulum Prongpong. Lanceng se
pelka’ elmo paneka nyare sakola’an se lebbi tenggi, mela dhari paneka, aba’na
acangrep ka Program Study Tadris Bahasa Indonesia, Fakultas Tarbiyah, IAIN
Madura, tanto kodu maso’ dhari S1-na, lastare tawon 2020. Aromasa ta’ cokop tor
gi’ aromasa kakorangan elmo. Aneka lakar lanceng se korang ajar. Korang malolo.
Saenggana dha’ ka’dhimma bai etabang. Akadiya ka se kodu mangkat ka Malang,
ajar e Magister Pendidikan Bahasa Indonesia, UNISMA Malang, Jaba Temor. Tanto
ta’ ga-oga. Samangken gi’ ngalakone
tugas aherra se anyama Thesis. Bukuna se kapeng settong enggi paneka Odhi’ ban
Ta-caretana.
